ஈரோடு

அந்தியூர்:

அந்தியூர் அருகே உள்ள குருநாதபுரத்தை சேர்ந்தவர் குமார். கூலி தொழிலாளி. இவர் விறகு அடுப்பில் சமையல் செய்தபின், நெருப்பை அணைக்காமல் சென்றதாக கூறப்படுகிறது.

சில மணிநேரங்களுக்கு பின்பு, அப்பகுதியில் வீசிய லேசான காற்று தீப்பிழம்புகள் அவரது கூரை வீடு மீது விழுந்துள்ளது. சிறிது நேரத்தில் கூரை வீடு தீப்பிடித்து எரிந்தது.

இதைப்பார்த்த அக்கம் பக்கத்தினர் அந்தியூர் தீயணைப்பு நிலையத்திற்கு தகவல் கொடுத்தனர். விரைந்து வந்த தீயணைப்பு நிலைய வீரர்கள் அரை மணி நேர போராட்டத்திற்கு பின் தீயை அணைத்தனர்.

ஈரோடு:

இயேசு கிறிஸ்து பாடுபட்டு சிலுவையில் உயிர்விட்ட நாள் புனித வெள்ளியாக உலகம் முழுவதும் கிறிஸ்தவர்களால் கடைபிடிக்கப்படுகிறது.

இதை முன்னிட்டு 40 நாட்கள் நோன்பு இருப்பது வழக்கம். இந்த நோன்பு காலம் தவக்காலம் என்று அழைக்கப்படுகிறது. தவக்காலத்தின் முதல் நாள் சாம்பல் புதன் அல்லது திருநீற்றுப் புதனாக கடைபிடிக்கப்படுகிறது. அதன்படி இன்று தவக்காலம் தொடங்கியது.

இதையொட்டி கிறிஸ்தவ தேவாலயங்களில் இன்று காலை சிறப்பு திருப்பலிகள் நிறைவேற்றப்பட்டன.

ஈரோடு புனித அமல அன்னை ஆலயத்தில் பங்குத்தந்தை ஜான் சேவியர் குழந்தை தலைமையில் சிறப்பு திருப்பலி நடந்தது.

தவக்காலம் தொடங்கியதன் அடையாளமாக கிறிஸ்தவர்களின் நெற்றியில் பங்குத்தந்தை சாம்பலால் சிலுவை அடையாளம் இட்டார். இந்த சாம்பல், கடந்த ஆண்டு குருத்தோலை திருநாளின் போது ஊர்வலமாக எடுத்துச்சென்று வீடுகளில் வைக்கப்பட்டு இருந்தவையாகும். அவற்றை சேகரித்து சுட்டு சாம்பலாக்கி நெற்றியில் பூச பயன்படுத்தப்பட்டது.

சாம்பல் நெற்றியில் பூசும்போது மனிதனே மண்ணாக இருக்கின்றாய் மண்ணுக்கே திரும்புவாய் என்று கூறி பங்குத்தந்தை ஒவ்வொருவரின் நெற்றியிலும் சிலுவை அடையாளம் வரைந்தார். இன்று மாலையும் திருப்பலி நடக்கிறது.

ஈரோடு:

ஈரோடு மாணிக்கம் பாளையம் நேதாஜி நகரைச் சேர்ந்தவர் கார்த்தி (வயது 31). மெக்கானிக். இவருக்கு திருமணமாகி விட்டது.

இந்நிலையில் 17 வயது சிறுமியுடன் கார்த்திக்கு பழக்கம் ஏற்பட்டது. அந்தத் சிறுமியை திருமணம் செய்வதாக ஆசைவார்த்தை கூறி கடந்த 15.1.2016-ல் பாலியல் பலாத்காரம் செய்தார். இது தொடர்பாக சிறுமியின் பெற்றோர் ஈரோடு அனைத்து மகளிர் காவல் நிலையத்தில் புகார் செய்தனர். ஈரோடு மகளிர் போலீசார் வழக்குபதிவு செய்து கார்த்தியை கைது செய்தனர்.

