திருவொற்றியூர்:
திருவொற்றியூர் திருமலை அவன்யூ 3-வது தெருவைச் சேர்ந்தவர் பிரகாஷ் ரெட்டி (வயது70). தனியார் தொழிற்சாலையில் வேலை பார்த்து ஓய்வு பெற்றவர். இவர் ஆந்திர மாநிலம் ஓங்கோல் என்ற இடத்தில் வீடு கட்டி வருகிறார். திருவொற்றியூர் காலடிப்பேட்டையை சேர்ந்த தனது நண்பரிடம் வீடு கட்ட ரூ. 4 லட்சம் கடன் கேட்டார்.
இதையடுத்து அவர் திருவொற்றியூர் பெரியார் நகரில் உள்ள தனியார் வங்கியில் இருந்து ரூ.4 லட்சம் பணத்தை எடுத்து, பிரகாஷ் ரெட்டியிடம் கொடுத்தார். இதையடுத்து பிரகாஷ் ரெட்டி தனது மோட்டார் சைக்கிளின் டேங்க் கவரில் ரூ.4 லட்சத்தை வைத்துக்கொண்டு வந்தார்.
திருவொற்றியூர் கே. ஜி. எல். லாட்ஜ் அருகே உள்ள டீக்கடை முன்பு மோட்டார் சைக்கிளை நிறுத்திவிட்டு தனது நண்பரான வேறு ஒருவரிடம் பேசிக்கொண்டிருந்தார்.
சிறிது நேரம் கழித்து திரும்பி வந்து பார்த்த போது மோட்டார் சைக்கிளில் இருந்த ரூ.4 லட்சத்தை காணவில்லை. மர்ம நபர் பணத்தை கொள்ளையடித்து சென்று இருப்பது தெரிய வந்தது.இது குறித்து பிரகாஷ் ரெட்டி திருவொற்றியூர் குற்றப்பிரிவு போலீசில் புகார் செய்தார். போலீசார் வழக்கு பதிவு செய்து, அங்குள்ள சி. சி. டி. வி. கேமரா பதிவுகளை ஆய்வு செய்து விசாரித்து வருகின்றனர்.
