சச்சின் தெண்டுல்கர் சாதனையை துரத்திக் கொண்டிருந்த அச்சுறுத்தல் முடிவுக்கு வந்தது

இந்திய கிரிக்கெட்டின் கடவுள் என்றும், லிட்டில் மாஸ்டர் என்றும் அழைக்கப்படுபவர் சச்சின் தெண்டுல்கர். இவர் ஒருநாள் மற்றும் டெஸ்ட் போட்டிகளில் 100 சதங்கள் விளாசியுள்ளார். தனது 24 வருட கிரிக்கெட் வாழ்க்கையில் (1989 முதல் 2013 வரை) 200 டெஸ்ட் போட்டிகளில் விளையாடி 51 சதம், 68 அரைசதங்களுடன் 15921 ரன்கள் குவித்துள்ளார். அதிகபட்சமாக ஆட்டமிழக்காமல் 248 ரன்கள் சேர்த்துள்ளார்.

டெஸ்ட் போட்டியில் ஒரு தனிநபர் அடித்த அதிகபட்ச ஸ்கோர் இதுவாகும். இந்த சாதனையை முறியடிக்க எவராலும் முடியாது என்று கருதப்படுகிறது. இந்த வேளையில்தான் இங்கிலாந்து வீரரான அலஸ்டைர் குக் விஸ்வரூபம் எடுத்தார். டெஸ்ட் போட்டியில் அபாரமான ஆட்டத்தை வெளிப்படுத்தி வந்தார்.



150 டெஸ்ட் போட்டியிலேயே 11 ஆயிரம் ரன்களுக்கு மேல் குவித்திருந்தார். அலஸ்டைர் குக் 160 டெஸ்ட் போட்டிகளில் விளையாடி 32 சதங்கள், 56 அரைசதங்களுடன் 12254 ரன்கள் குவித்துள்ளார். அவருக்கு தற்போது 33 வயதே ஆவதால் 37 வயது வரை விளையாடினால் சச்சின் சாதனையை முறியடிக்க வாய்ப்பு உள்ளதாக கருதப்பட்டது.

ஆனால் கடந்த ஒரு வருடமாக அவரது ஆட்டத்தில் தொய்வு ஏற்பட்டது. இந்தியாவிற்கு எதிரான நான்கு டெஸ்டில் 7 இன்னிங்சில் பேட்டிங் செய்துள்ளார். ஆனால் ஒரு அரைசதம் கூட அடிக்கவில்லை. இந்நிலையில் இந்தியாவிற்கு எதிராக கடைசி டெஸ்ட் போட்டியோடு ஓய்வு பெறுவதாக அறிவித்துள்ளார். இதனால் சச்சின் தெண்டுல்கரின் சாதனையை துரத்திக் கொண்டிருந்த அச்சுறுத்தல் முடிவிற்கு வந்துள்ளது.



ரிக்கி பாண்டிங் 13378 ரன்களுடன் 2-வது இடத்திலும், கல்லீஸ் 13289 ரன்களுடன் 3-வது இடத்திலும், ராகுல் டிராவிட் 13288 ரன்களுடன் 4-வது இடத்திலும், சங்ககரா 12400 ரன்களுடன் 5-வது இடத்திலும் உள்ளனர். கடைசி டெஸ்டில் 147 ரன்கள் அடித்தால் சங்ககராவை பின்னுக்குத் தள்ளி 5-வது இடத்தை பிடிப்பார்.