ஈரோடு

பெருந்துறை:

பெருந்துறையை அடுத்துள்ள துடுப்பதி கவுண்டன் பாளையம் பகுதியில் ஒரு தனியார் என்ஜினீயரிங் கல்லூரி செயல்பட்டு வருகிறது.

இந்த கல்லூரியின் மெயின் பிளாக்கிற்கு பின் பகுதியில் 2-வது தளத்தில் உள்ள கம்ப்யூட்டர் அறையில் இருந்து கரும் புகை வந்தது. அங்கு சென்று பார்த்த போது கம்ப்யூட்டர்கள் தீப் பிடித்து எரிவது தெரியவந்தது. இது தொடர்பாக பெருந்துறை தீயணைப்புத் துறையினருக்கு தகவல் தெரிவிக்கப்பட்டது.

சம்பவ இடத்திற்கு விரைந்து வந்த தீயணைப்பு நிலைய அலுவலர் வேலுச்சாமி தலைமையிலான தீய ணைப்பு வீரர்கள் சுமார் ஒரு அரைமணி நேரம் போராடி தீயை அணைத்தனர்.

எனினும் இந்த தீ விபத்து ஏற்பட்ட அறையில் இருந்த 8 கம்ப்யூட்டர்கள், மேற்கூரையின் சீலிங், ஏசி மெஷின் உள்ளிட்ட பொருட்கள் எரிந்து நாசமானது.

ஏசி மெஷினில் ஏற்பட்ட மின் கசிவே இந்த தீ விபத் திற்கு காரணமாக இருக்கக் கூடும் என தெரிகிறது. இது தொடர்பாக விசாரணை நடக்கிறது.

ஈரோடு:

பொங்கல் பண்டிகையையொட்டி ஏழை எளிய மக்களுக்கு ஆண்டுதோறும் ரேசன் கடைகள் மூலம் இலவச வேட்டி-சேலைகள் வழங்கப்பட்டு வருகின்றன.

இந்த ஆண்டு ரேசன் கார்டுதாரர்களுக்கு வழங்குவதற்காக வேட்டி-சேலைகள் உற்பத்தி செய்யும் பணிகள் நடந்து வருகிறது.

இதற்காக ஆய்வு கூட்டம் ஈரோடு கலெக்டர் அலுவலகத்தில் பள்ளி கல்வித்துறை அமைச்சர் செங்கோட்டையன், சுற்றுச் சூழல் துறை அமைச்சர் கருப்பணன், கைத்தறி மற்றும் துணிநூல் துறை அமைச்சர் ஓ.எஸ். மணியன், கலெக்டர் பிரபாகர் தலைமையில் இன்று நடந்தது.

மாவட்ட வருவாய் அதிகாரி கவிதா எம்.எல்.ஏ.க் கள் தென்னரசு, ராஜா கிருஷ்ணன் உள்பட பலர் கலந்து கொண்டனர்.

விலையில்லா வேட்டி சேலை வழங்கும் திட்டம் ஆண்டுதோறும் சிறப்பாக செயல்படுத்தப்பட்டு வருகிறது. வரும் ஆண்டில் பொங்கல் பண்டிகைக்கு சுமார் 1.63 கோடி பயனாளிகளுக்கு இலவச வேட்டி, சேலைகள் வழங்கப்படவுள்ளது.

அதன்படி ஈரோட்டில் 45, திருச்செங்கோட்டில் 53, திருப்பூரில் 16, கோவையில் 12 என மொத்தம் 126 விசைத்தறி கூட்டுறவு சங்கங்களின் மூலம் உற்பத்தி செய்யப்படுகிறது.

