ஈரோடு

ஈரோடு:

மொடக்குறிச்சி அடுத்த பஞ்சலிங்க புரத்தைச் சேர்ந்தவர் வரதராஜன் (வயது 63). ஓய்வு பெற்ற ரெயில்வே ஊழியர். நேற்று வரதராஜன் தனது மோட்டார் சைக்கிளில் ஈரோடுக்கு வந்தார். பின்னர் பணியை முடித்துக்கொண்டு பஞ்சலிங்கபுரம் நோக்கி சென்று கொண்டிருந்தார். ஆனைக்கல்பாளையம் பிரிவு அருகே வந்து கொண்டிருந்தபோது எதிரே ஒரு லாரி வந்தது.

அப்போது எதிர்பாராத விதமாக வரதராஜன் நிலை தடுமாறி கீழே விழுந்தார். இதில் லாரியின் பின்பக்க சக்கரம் அவர் தலை மீது ஏறி இறங்கியது. இதில் சம்பவ இடத்திலேயே வரதராஜன் தலை நசுங்கி பரிதாபமாக இறந்தார்.

இது குறித்து தாலுகா போலீசாருக்கு தகவல் தெரிவிக்கப்பட்டது. சம்பவ இடத்துக்கு விரைந்து வந்த போலீசார் அவரது உடலை மீட்டு பிரேத பரிசோதனைக் காக ஈரோடு அரசு ஆஸ்பத்திரிக்கு அனுப்பி வைத்தனர். மேலும் இதுகுறித்து வழக்குப்பதிவு செய்து விசாரணை மேற்கொண்டு வருகின்றனர். 

ஈரோடு:

இந்திய கம்யூனிஸ்ட் கட்சியின் தேசிய செயற்குழு உறுப்பினர் தா .பாண்டியன் ஈரோட்டில் நிருபர்களுக்கு பேட்டி அளித்தார். அப்போது அவர் கூறியதாவது:-

மத்திய - மாநில அரசுகள் மத்திய பட்ஜெட்டை சமர்ப்பித்து உள்ள நிலையில் இவற்றுக்கு வருமானம் எங்கிருந்து வருகிறது என்பதை சொல்ல வில்லை. மத்திய அரசு பட்ஜெட் ஊக்கம் நம்பிக்கை தரும் பட்ஜெட்டாக இருந்திருந்தால் பங்கு சந்தையில் ஏற்றம் இருந்திருக்கும்.

மத்திய அரசு அறிவித்த பட்ஜெட் தினம் முதல் பங்கு சந்தை தொடர்ந்து சரிவை சந்தித்து வருகிறது. அமெரிக்காவின் 51-வது மாநிலமாக இந்தியாவை மாற்ற மத்திய அரசு முயற்சி செய்து வருகிறது.

உலக மையம் கொள்கை படி எங்கு வேண்டுமானாலும் தொழில் தொடங்கலாம்.

ஆனால் அமெரிக்கா நான் சொல்லும் நாடுகளுடன் தான் பொருளாதார வைத்து கொள்ள வேண்டும் என வற்புறுத்தி வருகிறது. இதனால் இந்தியா கச்சா எண்ணைய் குறைந்த இடத்தில் வாங்கி வரும் ஒப்பந்தத்தை கைவிட்டு அமெரிக்கா நிர்பந்தத்தில் அதிக அளவில் கச்சா எண்ணெய் விற்பனை செய்யும் இடத்தில் ஒப்பந்தம் போட்டு உள்ளது. இதன்மூலம் அயல்நாட்டு நேர் முதலீடு இந்தியாவில் இருந்து வெளிநாடுகளுக்கு திரும்பிச் செல்கிறது. கிட்டத்தட்ட பட்ஜெட் அறிவித்த பிறகு ஒரே நாளில் 2 லட்சத்து 30 ஆயிரம் கோடி வெளிநாடுகளுக்கு சென்று உள்ளது. இதன் மூலம் பிரகடனம் செய்யாத வணிக போரை அமெரிக்கா நடத்திக் கொண்டிருக்கிறது. டிரம்புக்கு எதிராக வணிக போர் நடத்தும் சக்தி இந்தியாவுக்கு இல்லை.

பெட்ரோல் டீசல் விலை உயர்வு அனைத்து தரப்பு மக்களை பாதிக்கும்

விவசாயிகள் பாதிக்கும் திட்டத்தை பெரும்பான்மை கொண்டு நிறைவேற்றியதால் அனைத்து பகுதிகளிலும் மக்கள் போராட்டத்தை தொடங்கவுள்ளனர்.

நீட் தேர்வு, ராஜீவ் காந்தி கொலை வழக்கில் 7 பேர் கைது போன்ற நடவடிக்கைகளில் தமிழக அரசு மத்திய அரசுக்கு அடிபணிந்து செல்கிறது.

இவற்றிக்கு தீர்வு கிடைக்க இடதுசாரி அமைப்புகள் முன்னெடுத்து செல்லும்.

