கமலா ஹாரிஸ் வெற்றி பெற வேண்டும்... ரங்கோலி வரைந்து வாழ்த்து தெரிவித்த சொந்த ஊர் மக்கள்

மன்னார்குடி:

அமெரிக்காவில் துணை அதிபர் பதவிக்கு ஜனநாயக கட்சி சார்பில் போட்டியிடுபவர் கமலா ஹாரிஸ்(வயது 55). இவரது சொந்த ஊர் தமிழகத்தின் திருவாரூர் மாவட்டம் மன்னார்குடி அருகே உள்ள துளசேந்திரபுரம் கிராமம் ஆகும். கமலா ஹாரிசின் தாய்வழி தாத்தா கோபாலன், பாட்டி ராஜம் ஆகியோர் மன்னார்குடியை அடுத்துள்ள துளசேந்திரபுரம் கிராமத்தை சேர்ந்தவர்கள்.

அமெரிக்க துணை அதிபர் தேர்தலில் முதன் முதலில் இந்திய வம்சாவளியை சேர்ந்த பெண் ஒருவர் போட்டியிடுவதால் அவரது சொந்த ஊரான துளசேந்திரபுரம் கிராம மக்கள் மகிழ்ச்சி அடைந்துள்ளனர்.

தற்போது தேர்தல் முடிந்து வாக்கு எண்ணிக்கை நடைபெற்று வரும் நிலையில், துளசேந்திரபுரம் கிராமம் முழுவதும் கமலா ஹாரிஸ் வெற்றி பெற வாழ்த்து தெரிவித்து பதாகைகள் வைக்கப்பட்டுள்ளன. வீடுகளின் முன்பு ரங்கோலி வரைந்தும் கமலா ஹாரிசுக்கு தங்கள் வாழ்த்துக்களை தெரிவித்துள்ளனர். கோவிலில் சிறப்பு வழிபாடும் செய்தனர்.

அமெரிக்க தேர்தலில் கமலா ஹாரிஸ் வெற்றி பெற்று தங்களை சந்திக்க வருவார் என துளசேந்திரபுரத்தைச் சேர்ந்த ஒருவர் நம்பிக்கை தெரிவித்தார்.