ஈரோடு

கோபி:

கோபி அடுத்த சந்திரா புரத்தை சேர்ந்தவர் மும்மூர்த்தி மில் தொழிலாளி இவரது மனைவி பெயர் பிரபா (வயது 22).

பிரபாவுக்கும் கணவரின் தாயார் (மாமியார்) சரசம்மாளுக்கும் இடையே அடிக்கடி குடும்ப தகராறு இருந்து வந்ததாக கூறப்படுகிறது.

இதனால் பிரபா வேதனையில் இருந்ததாக கூறப்படுகிறது. இந்த நிலையில் வீட்டில் இருந்த பிரபா தனது துப்பட்டாவால் விட்டத்தில் தூக்குப்போட்டு தற்கொலை செய்து கொண்டார்.

இது பற்றி சிறுவலூர் போலீசார் வழக்கு பதிவு செய்து விசாரணை நடத்தி வருகிறார்கள். மேலும் திருமணமாகி 3 ஆண்டுகளே ஆவதால கோபி ஆர்.டி.ஓ கோவிந்தராஜனும், துணை போலீஸ் சூப்பிரண்டு செல்வமும் விசாரித்து வருகிறார்கள். #tamilnews

பெருந்துறை:

ஈரோடு, டீச்சர்ஸ் காலனி பகுதியை சேர்ந்த அமுதா (வயது 55). பெருந்துறை சார் பதிவாளராக பணிபுரிந்து வந்தார்.

கடந்த ஆண்டு நவம்பர் மாதம் 30-ந் தேதி அலுவலக வாசல் முன்பாக ஒரு நபர் மோட்டார் சைக்கிளில் வந்தார். அவரிடம் அமுதா பணம் பெற்றார்.

அப்போது அங்கு மறைந்திருந்த ஈரோடு லஞ்ச ஒழிப்பு மற்றும் கண்காணிப்புத்துறை அதிகாரிகளால் கையும் களவுமாக பிடிபட்டார். அவரிடமிருந்து ரூ. 45 ஆயிரம் பணம் கைப்பற்றப்பட்டது.

மேலும் லஞ்ச ஒழிப்புத்துறை போலீசார் அவர் மீது 2 வழக்குப்பதிவு செய்தனர். இதனையடுத்து பத்திரப்பதிவுத்துறை உயர் அதிகாரிகளின் ஆலோசனையின் பேரில் பெருந்துறை சார் பதிவாளர் அமுதா கட்டாய விடுப்பில் சென்றார்.

கடந்த ஒருமாதத்திற்கும் மேலாக விடுப்பில் இருந்து வந்த அவர் கடந்த 15 நாட்களுக்கு முன்னர் மீண்டும் பணியில் சேர்ந்தார்.

இந்த நிலையில் அவர் பணியிட மாற்றம் செய்யப்பட்டு உள்ளார். தற்போது அவர் கரூர் மாவட்ட சிட் பண்ட் நிறுவனங்களின் பதிவாளராக பணியிட மாற்றம் செய்யப்பட்டுள்ளார். #tamilnews

ஈரோடு:

ஈரோடு சம்பத்நகரை சேர்ந்தவர் வெங்கடேஸ் (வயது37). ஜவுளி வியாபாரி. இவரது மனைவி சாகிராபானா (32).இவர்கள் 2 பேரும் காதலித்து திருமணம் செய்து கொண்டனர். பிபீகா என்ற மகள் உள்ளார்.

வெங்கடேஷ்சுக்கு குடி பழக்கம் உண்டாம். இதனால் கணவன்- மனைவி இடையே அடிக்கடி தகராறு ஏற்பட்டு உள்ளது. இந்நிலையில் மீண்டும் கணவன்-மனைவிக்குள் தகராறு வந்ததாக கூறப்படுகிறது.

