ராய்பூர்:
மேலாதிக்கவாதிகளின் அடக்குமுறைகளால் பாதிக்கப்படும் கீழ்த்தட்டு மக்களில் சிலர் இருவர்க்கத்துக்கும் இடையிலான இடைவெளியை குறைப்பதற்கு ஆயுத வன்முறையே சிறந்த தீர்வென கருதுகின்றனர்.
பல்லாண்டு காலமாக அரசிடம் போராடி பெறமுடியாத சில சலுகைகளையும் ஆயுதப் புரட்சியின்மூலம் அடைந்துவிட முடியும் என கருதும் இவர்கள் சத்தீஸ்கர், ஒடிசா, ஆந்திரா, மணிப்பூர் உள்ளிட்ட சில மாநிலங்களில் நக்சலைட்களாகவும், மாவோயிஸ்ட்களாகவும், நாடெங்கிலும் உள்ள காடு, மலைகளில் பதுங்கி வாழ்ந்து வருகின்றனர்.
இவர்களை வேட்டையாட தனிப்படை பிரிவினர் தொடர்ந்து தேடுதல் பணியில் ஈடுபட்டு வருகின்றனர். இந்த படையினருக்கு துணையாக மத்திய ரிசர்வ் மற்றும் மாவட்டங்களை சேர்ந்த போலீஸ் படையினரும் உடன் செல்வதுண்டு.
இந்நிலையில், சத்தீஸ்கர் மாநிலம், நாராயன்பூர் மாவட்டத்தில் உள்ள குமியபேடா கிராமத்தில் சில நக்சலைட்கள் பதுங்கி இருப்பதாக ரகசிய தகவல் கிடைத்தது. இதையடுத்து, ரிசர்வ் படையினர் அந்த கிராமத்தை இன்று முற்றுகையிட்டு இன்று தேடுதல் பணியில் ஈடுபட்டனர்.
அப்போது, ரிசர்வ் படையினரை நோக்கி மறைந்திருந்த நக்சலைட்கள் துப்பாக்கியால் சுட்டதில் இருதரப்பினருக்கும் இடையே கடுமையான துப்பாக்கி சண்டை நடந்தது, இதில் நக்சலைட்கள் 4 பேர் சுட்டுக்கொல்லப்பட்டதாக நாரான்பூர் போலீஸ் எஸ்.பி சுக்லா கூறினார்
சுட்டுக்கொள்ளப்பட்ட 4 பேரில் ஏற்கெனவே தலைக்கு ரூ.2 லட்சம் பரிசு அறிவிக்கப்பட்டவர்கள் இரண்டு பேர் அடக்கம் என அவர் மேலும் தெரிவித்தார். #ChhattisgarhNaxals
