திருப்பூர்:
திருப்பூர் மாவட்டத்தில் கடந்த சில நாட்களாகவே கொரோனா பாதிப்பு அதிகரித்து வருகிறது. கடந்த சில வாரங்களுக்கு முன்பு நாள் ஒன்றின் பாதிப்பு 100-க்கும் கீழ் இருந்து வந்தது. ஆனால் சில வாரங்களாக படிப்படியாக தொற்று அதிகரிக்க தொடங்கியது. தற்போது நாளுக்கு நாள் புதிய உச்சத்தை எட்டி வருகிறது. கடந்த 2 நாட்களாக ஒரு நாள் பாதிப்பு மாவட்டத்தில் 1500-ஐ கடந்துள்ளது.
இதற்கிடையே கொரோனா பாதிப்பு அதிகரிக்க தொடங்கியுள்ளதால், மாவட்டத்தில் கட்டுப்பாட்டு மண்டலங்களும் (தொற்று அதிகம் உள்ள பகுதி) அதிகரித்துள்ளன. கட்டுப்பாட்டு மண்டலங்கள் 61-ஆக சுகாதாரத்துறையினரால் அடையாளம் காணப்பட்டுள்ளது.
இதுகுறித்து சுகாதாரத்துறை அதிகாரிகள் கூறியதாவது:
திருப்பூர் மாவட்டத்தில் 61 கட்டுப்பாட்டு மண்டலங்கள் உள்ளன. இந்த மண்டலங்களில் உள்ள பொதுமக்களுக்கு கட்டுப்பாடுகள் விதிக்கப்பட்டுள்ளன. மேலும், அனைவருக்கும் கொரோனா பரிசோதனையும் எடுக்கப்பட உள்ளன. வெளிநபர்கள் கட்டுப்பாட்டு மண்டலங்களுக்கு செல்லவும், உள்ளே இருக்கிறவர்கள் வெளியே செல்லவும் தடை விதிக்கப்பட்டுள்ளது என்றனர்.