கீழடி அகழ்வாராய்ச்சி மையத்தில் பணி புரிவோருக்கு இந்தியில் தேர்வு, தபால் துறையில் மத்திய அரசு ஆங்கிலம், இந்தி மொழியில் தேர்வு நடத்தப்படும் என்ற அறிவித்து உள்ளது தமிழக அரசு தனது சுயமரியாதையை விட்டு கொடுத்து வருகிறது என்பதை காட்டுகிறது.

இவர் அவர் கூறினார்.

சென்னிமலை:

ஈரோடு மாவட்டம் பெருந்துறை அருகே உள்ள காஞ்சிக்கோவிலை சேர்ந்தவர் முருகானந்தம் (வயது 27). இவர் பைக் மெக்கானிக். இவரது உறவினர் சென்னிமலை அடுத்துள்ள நாமக்கல் பாளையம் ரோடு, எம்.ஜி.ஆர். நகரை சேர்ந்தவர் நவீன்அரசி (20). பி.காம் பட்ட வகுப்பு முடித்துள்ளார்.

இருவருக்கும் இவர்களது பெற்றோர் மாமன், அத்தை உறவாகும். இதனால் இருவரும் பல ஆண்டுகளாக பழகி வந்தனர். பின்னர் அது காதலாக மாறியது. இந்த நிலையில் இவர்கள் இருவருக்கும் திருமணம் செய்ய இருவரது பெற்றோரும் முடிவு செய்தனர்.

இதன் பேரில் திருமண ஏற்பாடுகள் நடந்து வந்தது. இந்த நிலையில் இருவரது உறவினர்களிடையே ஏற்பட்ட பிரச்சனை காரணமாக நவீன் அரசியின் பெற்றோர் பெண் கொடுக்க மறுத்ததாக கூறப்படுகிறது. இதனால் திருமணம் நிற்கும் சூழல் ஏற்பட்டது.

இந்த நிலையில் பெற்றோரின் எதிர்ப்பை மீறி நவீன் அரசி வீட்டை விட்டு வெளியேறினார். இவரை காணவில்லை என அவரது பெற்றோர் தேடி வந்தனர். இந்த நிலையில் சத்தியமங்கலம் அருகில் உள்ள பண்ணாரி மாரியம்மன் கோவிலில் காதலர்கள் முருகானந்தம்- நவீன் அரசி இருவரும் மாலை மாற்றி திருமணம் செய்து கொண்டனர்.

பின்னர் பாதுகாப்பு கோரி சென்னிமலை போலீஸ் நிலையத்தில் திருமண ஜோடி தஞ்சம் அடைந்தனர். இதை அறிந்த இருவரின் உறவினர்களும் போலீஸ் நிலையத்தில் கூடியதால் அங்கு பரபரப்பு ஏற்பட்டது.

அங்கு போலீசார் இருவரின் பெற்றோர்களையும் சமாதானம் செய்ய அழைத்தனர். முருகானந்தத்தின் பெற்றோர் மட்டும் அங்கு வந்தனர். ஆனால், நவீன் அரசியின் பெற்றோர் அங்கு வர வில்லை.

இதனால் நீண்ட நேரம் அங்கு காத்திருந்த திருமண ஜோடி மற்றும் உறவினர்கள் செய்வதறியாது திகைத்தனர். போலீசார் அவர்களை சமாதானம் செய்து மணமகனுடன் நவீன் அரசியை அனுப்பி வைத்தனர்.

சூரம்பட்டி:

கர்நாடகாவில் காங்கிரஸ் மதசார்பற்ற ஜனதா தள கூட்டணி ஆட்சியை கவிழ்க்க முயற்சி செய்யும் பாரதிய ஜனதா கட்சியை கண்டித்து தமிழகம் முழுவதும் இன்று ஆர்ப்பாட்டம் நடைபெறும் என்று காங்கிரஸ் கட்சி அறிவித்து இருந்தது.

அதன்படி இன்று ஈரோடு மாநகர மாவட்ட காங் கிரஸ் கட்சி சார்பில் சூரம்பட்டி சரகத்துக்கு உட்பட்ட காளைமாடு சிலை அருகே ஆர்ப்பாட்டம் நடந்தது.

முன்னாள் மாவட்ட தலைவர் ராஜேந்திரன் தலைமையில் நடந்த இந்த ஆர்ப்பாட்டத்தில் மண்டல தலைவர் ஜாபர் சாதிக் முன்னிலைவகித்தார் .

இதில் முன்னாள் துணை மேயர் பாபு, மண்டல தலைவர் திருச்செல்வம்,அயுப்அலி, விவசாய பிரிவு பெரியசாமி மற்றும் நிர்வாகிகள் சித்ரா விஸ்வநாதன், மாநகர் மாவட்ட மகிளா காங்கிரஸ் தலைவி புவனேஸ்வரி, சின்னசாமி கண்ணப்பன் முகமது அர்சத், விஜய் கண்ணா உள்பட பலர் கலந்து கொண்டனர். இந்த ஆர்ப்பாட்டத்தில் மத்திய அரசை கண்டித்து கண்டன கோ‌ஷம் எழுப்பப்பட்டது.