ஈரோடு மாவட்டத்தில் 61 லட்சத்து 27 ஆயிரத்து 600 சேலைகளும், 62 லட்சத்து 39 ஆயிரத்து 100 வேட்டிகளும், திருச்செங்கோட்டில் 43 லட்சத்து 11 ஆயிரத்து 650 சேலைகளும், 61 லட்சத்து 45 ஆயிரத்து 500 வேட்டிகளும், கோவை மாவட்டத்தில் 11 லட்சத்து 49 ஆயிரத்து 200 சேலைகளும், 8 லட்சத்து 61 ஆயிரத்து 100 வேட்டிகளும், திருப்பூர் மாவட்டத்தில் 5 லட்சத்து 21 ஆயிரம் சேலைகளும், 5 லட்சத்து 81 ஆயிரத்து 500 வேட்டிகளும் என மொத்தம் 1 கோடியே 21 லட்சத்து 9 ஆயிரத்து 450 சேலைகளும், 1 கோடியே 38 லட்சத்து 27 ஆயிரத்து 200 வேட்டிகளும் உற்பத்தி செய்யப்படவுள்ளது.

தற்போது விசைத்தறி சங்கங்கள் மூலம் 81 சதவீத சேலைகளும், 100 சதவீதம் வேட்டிகளும் உற்பத்தி செய்யப்பட்டுள்ளன. இருப்பிலுள்ள வேட்டி சேலைகள் 11.1.2018-க்குள் பயனாளிகளுக்கு வழங்குவதற்கு ஏதுவாக, கொள்முதல் முகமை நிறுவனங்களுக்கு உடனடியாக அனுப்பி வைக்கப்படுகிறது.

இவ்வாறு அமைச்சர் ஓ.எஸ்.மணியன் கூறினார்.

அமைச்சர் செங்கோட்டையன் கூறும்போது, ‘‘தமிழகத்தில் 100 போட்டி தேர்வு மையங்கள் திறக்கப்பட்டு உள்ளது. இன்னும் 312 தேர்வு மையங்கள் ஜனவரி மாத இறுதிக்குள் திறக்கப்படும்’’ என்றார்.

ஈரோடு:

டி.டி.வி.தினகரன் ஆதரவாளரும் கர்நாட மாநில அ.தி.மு.க. அம்மா அணி செயலாளருமான புகழேந்தி ஈரோட்டில் மாலைமலர் நிருபரிடம் கூறியதாவது:-

அம்மா ஜெயலலிதா ஆஸ்பத்திரியில் சிகிச்சை பெற்று வந்த வீடியோ தற்போது வெளியிடப்பட்டு உள்ளது. இது வெற்றிவேலுவின் தனிப்பட்ட முயற்சி. இதில் எங்கள் துணை பொதுச்செயலாளர் தினகரனுக்கும் அந்த வீடியோவுக்கும் எந்தவித சம்பந்தமும் கிடையாது.

மதுரையில் நடந்த கண்டன ஆர்ப்பாட்டத்தில் என்றாவது ஒருநாள் அம்மா சிகிச்சை பெறும் வீடியோ வெளியே வரும் என்று தெரிவித்தேன். அண்ணன் டி.டி.வி.தினகரனிடம் இதுபற்றி நான் கூறி அம்மா சிகிச்சை பெற்று வரும் வீடியோவை வெளியிட்டால் நன்றாக இருக்கும் என்று கூறினேன். தினகரன் அவ்வாறு அம்மா ஆஸ்பத்திரியில் சிகிச்சை பெற்று வரும் வீடியோவை வெளியிட்டு மலிவான அரசியலை நடத்த வேண்டாம் என்று தெரிவித்தார். ஆகவே அண்ணன் தினகரனுக்கு அந்த வீடியோவுக்கும் எந்தவித சம்பந்தமும் கிடையாது. முழுக்க முழுக்க வெற்றிவேலுவின் தனிப்பட்ட முயற்சி இது.

