கோவை:
விருதுநகரை சேர்ந்தவர் காளிமுத்து(வயது 29). இவர் கோவை மாநகர ஆயதப்படையில் போலீஸ்காரராக பணியாற்றி வந்தார்.
கோவையில் உள்ள சிறைச்சாலை மைதானத்தில் அரசு பொருட்காட்சி நடந்து வருகிறது. இங்கு கோவை மாநகர காவல்துறை சார்பில் அரங்கு அமைக்கப்பட்டுள்ளது. அந்த அரங்கில் கடந்த சில நாட்களாக போலீஸ்காரர் காளிமுத்து பாதுகாப்பு பணியில் ஈடுபட்டிருந்தார். நேற்றும் அவர் பாதுகாப்பு பணியில் ஈடுபட்டிருந்தார்.
இந்த நிலையில் நேற்று போலீஸ்துறை சார்பில் அமைக்கப்பட்டிருந்த அரங்கில் துப்பாக்கி குண்டு சத்தம் கேட்டது. இதில் அதிர்ச்சியடைந்தவர்கள் ஓடி சென்று பார்த்தனர்.
அப்போது பாதுகாப்பு பணியில் இருந்த போலீஸ்காரர் காளிமுத்து துப்பாக்கியால் தனது வயிற்றில் சுட்ட நிலையில் ரத்த வெள்ளத்தில் மயங்கி கிடந்தார்.
இதனை பார்த்த அங்கிருந்தவர்கள் உடனடியாக காளிமுத்துவை மீட்டு தனியார் ஆஸ்பத்திரிக்கு கொண்டு சென்றனர்.
அங்கு அவரை டாக்டர்கள் தீவிர சிகிச்சை பிரிவில் அனுமதித்து சிகிச்சை அளித்து வந்தனர்.
பரிசோதனையில் அவருக்கு கிட்னி பாதிப்பு ஏற்பட்டது தெரியவந்தது. தொடர்ந்து அவருக்கு டாக்டர்கள் சிகிச்சை அளித்தனர்.
இருப்பினும் சிகிச்சை பலன் அளிக்காமல் நள்ளிரவு 1 மணியளவில் போலீஸ்காரர் காளிமுத்து உயிரிழந்தார்.
இந்த சம்பவம் குறித்து ரேஸ்கோர்ஸ் போலீசார் வழக்குப்பதிவு செய்து விசாரணை நடத்தினர்.
விசாரணையில், போலீஸ்காரர் காளிமுத்து கடந்த சில மாதங்களாக ஆன்லைன் ரம்மி விளையாடி வந்துள்ளார். எப்போதும் அதிலேயே அவர் மூழ்கி கிடந்துள்ளார். ஆன்லைன் ரம்மி விளையாடுவதற்காக அவர் பலரிடமும் கடன் வாங்கியுள்ளார்.
இதுவரை ஆன்லைன் ரம்மி விளையாடி ரூ.20 லட்சத்திற்கும் மேல் பணத்தை இழந்ததாக கூறப்படுகிறது. இதுகுறித்து தனது குடும்பத்தாரிடம் கூறியுள்ளார். இதையடுத்து அவர்கள் தங்கள் நகை உள்ளிட்ட பொருட்களை அடகு வைத்து காளிமுத்து வாங்கிய கடனை அடைத்துள்ளனர்.
இருப்பினும் தான் கடனாளி ஆகி விட்டதாலும், குடும்பத்தினரை தான் கஷ்டப்படுத்தி விட்டதாலும் காளிமுத்து கடந்த சில நாட்களாக மிகுந்த மன உளைச்சலில் இருந்தார். இந்த விரக்தியிலேயே நேற்று பணியில் இருந்த போலீஸ்காரர் காளிமுத்து துப்பாக்கியால் சுட்டு தற்கொலை செய்து கொண்டது போலீசாரின் விசாரணையில் தெரியவந்தது.
தொடர்ந்து போலீசார் இந்த சம்பவம் குறித்து விசாரணை நடத்தி வருகிறார்கள்.
இறந்த போலீஸ்காரர் காளிமுத்து கடந்த 2013-ம் ஆண்டு போலீஸ்துறையில் பணியில் சேர்ந்தார். பின்னர் அவர் 2016-ம் ஆண்டு கோவை மாநகர ஆயுதப்படை பிரிவுக்கு மாற்றப்பட்டார். 2-ம் நிலை காவலராக பணியாற்றி வந்தார். அவருக்கு தில்லை நாயகி என்ற மனைவியும் ஒரு மகன் மற்றும் ஒரு மகள் உள்ளனர்.
கோவையில் அரசு பொருட்காட்சி மைதானத்தில் பாதுகாப்பு பணியில் இருந்த போலீஸ்காரர் துப்பாக்கியால் சுட்டு தற்கொலை செய்து கொண்ட சம்பவம் பரிதாபத்தை ஏற்படுத்தியுள்ளது.
