செய்திகள்
மேற்குவங்கம்: கத்தை கத்தையாக 2 ஆயிரம் ரூபாய் கள்ளநோட்டு வைத்திருந்த 3 பேர் கைது
மேற்குவங்க மாநிலத்தில் 2 ஆயிரம் ரூபாய் கள்ளநோட்டு வைத்திருந்த மூன்று பேரை கைது செய்த போலீசார் அவர்களிடமிருந்து 5,96,000 ரூபாய் கள்ளநோட்டுகளை பறிமுதல் செய்தனர்.
கொல்கத்தா:
மேற்குவங்க மாநிலத்தில் சமீப காலமாக கள்ளநோட்டுக்கள் புழக்கம் அதிகரித்து உள்ளதாக போலீசாருக்கு பல்வேறு புகார்கள் சென்றன. குறிப்பாக புதிய 2000 ரூபாய் கள்ள நோட்டுக்கள் அதிகளவு மாற்றப்படுவதாகவும் தகவல்கள் கிடைத்தன. இதையடுத்து கள்ளநோட்டுகளை புழக்கத்தில் விடுபவர்களை கைது செய்யும் நடவடிக்கையில் போலீசார் ஈடுபட்டுள்ளனர்.
இந்நிலையில், முர்ஷிதாபாத் நகரில் கள்ளநோட்டுகள் அதிக அளவில் புழக்கத்தில் விடப்படுவதாக போலீசாருக்கு தகவல் கிடைத்தது. இதையடுத்து அப்பகுதியில் சோதனையில் ஈடுபட்ட போலீசார், இரண்டாயிரம் ரூபாய் கள்ளநோட்டுகள் வைத்திருந்த மூன்று பேரை கைது செய்தனர். மேலும் அவர்களிடமிருந்து 5,96,000 ரூபாய் கள்ளநோட்டுகளையும் போலீசார் பறிமுதல் செய்தனர்.
இதேபோல் இந்தியாவின் பல்வேறு பகுதிகளில் கள்ளநோட்டுகளை புழக்கத்தில் விட்டுவந்த 54 வயதான ஒருவரை டெல்லியில் நேற்று கைது செய்த போலீசார், அவரிடமிருந்து 6,60,000 ரூபாய் கள்ளநோட்டுகளை பறிமுதல் செய்தனர்.