இதனால் வாழ்க்கையில் வெறுப்படைந்து வெங்கடேஷ் காணப்பட்டார். சம்பவத்தன்று வீட்டில் இருந்த வெங்கடேஷ் திடீரென தூக்குப்போட்டு கொண்டார். அக்கம் பக்கத்தினர் பார்த்து அதிர்ச்சியடைந்து 108 ஆம்புலன்சு மூலம் ஈரோடு அரசு ஆஸ்பத்திரிக்கு அனுப்பி வைத்தனர்.

ஆனால் ஆஸ்பத்திரிக்கு செல்லும் வழியிலேயே வெங்கடேஷ் பரிதாபமாக இறந்தார். பின்னர் அவர் உடல் பிரேத பரிசோதனை செய்யப்பட்டு, உறவினர்களிடம் ஒப்படைக்கப்பட்டது.

கணவர் வெங்கடேஷ் உடலை பார்த்து அவரது மனைவி கதறி அழுதது பார்ப்பதற்கு பரிதாபமாக இருந்தது. இது குறித்து வீரப்பன்சத்திரம் போலீசார் வழக்குப்பதிவு செய்து விசாரணை நடத்தி வருகிறார்கள். #tamilnews

ஈரோடு:

ஈரோடு பன்னீர்செல்வம் பார்க் அருகே இன்று தந்தை பெரியார் திராவிடர் கழகத்தின் மாவட்ட செயலாளர் குமரகுருபரன் தலைமையில் மாவட்ட இளைஞரணி செயலாளர் சந்திரன், மாவட்ட அமைப்பாளர் கராத்தே சண்முகம், விடுதலை சிறுத்தைகள் கட்சி இளைஞரணி அமைப்பாளர் தனவிஜயன், திராவிடர் கழக மாநில அமைப்புச் செயலாளர் சண்முகம், தி.மு.க.வைச் சேர்ந்த பெரியசாமி உள்ளிட்டோர் திரண்டனர்.

அவர்கள் வைத்திருந்த எச்.ராஜா உருவ பொம்மையை எரிக்க முயன்றனர். இதனால் அங்கு பரபரப்பு ஏற்பட்டது. அங்கு பாதுகாப்பு பணியில் ஈடுபட்டிருந்த டவுன் போலீஸ் இன்ஸ்பெக்டர் விஜயன் தலைமையிலான போலீசார் தடுத்து நிறுத்தி உருவ பொம்மையை கைப்பற்றினர்.

எச்.ராஜா உருவ பொம்மையை எரிக்க முயன்றதாக 21 பேர் கைது செய்யப்பட்டனர். இந்த போராட்டம் குறித்து தந்தை பெரியார் திராவிட கழக மாவட்ட செயலாளர் குமரகுருபரன் கூறும்போது, “பாரதீய ஜனதாவை சேர்ந்த எச்.ராஜா தொடர்ந்து திராவிடர் இயக்க தலைவர்களை விமர்சித்து வருகிறார். கருணாநிதி, திருமாவளவன், வைரமுத்து, பெரியார் ஆகியோரையும் விமர்சிக்கிறார். இதை கண்டிக்கும் விதமாக இந்த போராட்டம் நடத்தப்பட்டது” என்றார். #tamilnews

கொடுமுடி:

கொடுமுடி அருகே உள்ள தட்டாம்பாளையத்தை சேர்ந்தவர் கவுரிசங்கர் (வயது 41). இவர் அ.தி.மு.க. வில் கொடுமுடி ஒன்றிய எம்.ஜி.ஆர். இளைஞர் அணி செயலாளராக உள்ளார். இவரது மனைவியின் தங்கை சிவகிரி அருகே உள்ள அரசு பள்ளியில் ஆசிரியையாக வேலை பார்த்து வருகிறார். அவர் தனது அக்காள் வீட்டில் இருந்து வேலைக்கு சென்று வந்தார். அவரை திருமணம் செய்து கொள்ள கவுரிசங்கர் நினைத்தார்.

