திருவண்ணாமலை:
சிவகாசியை சேர்ந்தவர் சுகந்திரன் (57), திருவண்ணாமலை மின்வாரிய அலுவலக மேலாளர். வேங்கிகால் வள்ளியம்மாள் நகரில் அவரது மனைவி விஜயலெட்சுமியுடன் வசித்து வந்தார்.
மகள் பிரியதர்ஷினி திருமணம் முடிந்து மதுரையில் வசிக்கிறார். கடந்த 27-ந்தேதி விஜயலெட்சுமி தூத்துக்குடியில் உள்ள அவரது பெற்றோர் வீட்டுக்கு சென்றிருந்தார். சுகந்திரன் மட்டும் தனியாக இருந்தார். அவரது மனைவியும், மகளும் இன்று காலை திருவண்ணாமலைக்கு வந்தனர்.
வீட்டுக்குள் கதவு உள்ளே பூட்டப்பட்டிருந்தது. சத்தம் போட்டும் சுகந்திரன் கதவை திறக்கவில்லை. சந்தேகமடைந்த அவர்கள் அக்கம் பக்கத்தினர் உதவியுடன் கதவை உடைத்து உள்ளே சென்றனர்.
அங்குள்ள குளியலறையில் சுகந்திரன் இறந்து கிடந்தார். இதனைக் கண்டு அவர்கள் கதறி அழுதனர்.
திருவண்ணாமலை கிழக்கு போலீசார் சம்பவ இடத்துக்கு சென்றனர். சுகந்திரன் உடல் வீங்கி இருந்தது. இதனால் அவர் இறந்து 2 நாட்கள் இருக்கலாம் என சந்தேகிக்கப்படுகிறது.
அவர் எப்படி இறந்தார் என்பது மர்மமாக உள்ளது. போலீசார் உடலை கைப்பற்றி திருவண்ணாமலை அரசு ஆஸ்பத்திரிக்கு அனுப்பி வைத்தனர்.
மேலும் வழக்குபதிவு செய்து விசாரணை நடத்தி வருகின்றனர்.
