முருங்கப்பாக்கத்தில் அரசு ஆஸ்பத்திரி ஊழியர் வி‌ஷம் குடித்து தற்கொலை

புதுச்சேரி:

புதுவை முருங்கப்பாக்கம் மகாலட்சுமி நகர் 2-வது குறுக்கு தெருவை சேர்ந்தவர் அன்புதாஸ் (வயது31). இவர் தவளக்குப்பம் அரசு ஆரம்ப சுகாதார நிலையத்தில் உதவியாளராக பணிபுரிந்து வந்தார். இவரும் விழுப்புரத்தை சேர்ந்த ஜோசி(31) என்பவரும் காதலித்து கடந்த 2 ஆண்டுகளுக்கு முன்பு திருமணம் செய்து கொண்டனர். இவர்களுக்கு ஒரு குழந்தை உள்ளது.

இதற்கிடையே குழந்தையை பார்த்து கொள்வது தொடர்பாக கணவன்- மனைவிக்கிடையே அடிக்கடி தகராறு ஏற்பட்டு வந்ததாக கூறப்படுகிறது. நேற்று முன்தினம் இரவு இதுபோல் அவர்களிடம் தகராறு ஏற்பட்டதாக தெரிகிறது. இதையடுத்து இரவு அவர்கள் தனித்தனி அறையில் தூங்க சென்றனர்.

நேற்று காலை வேலைக்கு செல்ல வெகுநேரம் ஆகியும் கணவர் எழுந்திருக்காததால் சந்தேகம் அடைந்த ஜோசி படுக்கை அறைக்கு சென்று பார்த்தார். அப்போது கணவர் அன்புதாஸ் வி‌ஷம் குடித்த நிலையில் மயங்கி கிடப்பதை கண்டு அதிர்ச்சி அடைந்தார்.

பின்னர் அக்கம்பக்கத்தினர் உதவியுடன் கணவரை மீட்டு ஜோசி காரில் புதுவை அரசு ஆஸ்பத்திரிக்கு கொண்டு சென்றார். அங்கு பரிசோதித்த டாக்டர்கள் ஏற்கனவே அன்புதாஸ் இறந்து விட்டதாக தெரிவித்தனர்.

இதுகுறித்த புகாரின் பேரில் முதலியார்பேட்டை போலீஸ் சப்-இன்ஸ்பெக்டர் வீரபத்திரசாமி வழக்கு பதிவு செய்து விசாரணை நடத்தி வருகிறார்.