சென்னை:
பிரதமர் நரேந்திர மோடி இன்று மாலை சென்னை, நேரு உள் விளையாட்டு அரங்கத்தில் 44-வது சர்வதேச சதுரங்கப் போட்டியினை தொடங்கி வைக்க உள்ளார்.
இத்தொடக்க விழா நிகழ்ச்சிக்கு வருகை தந்து சிறப்பிக்குமாறு பல்வேறு மாநில முதல்-அமைச்சர்களுக்கு தமிழ்நாடு முதல்-அமைச்சர் சார்பில் அமைச்சர்கள், பாராளுமன்ற, சட்டமன்ற உறுப்பினர்கள் நேரில் சென்று அழைப்பிதழ் வழங்கினார்கள்.
கேரள மாநில முதல்-அமைச்சர் பினராயி விஜயன், அருணாச்சல பிரதேச முதல்-அமைச்சர் பெமா காண்டு, சிக்கிம் மாநில முதல்-அமைச்சர் பிரேம் சிங் தமாங் ஆகியோர் இச்சர்வதேச சதுரங்க போட்டி சிறப்பாக நடைபெற தங்களது வாழ்த்துகளை தெரிவித்து தமிழ்நாடு முதல்-அமைச்சருக்கு கடிதம் எழுதியுள்ளனர்.
மேலும், கர்நாடக மாநில முதல்-அமைச்சர் பசவராஜ் பொம்மை, தமிழ்நாடு முதல்-அமைச்சரை தொலைபேசி வாயிலாக தொடர்புகொண்டு சர்வதேச சதுரங்க போட்டி சிறப்பாக நடைபெற தனது வாழ்த்துகளை தெரிவித்தார்.
மத்திய பிரதேச முதல்-அமைச்சர் சிவ்ராஜ் சிங் சவுகான், தெலுங்கானா மாநில முதல்-அமைச்சர் சந்திரசேகர் ராவ், அரியானா மாநில முதல-அமைச்சர் மனோகர் லால் ஆகியோர் சமூக வலைத்தளங்கள் மூலம் இச்சர்வதேச சதுரங்க போட்டி சிறப்பாக நடைபெற தங்களது வாழ்த்துகளை தெரிவித்துள்ளனர்.
