ஸ்ரீரங்கம் ரெங்கநாதர் கோவிலில் மாதந்தோறும் நடைபெறும் விழாக்களில் ஆவணி மாதம் நடைபெறும் கிருஷ்ணர் ஜெயந்தி புறப்பாடு மற்றும் உறியடி உற்சவம் மிகவும் பிரசித்தி பெற்றதாகும். அதன்படி கிருஷ்ண ஜெயந்தி புறப்பாடு நேற்று காலை நடைபெற்றது. காலை 6 மணிக்கு நம்பெருமாள் மூலஸ்தானத்திலிருந்து புறப்பட்டு காலை 6.30 மணிக்கு ஸ்ரீபண்டாரம் ஆஸ்தான மண்டபத்திற்கு வந்து சேந்தார்.
காலை 11 மணிமுதல் மதியம் 2 மணிவரை திருமஞ்சனம் நடைபெற்றது. மதியம் 2.30 மணி முதல் மாலை 5 மணிவரை பொதுஜனசேவை நடைபெற்றது. பின்னர் மாலை 5.45 மணிக்கு நம்பெருமாள் ஸ்ரீபண்டாரம் ஆஸ்தான மண்டபத்திலிருந்து புறப்பட்டு மாலை 6 மணிக்கு மூலஸ்தானம் சென்றடைந்தார்.
இன்று (வியாழக்கிழமை) நம்பெருமாள் உறியடி உற்சவ புறப்பாடு நடைபெறுகிறது. காலை 7.15 மணிக்கு கிருஷ்ணன் புறப்பாடு நடைபெறுகிறது. காலை 9 மணிக்கு கிருஷ்ணன் சித்திரை வீதிகளில் எண்ணெய் விளையாட்டு கண்டருளுகிறார். மாலை 3 மணிக்கு நம்பெருமாள் உபயநாச்சியார்கள் மற்றும் கிருஷ்ணனுடன் புறப்பட்டு அம்மாமண்டபம் சாலையில் உள்ள யாதவ ஆஸ்தான மண்டபத்திற்கு மாலை 4 மணிக்கு வந்து சேருகிறார்.
மாலை 6.30 மணிக்கு நம்பெருமாள் ஆஸ்தான மண்டபத்தில் இருந்து புறப்பட்டு இரவு 8.15 மணியளவில் சித்திரை வீதிகளில் வலம் வந்து பாதாள கிருஷ்ணர் சன்னதி அருகில் நடைபெறும் உறியடி உற்சவத்தை கண்டருளுகிறார். பின்னர் அங்கிருந்து புறப்பட்டு இரவு 9 மணிக்கு மூலஸ்தானம் சென்றடைகிறார்.
