ஆஸ்திரேலிய ஓபன்: ரயோனிக்கை வீழ்த்தி அரையிறுதிக்கு முன்னேறிய நடால்

மெல்போர்ன்:

ஆஸ்திரேலிய ஓபன் டென்னிஸ் தொடர் விறுவிறுப்பான கட்டத்தை எட்டியுள்ளது. இன்று நடைபெற்ற ஆடவர் ஒற்றையர் ஆட்டம் ஒன்றில், 14 முறை கிராண்ட் ஸ்லாம் வென்ற ரபேல் நடால், கனடா வீரர் மிலோஸ் ரயோனிக்கை எதிர்கொண்டார். 2 மணி 44 நிமிடங்கள் நீடித்த இப்போட்டியில், 6-4, 7-6 (9/7), 6-4 என்ற செட்கணக்கில் ரபேல் நடால் வெற்றி பெற்று அரையிறுதிக்கு முன்னேறினார்.

இதன் மூலம், நாளை மறுநாள் நடைபெற உள்ள அரையிறுதி ஆட்டத்தில் ரபேல் நடால், பல்கேரிய வீரர் கிரிகோர் திமித்ரோவை எதிர்கொள்ள உள்ளார். இவர்கள் இருவரும் நேருக்கு நெர் 8 முறை மோதியுள்ளனர். இதில் 7 முறை நடால் வெற்றி பெற்றுள்ளதால் அரையிறுதியில் அவருக்கு பெரிய அளவில் நெருக்கடி இருக்காது என எதிர்பார்க்கலாம்.

30 வயதான நடால், கிராண்ட்ஸ்லாம் போட்டிகளில் அரையிறுதிக்கு முன்னேறுவது இது 24-வது முறையாகும். அதேசமயம் ஆஸ்திரேலிய ஓபனில் 5-வது முறையாக அரையிறுதிக்கு முன்னேறியுள்ளார்.

‘இன்றைய ஆட்டத்தில் என்னை எதிர்த்து விளையாடிய மிலோஸ் மிகவும் கடினமாக விளையாடக்கூடியவர். கடந்த இரண்டு வாரங்களுக்கு முன் பிரிஸ்பேனில் அவர் என்னை வீழ்த்தினார். எனவே, இன்றைய போட்டியில் கவனமாக விளையாட முடிவு செய்தேன்’ என்றார் நடால்.