அம்மாவை கொன்று விட்டார்கள், காலை வெட்டி விட்டார்கள் என்றெல்லாம் சின்னம்மா சசிகலா மீது பழியை போட்டார்கள். இப்போது இந்த வீடியோ வெளியிட்ட தன் மூலம் அம்மாவை சின்னம்மா சசிகலா கண்ணும் கருத்துமாக எப்படியெல்லாம் பார்த்துக் கொண்டார் என்பதற்கு சாட்சி ஆகும். இந்த வீடியோ மூலம் பழி போட்டவர்கள் எல்லாம் இப்போது வெட்கி தலைகுனிய வேண்டும். இப்போது தெளிவாகி உள்ளது. சின்னம்மா மீது சுமத்தப்பட்ட களங்கம் துடைக்கப்பட்டிருக்கிறது. சின்னம்மா சசிகலா மீது பொதுமக்களுக்கு குறிப்பாக பெண்களுக்கும் ஒரு மரியாதை ஏற்பட்டு இருக்கிறது. இப்பவும் சொல்கிறேன் அம்மா சிகிச்சை பெற்ற வீடியோவுக்கும் தினகரனுக்கும் எந்த சம்பந்தமும் கிடையாது.

இவ்வாறு புகழேந்தி கூறினார்.

ஈரோடு:

ஈரோடு ரெயில்நிலையத்தில் ரெயில்வே போலீசார் பாதுகாப்பு பணியில் ஈடுப்பட்டனர். அப்போது ஒரு வாலிபர் சந்தேகப்படும்படி திரிந்து கொண்டு இருந்தார். அவரை பிடித்து விசாரணை மேற்கொண்டனர். விசாரணையில் அந்த வாலிபர் திருப்பூர் மாவட்டம் பழவஞ்சி பாளையம், குமரன் காலனியை சேர்ந்த சிங்கராஜி(வயது38) என தெரிய வந்தது.

சிங்கராஜி ரெயிலில் செல்லும் பயணிகளிடம் செல்போனை திருடுவதை தொழிலாக வைத்துள்ளான். அவனிடம் இருந்து 2 திருட்டு செல்போன்கள் பறிமுதல் செய்யப்பட்டது. இதையடுத்து ரெயில்வே போலீசார் வழக்கு பதிவு செய்து மேலும் விசாரணை நடத்தி வருகிறார்கள்.

ஈரோடு:

ஈரோடு சிந்தானந்த நகரை சேர்ந்தவர் முகமது ரசூல் (வயது 25). இவர் ஈரோடு பெருந்துறை ரோட்டில் உள்ள தனியார் டயர் கம்பெனியில் வேலை பார்த்து வருகிறார்.

அதே நிறுவனத்தில் ஈரோடு சங்குநகரை சேர்ந்த சுமிதா என்பவரும் வேலை பார்த்து வருகிறார். இன்று காலை முகமதுரசூல் தனது மோட்டார் சைக்கிளில் வேலைக்கு வந்து கொண் டிருந்தார்.

அவருடன் சுமிதாவும் வந்தார். வண்டியை முகமது ரசூல் ஓட்ட பின்னால் சுமிதா உட்கார்ந்து வந்தார்.

குமலன்குட்டை பஸ் நிறுத்தம் அருகே வந்த போது முகமதுரசூல் பின்னால் வந்த கார் ஒன்று எதிர்பாராத வகையில் மோட்டார் சைக்கிள் மீது மோதியது.

இதில் நிலை தடுமாறி முகமது ரசூல், சுமிதா இருவரும் கீழே விழுந்தனர். இதில் இருவருக்கும் பலத்த காயம் ஏற்பட்டது. இது குறித்து சூரம்பட்டி போலீசாருக்கு தகவல் தெரிவிக்கப்பட்டது.

அவர்கள் சம்பவ இடத்துக்கு விரைந்து சென்று இருவரையும் மீட்டு சிகிச்சைக்காக ஈரோட்டில் தனியார் ஆஸ்பத்திரிக்கு அனுப்பி வைத்தனர். பின்னர் மேல் சிகிச்சைக்காக ஈரோடு அரசு ஆஸ்பத்திரிக்கு கொண்டு வந்தனர்.

அங்கு அவர்களுக்கு தீவிர சிகிச்சை அளிக்கப்பட்டு வருகிறது. இது குறித்து சூரம்பட்டி போலீசார் வழக்குபதிவு செய்து விசாரணை நடத்தி வருகிறார்கள்.

