பரமக்குடி
பரமக்குடி சவுராஷ்டிரா பிராமண ஜனங்களுக்குச் சொந்தமான சுந்தரராஜப் பெருமாள் கோவிலின் கோடை திருவிழா சைத்ரோத்ஸவம் 12 நாட்கள் நடைபெறுகிறது. இன்று
(30-ந் தேதி) கோடை திருவிழா தொடங்கி தொடர்ந்து திருவிழா விமரிசையாக நடைபெற உள்ளது.
வருகிற 5-ந் தேதி (வெள்ளி)அதிகாலை 4.50 மணியளவில் கோவில் படித்துறையின் எதிரே உள்ள வைகையாற்றில் வண்ண மலர்களால் சூழப்பட்ட பூப்பல்லக்கில் பெருமாள் கள்ளழகர் வேடம் பூண்டு இறங்குகிறார். சித்ரா பவுர்ணமி நிலா வெளிச் சத்திலும், தீவட்டி ஒளியிலும் வாண வேடிக்கை முழங்க வைகையாற்றில் இறங்கும் கள்ளழகரை கோவிந்தா...கோவிந்தா... என்று கூடி இருக்கும் திரளான பக்தர்கள் விண்ணை முட்டும் அளவுக்கு முழங்கி பக்தி பரவசத்துடன் சுவாமியை வணங்குவார்கள்.
வைகையாற்றில் இறங்கும் கள்ளழகர் பல மண்டகப் படிகளுக்குச் சென்று விட்டு, மேலச்சத்திரம் பகுதியில் உள்ள தல்லாகுளம் மண்டகப் படியை சென்றடைவார். தொடர்ந்து, அன்று காலை 9.55 மணியளவில் கள்ளழகர் குதிரை வாகனத்தில் வீற்றிருந்து தல்லாகுளம் மண்டகப்படியில் இருந்து வெளியேறுவார். அப்போது விரதம் இருந்த நூற்றுக்கணக்கான பக்தர்கள் பீச்சாங்குழல் என்னும் துருத்தி மூலம் மஞ்சள் நீரை கள்ளழகர் மீது பீய்ச்சியடிப்பார்கள்.
பின்னர் மேலச்சத்திரம், ஓட்டப்பாலம், காட்டு பரமக்குடி, மஞ்சள்பட்டினம் சென்று அங்குள்ள கோவிலில் வீற்றிருந்து பக்தர்களுக்கு காட்சியளிப்பார். பின்பு, ஆற்றுப் பாலம், நகர் பகுதி வழியாக வந்து அனுமார் கோவிலில் வீற்றிருந்து அருள்பாலிப்பார். மாலையில அங்கிருந்து புறப்பட்டு பூக்கடை பஜார், பெரிய கடைவீதி, நகைக்கடை பஜார், காந்தி சிலை சமீபம், பெருமாள் கோவில், எமனேசுவரம் சென்று வண்டியூர் என்னும் காக்காத்தோப்பை சென்றடைந்து அங்குள்ள கருப்பணசுவாமி கோவிலில் வீற்றிருந்து பக்தர்களுக்கு காட்சியளிப்பார்.
இதனிடையே பரமக்குடி ஆற்றுப் பாலம் பகுதியில் இருந்து ஆயிரம் பொன் சப்பரம் வைகையாற்று மணலில் சுமார் 2 கி.மீ.தூரம் இழுத்து செல்லப்பட்டு காக்காத்தோப்பை சென்றடையும். அங்கு சப்பரத்தினுள் கள்ளழகரை கொடுத்து வாங்குவார்கள். இந்த நிகழ்ச்சிகளை பார்க்க பரமக்குடி மட்டுமல்லாது தமிழகத்தின் அனைத்து பகுதிகள், சுற்றுப்புற கிராம மக்கள் பல்லாயிரக்க ணக்கானவர்கள் குழந்தைகள், குடும்பத்தினருடன் திரளாக திரண்டு வந்து வைகையாற்று மணலில் அமர்ந்து சுவாமி தரிசனம் செய்தும், நிலா ஒளியில் விளக்கெண்ணெய் தோசை உள்பட பல வகையான உணவு வகைகளை சாப்பிட்டும் மகிழ்வார்கள்.
6-ந்தேதி (சனி) இரவு வாணியர் உறவின்முறை யார்களின் மண்டகப்படியில் தசாவதார காட்சிகள் நடைபெறும். 7-ந் தேதி (ஞாயிறு) மட்டா மண்டகப்படியிலும், 8-ந்தேதி (திங்கள்) சீனிவாசய்யர் சன்ஸ் மண்டகப்படியிலும், 9-ந்தேதி (செவ்வாய்) காலை மண்டகப்படியில் இருந்து கள்ளழகர் பூப்பல்லக்கில் எழுந்தருளி வைகையாற்றில் இருந்து புறப்பட்டு கொளுத்தும் வெயிலையும் பொருட்படுத்தாது நகரின் பல முக்கிய வீதிகளில் வலம் வந்து மாலை கோவிலுக்குள் சென்றடைவார்.
அன்று இரவு பெருமாள் கண்ணாடி எதிர்சேவை நிகழ்ச்சி நடைபெறும். 10 -ந் தேதி (புதன்) உத்ஸவ சாந்தியும், 11-ந்தேதி (வியாழன்) வாணியர் உறவின்முறையார்கள் சார்பில் பாலாபிஷேகமும் நடைபெறும். இரவு பூப்பல்லக்கில் பெருமாள் எழுந்தருளி விடிய... விடிய.. நாதசுரம் முழங்க நகரில் வலம் வந்து பக்தர்களுக்கு காட்சியளிப்பார்.
திருவிழாவிற்கான ஏற்பாடுகளை கோவில் மானேஜிங் டிரஸ்டி துடுகுச்சி டி.ஆர்.நாகநாதன், டிரஸ்டி அன்டு டிரசரர் குச்சேரி கே.ஆர்.பாலமுருகன், டிரஸ்டிகள் சலகவா எஸ்.என்.நாகநாதன், கெட்டி ஜி.என்.கோவிந்தன், பொட்டி பி.கே.முரளிதரன் ஆகியோர் செய்துள்ளனர். திருவிழாவையொட்டி, பெருமாள் கோவில் கோபுரம், நகரில் பல வர்ண மின் விளக்குகளால் அலங்கரிக்கப்பட்டு நகரமே விழாக்கோலம் பூண்டுள்ளது.
