பெங்களூரு:
கர்நாடக மாநிலத்தில் பெரும்பான்மை பெறாத பா.ஜ.க. ஆட்சிபொறுப்பை ஏற்றதில் இருந்து பரபரப்பான சூழல் நிலவி வருகிறது. எடியூரப்பா முதல்வராக பதவியேற்றதை எதிர்த்து காங்கிரஸ், ஜே.டி.எஸ். கட்சிகள் தொடர்ந்த வழக்கை விசாரித்த உச்ச நீதிமன்றம், நம்பிக்கை வாக்கெடுப்பை நடத்த உத்தரவிட்டது. அதன்படி இன்று சட்டமன்றக் கூட்டம் கூட்டப்பட்டுள்ளது.
இன்று மாலை 4 மணிக்கு நம்பிக்கை வாக்கெடுப்பு நடைபெற உள்ள நிலையில், எதிர்க்கட்சி எம்.எல்.ஏ.க்களை வளைக்கும் பா.ஜ.க.வின் உச்சகட்ட பேரம் குறித்த தகவல் வெளியாகி உள்ளது. அதாவது, காங்கிரஸ் எம்.எல்.ஏ. பாட்டீலுடன் முதல்வர் எடியூரப்பா பேசுவது போன்ற ஆடியோவை காங்கிரஸ் வெளியிட்டுள்ளது.
அதில், பாட்டீலுக்கு அமைச்சர் பதவியுடன் நீங்கள் கேட்டதை தருகிறோம் என்று எடியூரப்பா கூறுவதுபோல் உள்ளது. மேலும் 3 பேரை அழைத்து வாருங்கள் என்றும் எடியூரப்பா கூறுகிறார். இந்த ஆடியோ விவகாரம் அரசியலில் புதிய புயலைக் கிளப்பி உள்ளது.
ஏற்கனவே எடியூரப்பாவிற்காக ராய்ச்சூரை சேர்ந்த காங்கிரஸ் எம்.எல்.ஏ.விடம் ஜனார்த்தன ரெட்டி பேரம் பேசியதாக காங்கிரஸ் குற்றம் சாட்டி, அது தொடர்பான ஆடியோ ஆதாரத்தை வெளியிட்டது குறிப்பிடத்தக்கது. #KarnatakaFloorTest #Yeddyurappaaudio