இதேபோன்று தெற்கு மாவட்ட காங்கிரஸ் சார்பில் மூலப்பாளையம், எல்.ஐ.சி நகரில் கர்நாடகாவில் காங்கிரஸ் மதசார்பற்ற ஜனதா தள கூட்டணி ஆட்சியை கவிழ்க்க முயற்சி செய்யும் பாரதிய ஜனதா கட்சியை கண்டித்து கண்டன ஆர்ப்பாட்டம் நடந்தது.

ஆர்ப்பாட்டத்திற்கு தெற்கு மாவட்ட காங்கிரஸ் தலைவர் மக்கள் ராஜன் தலைமை தாங்கினார். முன்னாள் எம்.எல்.ஏ ஆர். எம்.பழனிச்சாமி சிறப்பு அழைப்பாளராக கலந்து கொண்டார்.

முன்னாள் பொதுக்குழு உறுப்பினர் செங்குளம் பழனிச்சாமி, வட்டார தலைவர்கள் முத்துகுமார், கோபாலகிருஷ்ணன் ,ராவுத்குமார், முத்துசாமி, சர்வேஸ்வரன் ஆகியோர் முன்னிலை வகித்தனர்.

மாவட்ட இளைஞரணி காங்கிரஸ் தலைவர் தளபதி ரமேஷ், மகளிர் காங்கிரஸ் கலா, சிவகுமார், மாணவரணி காங்கிரஸ் பயாஸ், இளைஞரணி காங்கிரஸ் நிர்வாகிகள் பிரபு , அரிப் அலி, துணைத் தலைவர்கள் வாசுதேவன், காளிதாஸ் உள்பட பலர் கலந்து கொண்டனர். ஆர்ப்பாட்டத்தில் கலந்து கொண்டவர்கள் பாரதிய ஜனதா கட்சிக்கு எதிராக கோ‌ஷம் எழுப்பினர். 

ஈரோடு:

ஈரோடு சூளை பகுதி எல்.வி.ஆர். காலனியில் ரோட்டோரம் குப்பைகள் கொட்டப்பட்டு மலை போக்கு குவிந்து கிடக்கிறது.

இந்த குப்பைகளின் தூர்நாற்றத்தால் அப்பகுதி மக்கள் கடும் அவதிபட்டு வருகின்றார்கள்.

மேலும் காற்றில் இந்த குப்பைகள் பறந்து அலங்கோலமாக காட்சி அளிக்கிறது. மேலும் அந்த வழியாக இரு சக்கர வாகனங்களில் செல்வோர்களின் முகத்திலும் குப்பைகளின் கழிவுகள் பறக்கிறது. புழுதி மணலும் விழுந்து அவதிப்பட்டு வருகிறார்கள்.

இதனால் மலை போல் குவிந்து கிடக்கும் குப்பைகளை உடனடியாக அகற்ற நடவடிக்கை எடுக்க வேண்டும் என அப்பகுதி மக்கள் ஈரோடு மாநகராட்சியை கேட்டுக் கொண்டு உள்ளனர்.

ஈரோடு:

ஈரோடு மாவட்டத்தில் நேற்று முன்தினம் ஓரிரு இடங்களில் மட்டும் மழை பெய்தது.

இந்த நிலையில் நேற்று மாவட்டத்தில் பல பகுதிகளில் பரவலாக மழை பெய்தது. ஈரோடு பகுதியில் நேற்று மாலையில் இருந்து இரவு 8 மணி வரை விட்டு விட்டு சாரல் மழை பெய்தது. இதே போல் பெருந்துறை பவானி, கொடுமுடி, சென்னிமலை, மொடக்குறிச்சி, அரச்சலூர் மற்றும் சுற்று வட்டார பகுதிகளில் மழை பெய்தது.

மொடக்குறிச்சி மற்றும் அதன் சுற்று வட்டாரப் பகுதிகளில் அதிகப்பட்சமாக 30.6 மி.மீ மழை கொட்டியது. இதனால் பொதுமக்கள் விவசாயிகள் மகிழ்ச்சி அடைந்தனர்.

இதே போல் சென்னிமலை பகுதியில் 27.6 மி.மீ மழை பெய்தது. இந்த மழையால் மாவட்டத்தின் பல பகுதிகளில் வெப்பம் தணிந்தது. குளிர்ச்சியான நிலை நிலவியது.

பவானி சாகர் அணையின் நீர்பிடிப்பு பகுதியான நீலகிரி மலையில் பெய்த மழை காரணமாக அணைக்கு நீர்வரத்து அதிகரித்துள்ளது.