துபாய்:
டி20 உலகக்கோப்பை கிரிக்கெட் போட்டியை ஐசிசி 2007-ல் அறிமுகப்படுத்தியது. அறிமுக உலகக்கோப்பையில் இந்தியா சாம்பியன் பட்டம் பெற்றது. 2 ஆண்டுகளுக்கு ஒருமுறை 20 ஓவர் உலகக்கோப்பை போட்டி நடைபெற்று வருகிறது.
2009-ல் பாகிஸ்தானும், 2010-ல் இங்கிலாந்தும் (2011-ல் இந்தியாவில் உலகக்கோப்பை தொடர் நடைபெற்றதால் 2010-ல் நடத்தப்பட்டது), 2012-ல் வெஸ்ட்இண்டீசும், 2014-ல் இலங்கையும், 2016-ல் வெஸ்ட் இண்டீசும் உலகக்கோப்பையை கைப்பற்றியது.
7-வது டி20 உலகக்கோப்பை போட்டி முதலில் தென்ஆப்பிரிக்காவில் கடந்த வருடம் நடைபெறுவதாக இருந்தது. ஆனால் 2017-ம் ஆண்டுடன் ஐசிசி சாம்பியன்ஸ் டிராபி தொடர் முடிவடைந்துவிட்டதால், ஐசிசி 2020-ல் டி20 உலகக்கோப்பையை நடத்த முடிவு செய்தது.
அதன்படி ஆஸ்திரேலியாவில் அடுத்த ஆண்டு (2020) அக்டோபர் 18-ந்தேதி முதல் நவம்பர் 15-ந்தேதி வரை டி20 உலகக்கோப்பை தொடர் நடக்கிறது. இந்த போட்டிக்கான அட்டவணையை சர்வதேச கிரிக்கெட் கவுன்சில் (ஐசிசி) இன்று வெளியிட்டுள்ளது.
ஐசிசி தரவரிசையில் முதல் 8 இடங்களில் உள்ள அணிகள் நேரடியாக தகுதி பெற்றுள்ளன. 9-வது மற்றும் 10-வது இடங்களில் உள்ள இலங்கை, வங்காளதேசம், மற்றும் 6 இதர அணிகள் தகுதி சுற்றில் விளையாட வேண்டும். இதில் இருந்து 4 அணிகள் தகுதி பெறும்.
தரவரிசையில் முதல் 2 இடங்களில் இருப்பதால் இந்தியாவும், பாகிஸ்தானும் ஒரே பிரிவில் இடம்பெற வில்லை. இரண்டு பிரிவிலும் இடம் பெற்றுள்ள அணிகள் வருமாறு:-
‘ஏ’ பிரிவு: பாகிஸ்தான், ஆஸ்திரேலியா, வெஸ்ட் இண்டீஸ், நியூசிலாந்து, தகுதிபெறும் அணிகள்.
‘பி’ பிரிவு: இந்தியா, இங்கிலாந்து, தென் ஆப்பிரிக்கா, ஆப்கானிஸ்தான், தகுதிபெறும் அணிகள்.
20 ஓவர் உலகக்கோப்பையில் இந்திய அணி முதல் ஆட்டத்தில் தென்ஆப்பிரிக்காவுடன் மோதுகிறது.
அக் 24 : இந்தியா- தென்ஆப்பிரிக்கா.
அக் 29 : இந்தியா- தகுதி பெறும் அணி (ஏ-2).
நவ 1 : இந்தியா- இங்கிலாந்து.
நவ 5 : இந்தியா- தகுதிபெறும் அணி (பி-1)
நவ 8 : இந்தியா- ஆப்கானிஸ்தான்.
