வீடியோ: விமானத்தில் அபினந்தனின் பெற்றோருக்கு எழுந்து நின்று மரியாதை செலுத்திய பயணிகள்

சென்னை:

எல்லையில் நடந்த தாக்குதலின்போது இந்திய விமானப்படை விங் கமாண்டர் அபினந்தனை பாகிஸ்தான் சிறைப்பிடித்தது. ஜெனிவா ஒப்பந்தத்தின்படி, போர்க்கைதியாக பிடிபட்டுள்ள அபினந்தனை பத்திரமாக இந்தியாவிடம் ஒப்படைக்க வேண்டும் என மத்திய அரசு வலியுறுத்தியது. மேலும் அபினந்தனை விடுவிப்பதற்காக ராஜாங்கரீதியாகவும் தீவிர முயற்சி மேற்கொண்டது. பாகிஸ்தானில் உள்ள இந்திய தூதர், பாகிஸ்தான் வெளியுறவுத்துறை அதிகாரிகளை நேரில் சந்தித்து, அபினந்தனை விடுவிக்கும்படி வலியுறுத்தினார்.


இதற்கிடையே, அபினந்தனை வரவேற்பதற்காக அவரது தந்தை வர்தமான், தாயார் ஷோபனா ஆகியோர் சென்னையில் இருந்து நேற்று இரவு டெல்லி புறப்பட்டுச் சென்றனர். சென்னை விமான நிலையத்திற்கு சென்று டெல்லி செல்லும் விமானத்தில் ஏறியதும், சக பயணிகள் எழுந்து நின்று கைதட்டி உற்சாகமாக வரவேற்றனர். அவர்களை தங்கள் செல்போன்களில் புகைப்படங்கள் எடுத்தனர். நாட்டிற்கு சேவை செய்து நற்பெயர் பெற்றுள்ள மகனால், தங்களுக்கு கிடைத்த வரவேற்பையும், மரியாதையையும் கண்டு பெற்றோர் பூரிப்படைந்தனர்.