புதுடெல்லி:
பாரதி ஏர்டெல், ரிலையன்ஸ் ஜியோ போன்றே ஐடியா செல்லுலார் நிறுவனமும் ரூ.93 விலையில் புதிய திட்டத்தை தனது பிரீபெயிட் வாடிக்கையாளர்களுக்கு அறிவித்துள்ளது. ஜியோ மற்றும் ஏர்டெல் போன்றே ஐடியாவும் டேட்டாவை விட அதிக அழைப்புகளை மேற்கொள்ளும் வாடிக்கையாளர்களை குறிவைத்தே இந்த திட்டத்தை அறிவித்துள்ளது.
பத்து நாட்கள் வேலிடிட்டி கொண்ட புதிய திட்டத்தில் வாடிக்கையாளர்களுக்கு அன்லிமிட்டெட் உள்ளூர் மற்றும் வெளியூர் அழைப்புகள், 1 ஜிபி 3ஜி டேட்டா வழங்கப்படுகிறது. இதில் வாடிக்கையாளர்களுக்கு எஸ்.எம்.எஸ். இலவசமாக வழங்கப்படவில்லை, மாறாக அன்லிமிட்டெட் அழைப்புகளும் தினமும் 250 நிமிடங்களும், வாரத்திற்கு 1000 நிமிடங்களும் வழங்கப்படுகிறது.
இந்த கெடு நிறைவுற்றதும் வாடிக்கையாளர்கள் மேற்கொள்ளும் அழைப்புகள் நொடிக்கு 1 பைசா வீதம் கட்டணம் வசூலிக்கப்படும். எனினும் ஐடியா அறிவித்துள்ள புதிய திட்டம் தேர்வு செய்யப்பட்ட சில வாடிக்கையாளர்களுக்கு மட்டுமே வழங்கப்படும் என ஐடியா சார்பில் தெரிவிக்கப்பட்டுள்ளது.
அந்த வகையில் இந்த திட்டத்தில் ரீசார்ஜ் செய்யும் முன் வாடிக்கையாளர்கள் இந்த திட்டம் தங்களுக்கு வழங்கப்பட்டுள்ளதை உறுதி செய்து கொள்ள வேண்டியது அவசியமாகியுள்ளது. ஐடியா அறிவித்துள்ள ரூ.93 திட்டம் ஏர்டெல் கடந்த வாரம் அறிவித்த ரூ.93 திட்டத்திற்கு போட்டியாக அமைந்துள்ளது.
ஏர்டெல் வழங்கும் ரூ.93 திட்டத்தில் வாடிக்கையாளர்களுக்கு தினமும் 100 எஸ்.எம்.எஸ். இலவசமாக வழங்கப்படுகிறது. மற்ற இரு நிறுவன திட்டங்களில் எவ்வித மாற்றங்களும் இல்லை. ஜியோ அறிவித்துள்ள ரூ.98 திட்டத்தில் வாடிக்கையாளர்களுக்கு 14 நாட்கள் தினமும் 150 எம்பி டேட்டா, அன்லிமிட்டெட் அழைப்புகள், ரோமிங் உள்ளிட்டவை வழங்கப்படுகிறது.