இது தொடர்பாக துன்புறுத்தல் அதிரித்ததால் கவுரிசங்கரின் மனைவி, தங்கையை அழைத்துக் கொண்டு கொடுமுடி அருகே தேவம் பாளையத்தில் உள்ள தந்தை வீட்டுக்கு சென்றார். ஆனால் அங்கு சென்றும் கவுரிசங்கர் தொல்லை கொடுத்தாராம். எனவே ஆசிரியையை குள்ளக்கவுண்டன்புதூரில் உள்ள தனது அக்காள் வீட்டுக்கு அவரது தந்தை அனுப்பி வைத்தார். ஆசிரியைக்கு திருமணம் நடத்த ஏற்பாட்டையும் செய்தார். ஒரு மணமகனை பார்த்து திருமண நிச்சயதார்த்த தேதியை முடிவு செய்தார். வருகிற 22-ந் தேதி நிச்சயதார்த்த நிகழ்வு நடப்பதாக இருந்தது.

இந்த நிலையில் அக்கா வீட்டில் தங்கி இருந்த ஆசிரியை கொளாநல்லியில் உள்ள கோவிலுக்கு சென்றார். அங்கு கவுரி சங்கர் காரில் வந்து ஆசிரியையின் கையை பிடித்து இழுத்து அங்கிருந்து காரில் கடத்தி செல்ல முயன்றார். பொதுமக்களும், பக்தர்களும் திரண்டதால் காரில் தப்பினார். அவரை துரத்தி சென்றனர். அப்போது கவுரிசங்கர் சென்ற கார் கரூர்-ஈரோடு ரோட்டில் சத்திரப்பட்டி என்ற இடத்தில் வந்தபோது நிலை தடுமாறி ஓடி கவிழ்ந்தது.

பின் தொடர்ந்து வந்தவர்கள் கவுரி சங்கரையும், காரை ஓட்டி வந்த கணபதி பாளையம் நால்ரோடு, ஆயிகவுண்டன்பாளையத்தை சேர்ந்த சதீசையும் சுற்றி வளைத்து பிடித்து மலையம்பாளையம் போலீசில் ஒப்படைத்தனர்.

இது குறித்து ஆசிரியையின் தந்தை கொடுத்த புகாரின் பேரில் கவுரிசங்கர், சதீஷ் ஆகியோரிடம் போலீசார் விசாரணை நடத்தினர். பின்னர் அவர்கள் கைது செய்யப்பட்டனர்.

அவர்கள் மீது பெண் வன்கொடுமை தடுப்பு சட் டம், கொலை முயற்சி விடுத்தல், தடுத்து நிறுத்துதல் ஆகிய 3 பிரிவுகளின் கீழ் வழக்குப்பதிவு செய்யப்பட்டது. 2 பேரும் கொடுமுடி கோர்ட்டில் ஆஜர்படுத்தப்பட்டு ஈரோடு சப்-ஜெயிலில் அடைக்கப்பட்டனர். 

பவானி:

ஈரோடு அடுத்த சித்தோடு செல்லப்பன் பாளையத்தை சேர்ந்தவர் விஜயகுமார். இவரது மனைவி சித்ரா. இவர்களது மகன் யுவராஜ் (வயது 22).

யுவராஜ் அங்குள்ள ஒரு தனியார் கம்பெனியில் ஊழியராக வேலை பார்த்து வந்தார். கடந்த 45 நாட்களுக்கு முன்பு யுவராஜின் தந்தை விஜயகுமார் மாரடைப்பால் உயிரிழந்தார்.

அவர் இறந்த நாள் முதல் யுவராஜ் சோகத்துடன் காணப்பட்டார். தந்தை இறந்ததால் மனம் உடைந்த நிலையில் காணப்பட்ட அவர் நேற்று வீட்டில் தனியாக இருந்தார்.

அப்போது அவர் எலி மருந்தை (வி‌ஷம்) எடுத்து சாப்பிட்டதாக தெரிகிறது. உயிருக்கு போராடியபடி கிடந்த அவரை அவரது தாய் சித்ரா பார்த்து அதிர்ச்சி அடைந்தார்.

