இந்தியை புகுத்த முயற்சித்தால் மோசமான விளைவுகள் உருவாகும் - கனிமொழி எம்.பி. பேட்டி

ஆலந்தூர்:

சென்னை மீனம்பாக்கம் விமான நிலையத்தில் தி.மு.க. மகளிர் அணி செயலாளரும், தூத்துக்குடி பாராளுமன்ற உறுப்பினருமான கனிமொழி நிருபர்களிடம் கூறியதாவது:

மத்திய அரசு தொடர்ந்து மக்களின் உணர்வுகளைப் புரிந்து கொள்ளாமல் அவர்களுக்கு புரியாத மொழியில் தொடர்பு கொள்ள வேண்டிய சூழலை கட்டாயமாக்குகிறது. இந்தி தெரியவில்லை என்றால் அரசிடமிருந்து எந்த பதிலையும், தொடர்பையும் பெற முடியவில்லை. கடிதங்கள்கூட இந்தியில்தான் அனுப்பக்கூடிய சூழல் மத்திய அரசிடம் இருக்கிறது.

மக்களிடம் எல்லா வகையிலும் இந்தியை திணிக்கும் சூழ்நிலையை மத்திய அரசு உருவாக்கி கொண்டு இருக்கிறது. மக்களின் கஷ்டங்களைப் புரிந்து கொள்ள முடியாத நிலை உள்ளது. ரெயில் டிக்கெட்டுகளை முன் பதிவு செய்தால் வரும் குறுந்தகவலை கூட மக்களால் படிக்க முடியாது. குறைந்தபட்ச மனிதாபிமானம் கூட இல்லாமல் இந்தியை புகுத்துவதையே தொடர்ந்து செய்வது மோசமான விளைவுகளை உருவாக்கும்.

உத்தர பிரதேசத்தில் உள்ள ஹத்ராசில் நடந்த சம்பவத்தில் பாதிக்கப்பட்ட குடும்பத்தினருக்கு நியாயம் கிடைக்காமல் சம்பவத்தை மூடி மறைக்கத்தான் அரசு முயல்கிறது என தெரிவித்தார்.