ஈரோடு:

ஈரோடு மாவட்ட கலெக்டர் அலுவலகத்தில் வாரம் தோறும் திங்கட்கிழமை மக்கள் குறை கேட்பு நாள் கூட்டம் நடந்து வருகிறது. நூற்றுக்கணக்கான பொது மக்கள் கலெக்டரை சந்தித்து மனுக்கள் கொடுத்து வருகிறார்கள்.

கடந்த சில மாதமாக கோரிக்கைகளை வலியுறுத்தி மனு கொடுக்க வருபவர்கள் திடீரென தற்கொலைக்கு முயன்று வருகிறார்கள். உடலில் மண் எண்ணை ஊற்றி தீக்குளிக்க முயல்வது, வி‌ஷம் குடிக்க முயல்வது, மேலும் கையை அறுப்பது போன்ற விபரீத சம்பவங்களிலும் ஈடுபட்டு வருகிறார்கள்.

இது போன்ற சம்பவங்கள் ஈரோடு மாவட்ட கலெக்டர் அலுவலகம் முன் தொடர்ந்து நடந்து வருவது வாடிக்கையாகியும் விட்டது.

இதனால் மக்கள் குறை கேட்பு முகாமில் இப்போது பலத்த போலீஸ் பாதுகாப்பும் போடப்பட்டு வருகிறது. இதையும் மீறி தற்கொலை முயற்சி சம்பவங்கள் நடந்து கொண்டு தான் வருகிறது. இப்படி தற்கொலை முயற்சியில் ஈடுபடுபவர்கள் மீது கடும் நடவடிக்கை எடுக்கப்படும் என போலீசாரும் எச்சரித்துள்ளனர்.

இந்த நிலையில் நேற்று ஈரோடு மாவட்ட கலெக்டர் அலுவலகத்தில் குறை கேட்பு கூட்டம் நடந்த போது 4 பேர் தற்கொலை செய்ய முயற்சி செய்துள்ளனர்.

ஈரோடு மக்கள் மன்ற அமைப்பாளர் செல்லப்பன் மற்றும் அகில இந்திய மக்கள நலக்கழக தலை வர் டி.கே.பழனிசாமி ஆகியோர் அரசு பள்ளிகளில் கட்டணத்தை குறைக்க கோரி மனு கொடுக்க வந்தனர்.

அப்போது அவர்கள் மண்எண்ணை கேனுடன் வந்து தீக்குளிக்க முயன்றனர். அப்போது பாதுகாப்பு பணியில் ஈடுபட்டு இருந்த போலீசார் 2 பேரையும் கைது செய்தனர்.

இதே போல் சத்தியமங்கலம் அடுத்த கொமரபாளையத்தை சேர்ந்த ரஞ்சித்குமார் (28) என்ற வாலிபர் தனது வீட்டு மனை பட்டாவை கிராம கணக்கில் பதிவு செய்யக்கோரி தனது கையை கத்திரிகோலால் வெட்டிஅறுத்து கொண்டு வந்தார்.

தற்கொலை மிரட்டல் விடுத்த இவரையும் போலீசார் கைது செய்தனர்.

மேலும் ஈரோடு அடுத்த கஸ்பாபேட்டையை சேர்ந்த சங்கர் (35) என்பவர் வீட்டு மனை பட்டா கேட்டு உடலில் மண் எண்ணை ஊற்றி தீக்குளிக்க முயன்றார்.

இவரையும் போலீசார் சுற்றி வளைத்து கைது செய்தனர். இப்படி ஒரே நாளில் கலெக்டர் அலுவலகம் முன் தற்கொலைக்கு முயன்ற 4 பேர் கைது செய்யப்பட்ட சம்பவம் கலெக்டர் அலுவலகத்தில் பரபரப்பை ஏற்படுத்தியது.

கைது செய்யப்பட்ட 4 பேரும் கோர்ட்டில் ஆஜர்படுத்தப்பட்டனர். இவர்களை 15 நாள் காவலில் வைக்க நீதிபதி உத்தரவிட்டார்.

இதை தொடர்ந்து 4 பேரும் ஜெயிலில் அடைக்கப்பட்டனர்.