உடனடியாக அக்கம் பக்கத்தினர் உதவியுடன் யுவராஜை மீட்டு சிகிச்சைக்காக ஈரோடு அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வந்தது.

எனினும் சிகிச்சை பலனின்றி யுவராஜ் நேற்று மாலை பரிதாபமாக இறந்தார். இது குறித்து சித்தோடு போலீசார் வழக்குப்பதிவு செய்தனர். இன்ஸ்பெக்டர் சிவக்குமார் விசாரணை நடத்தி வருகிறார்.

பு.புளியம்பட்டி:

பட்டு நூல் விலை ஏற்றத்தால் கைத்தறி நெசவாளர்கள், பாவு நூல் சாயமிடும் தொழிலாளர்கள், பாவு வீசும் தொழிலாளர்கள் பாதிக்கப்பட்டு உள்ளனர்.

எனவே மத்திய, மாநில அரசுகள் தலையிட்டு பட்டு நூல் விலையேற்றத்துக்கான காரணத்தை கண்டறிந்து விலை குறைப்பு நடவடிக்கை எடுக்க வேண்டும் என்று அவர்கள் வலியுறுத்தி வருகிறார்கள்.

இந்த கோரிக்கையை வலியுறுத்தி அவர்கள் ஜனவரி 15-ந் தேதி முதல் 15 நாட்கள் தொடர் வேலை நிறுத்தம் அறிவித்து போராட்டத்தை தொடங்கினர். அவர்களது போராட்டம் இன்று 5-வது நாளாக நீடிக்கிறது.

ஈரோடு, திருப்பூர், கோவை, நாமக்கல் மாவட்டங்களை சேர்ந்த சுமார் 1 லட்சத்துக்கும் மேற்பட்ட கைத்தறி பட்டு, ஜவுளி உற்பத்தியாளர்கள், நெசவு தொழிலாளர்கள் இந்த போராட்டத்தில் ஈடுபட்டுள்ளனர்.

இதனால் ஈரோடு மாவட்டத்தில் சத்தியமங்கலம், சது முகை, டி.ஜி.புதூர், புஞ்சை புளியம்பட்டி, நால் ரோடு, தொட்டம்பாளையம், அந்தியூர், சாவக்கட்டுபாளையம், நாமக்கல் மாவட்டத்தில் குமாரபாளையம், பள்ளிபாளையம், திருப்பூர் மாவட்டத்தில் திருப்பூர், காங்கயம், சாவக்கட்டுபாளையம், கோவை மாவட்டத்தில் வாக ராயம்பாளையம், சிறுமுகை, ஆலாங்கொம்பு ஆகிய பகுதிகளில் உள்ள கைத்தறி கூடங்கள் மூடி வெறிச்சோடி கிடக்கின்றன.

போராட்டம் காரணமாக இங்குள்ள தொழிலாளர்களுக்கு நெசவு செய்ய பாவு, நூல் வழங்கப்படவில்லை. எனவே இங்குள்ள கைத்தறி கூடங்களில் கோரா பட்டு சேலைகள் உற்பத்தி முற்றிலும் முடங்கியது.

ஈரோடு, கோவை, திருப்பூர், நாமக்கல் ஆகிய மாவட்டங்களில் தற்போது வேலை நிறுத்தத்தில் ஈடுபட்டுள்ள தொழிலாளர்கள் பணிபுரியும் கைத்தறி கூடங்கள் அனைத்திலும் சேர்த்து தினமும் மொத்தம் ரூ. 2½ கோடி முதல் 3 கோடி வரை கோரா பட்டு சேலைகள் உற்பத்தி நடக்கும்.

அந்த வகையில் பார்க்கும் போது போராட்டம் நடந்துள்ள கடந்த 4 நாட்களில் சுமார் ரூ. 10 கோடிக்கும் மேல் உற்பத்தி பாதிக்கப்பட்டு உள்ளது. கைத்தறி நெசவு தொழிலாளர்கள் வேலை இன்றி உள்ளனர். #tamilnews