திசையன்விளை:
திசையன்விளை அருகே உள்ள மேற்கு தோப்புவிளையில் புனித அந்தோணியார் ஆரம்ப பள்ளி உள்ளது. இந்த பள்ளியில் தலைமை ஆசிரியராக சுகந்தி என்பவர் பணியாற்றி வருகிறார். இந்த பள்ளி தாளாளராக அதே ஊரைச் சேர்ந்த சேவியர் அருள்ராஜ் என்பவர் உள்ளார்.
தலைமை ஆசிரியருக்கும், பள்ளி தாளாளருக்கும் ஏற்பட்ட கருத்து வேறுபாடு காரணமாக கடந்த 3 நாட்களாக ஆசிரியை வருகை பதிவேட்டில் கையெழுத்திட பள்ளி நிர்வாகி மறுத்ததாக கூறப்படுகிறது.
இதையடுத்து வருகை பதிவேட்டில் கையெழுத்திட அனுமதிக்க கோரி ஆசிரியை சுகந்தி கடந்த மூன்று நாட்களாக பள்ளி முன்பு தர்ணா போராட்டத்தில் ஈடுபட்டு வந்தார். தகவல் அறிந்து அங்கு சென்ற உவரி போலீஸ் இன்ஸ்பெக்டர் சந்திசெல்வி, கரைசுத்து புதூர் கிராம நிர்வாக அலுவலர் அயூப்கான் ஆகியோர் பள்ளி தாளாளர் மற்றும் ஆசிரியரிடம் பேச்சுவார்த்தை நடத்தினர்.
அப்போது இப்பிரச்சனை தொடர்பாக இருவரும் பேசி முடிவு எடுப்பது என தீர்மானிக்கப்பட்டது. அதைதொடர்ந்து நேற்று மதியம் ஆசிரியர் தர்ணா போராட்டத்தை நிறைவு செய்தார்.