இந்த வழக்கு ஈரோடு மகளிர் கோர்ட்டில் நடந்து வந்தது. வழக்கை விசாரித்து வந்த நீதிபதி மாலதி இன்று தீர்ப்பு அளித்தார். அதில் மெக்கானிக் கார்த்திக்குக்கு 20 ஆண்டு சிறை தண்டனையும், ரூ.25,000 அபராதம் விதித்து தீர்ப்பு வழங்கினார். அபராத தொகையை கட்ட தவறினால் மேலும் 3 மாத சிறை தண்டனை விதித்து தீர்ப்பளித்தார். மேலும் பாதிக்கப்பட்ட சிறுமிக்கு தமிழக அரசு ரூ.1.25 லட்சம் இழப்பீடாக வழங்க பரிந்துரை செய்தார். அரசு தரப்பில் வக்கீல் சுமதி ஆஜரானார்.

சத்தியமங்கலம்:

சத்தியமங்கலம் புலிகள் காப்பகத்தில் ஏராளமான காட்டு விலங்குகள் உள்ளன இதில் யானை மான் புலி சிறுத்தை என பல்வேறு விலங்குகள் உள்ளன.

இந்நிலையில் சத்தியமங்கலம் அடுத்துள்ள மேட்டூர் பகுதியில் இன்று அதிகாலையில் வேலை முடித்து விட்டு வீட்டிற்கு வந்த மகேந்திரன் என்பவர் வரும் வழியில் ஒரு சிறுத்தை தென்னை மரத் தோட்டம் பகுதியில் ரோட்டை கடந்து செல்வதை பார்த்து அதிர்ச்சி அடைந்துள்ளார்.

பிறகு வாழைத் தோட்டத்திற்குள் புகுந்து சிறுத்தை செல்வதை பொதுமக்கள் பார்த்துள்ளனர் உடனே தகவலை சத்தியமங்கலம் வனத்துறையினரிடம் கூறியுள்ளனர்.

சத்தியமங்கலம் வனச்சரகர் பெர்னார்ட் தலைமையில் 10 பேர் கொண்ட குழு தென்னைமர தோட்டத்தை ஆய்வு செய்தனர்.

சிறுத்தை கால் தடங்களை ஆய்வு செய்து இது சிறுத்தையா? அல்லது புலியா என தெரியவில்லை என்று கூறினர் மேலும் இதை கண்காணிக்க தென்னை மரத் தோட்டம் மற்றும் வாழைத்தோட்டத்தில் 8 தானியங்கி கேமரா பொருத்தப்பட்டுள்ளது.

கேமராவின் மூலம் பதிவானால் கூண்டு வைத்து பிடிக்க நடவடிக்கை எடுக்கப்படும் என ஊர் பொதுமக்களிடம் கூறினார்.

இந்நிலையில் நேற்று இரவு 10 மணி அளவில் ஒரு சிறுத்தை சசத்தியமங்கலம் அருகே அரியப்பம் பாளையத்தில் சத்தி- கோபி மெயின் ரோடு வழியில் கடந்து செல்வதை அங்கிருந்த கடைகளில் சிசிடிவி கேமரா மூலம் பதிவாகி இருந்தது பீதியை ஏற்படுத்தி உள்ளது.

சிறுத்தை ரோட்டை கடந்து செல்லும் பகுதியில் வனப்பகுதி எதுவும் கிடையாது. அப்படி இருந்தும் அந்த சிறுத்தை எப்படி ஊருக்குள் புகுந்தது? என அந்த பகுதி மக்கள் மிகவும் அச்சத்துடன் உள்ளனர்.

கரும்பு காடு வயல் வெளியில் தப்பி தவறி வந்து ஊருக்குள் சிறுத்தை புகுந்திருக்க கூடும் என சத்தியமங்கலம் நகர மக்கள் பரபரப்பாக பேசி கொள்கிறார்கள்.

இதே போல் இன்று (செவ்வாய்க்கிழமை) அதிகாலை 5.30 மணி அளவில் சத்தி அடுத்த பாச குட்டை என்ற இடத்தில் கோபால் என்பவருக்கு சொந்தமான சோள தோட்டம் உள்ளது. தோட்டத்தில் இருந்த ஒரு கன்று குட்டியை சிறுத்தை ஒன்று இழுத்து காட்டு பகுதிக்குள் கொண்டு சென்று தின்று விட்டது.

இந்த சம்பவத்தை அறிந்து சத்தி நகர மக்கள் கடும் பீதியில் உறைந்துள்ளனர். இப்படி ஒரே சமயத்தில் சத்தியமங்கலம் ஊருக்குள் 2 சிறுத்தைகள் புகுந்துள்ள சம்பவம் பெரும் பரபரப்பையும் அச்சத்தையும் ஏற்படுத்தி உள்ளது.