சையத் முஸ்தாக் அலி டி20 தொடர்: இஷான் கிஷன் 55 பந்தில் 7 சிக்சருடன் சதம் விளாசல்

இந்திய கிரிக்கெட் வாரியத்தால் நடத்தப்படும் மிகப்பெரிய டி20 போட்டியின் சையத் முஸ்தாக் அலி தொடர் நேற்று தொடங்கியது. இன்று நடைபெற்ற ஆட்டமொன்றில் ஜார்க்கண்ட் - ஜம்மு-காஷ்மீர் அணிகள் மோதின. முதலில் பேட்டிங் செய்த ஜம்ம-காஷ்மீர் 20 ஓவரில் 9 விக்கெட் இழப்பிற்கு 168 ரன்கள் சேர்த்தது.

பின்னர் 169 ரன்கள் அடித்தால் வெற்றி என்ற இலக்குடன் ஜார்க்கண்ட் களம் இறங்கியது. ஆனந்த் சிங், இஷான் கிஷன் ஆகியோர் தொடக்க வீரர்களாக களம் இறங்கினார்கள். இருவரும் அதிரடி ஆட்டத்தை வெளிப்படுத்தினார்கள். ஆனந்த் சிங் 34 பந்தில் 6 பவுண்டரி, 2 சிக்சருடன் 48 ரன்கள் சேர்த்தார்.

இஷான் கிஷன் அதிரடியாக விளையாடி 55 பந்தில் 8 பவுண்டரி, 7 சிக்சருடன் சரியாக 100 ரன்கள் சேர்த்தார். இதனால் ஜார்க்கண்ட் 16.4 ஓவரில் 1 விக்கெட் இழப்பிற்கு 170 ரன்கள் எடுத்து 9 விக்கெட் வித்தியாசத்தில் அபார வெற்றி பெற்றது.