பொற்றையடி அருகே உள்ள அரசம்பதியில் அய்யா வைகுண்டர்சாமி பதி உள்ளது. இங்கு திருஏடு வாசிப்பு திருவிழா இன்று (வெள்ளிக்கிழழை) தொடங்கி 17 நாட்கள் நடக்கிறது. இன்று அதிகாலை 4 மணிக்கு சரவிளக்கு பணிவிடை, மாலை 5 மணிக்கு திருஏடு வாசிப்பு ஆகியவை நடக்கிறது. திருஏடு வாசிப்பை அன்பாலயம் நிறுவனர் சிவச்சந்திரன் தொடங்கி வைக்கிறார். இரவு 9 மணிக்கு உகப்படிப்பு, பணிவிடை, அன்னதானம் ஆகியவை நடைபெறும். தொடர்ந்து வருகிற விழா நாட்களில் பணிவிடை, திருஏடு வாசிப்பு போன்றவை நடக்கிறது.
15-ம் நாள் விழாவில் அய்யா வைகுண்ட சாமியின் திருக்கல்யாண ஏடு வாசிப்பும், சுருள் படைத்தலும், இரவு 8 மணிக்கு அய்யா வெள்ளை குதிரை வாகனத்தில் கலி வேட்டையாடும் நிகழ்ச்சியும் நடைபெறும். விழாவின் இறுதி நாளான 28-ந் தேதி பட்டாபிஷேக திருஏடு வாசிப்பு நடைபெறுகிறது. அன்று காலை 8 மணிக்கு சாமிதோப்பு பதியின் வடக்கு வாசலில் இருந்து முத்திரி பதம் எடுத்து, பெண்கள் சுருள்தட்டு ஏந்தி மேளதாளங்கள் முழங்க அரசம்பதி நோக்கி ஊர்வலமாக வரும் நிகழ்ச்சி நடக்கிறது. இரவு 9 மணிக்கு அய்யாவழி அருளிசைப்புலவர் சிவச்சந்திரனின் அருள் இசை வழிபாடும் நடைபெறுகிறது.
