கோவில்பட்டி:
தூத்துக்குடி மாவட்டம் கோவில்பட்டி ராஜீவ் நகர் 3-வது தெருவை சேர்ந்தவர் முத்துராமன்.
இவரது மனைவி முத்துமாரி (வயது45). இவர்களது மகள்கள் யுவராணி (21), நித்யா (17). யுவராணி அப்பகுதியில் உள்ள கல்லூரியில் 2-ம் ஆண்டும், நித்யா பிளஸ்-2 படித்து வந்தனர்.
கணவன்-மனைவிக்கு இடையே ஏற்பட்ட கருத்து வேறுபாடு காரணமாக முத்து மாரி தனது 2 மகள்களுடன் கடந்த 10 ஆண்டுகளாக தனியாக வசித்து வருகிறார்.
இந்நிலையில் காலை முத்துமாரியின் தாய் கோமதி மற்றும் அவரது மகன் ஆகியோர் இன்று முத்துமாரி வீட்டுக்கு சென்றனர். ஆனால் நீண்ட நேரமாக கதவு திறக்கப்படவில்லை. மேலும் வீட்டில் இருந்து துர்நாற்றம் வீசி உள்ளது.
சந்தேகம் அடைந்த அவர்கள் கதவை உடைத்து உள்ளே சென்று பார்த்த போது முத்துமாரி, யுவராணி, நித்யா ஆகியோர் தூக்கில் பிணமாக தொங்கினர். இதனால் அதிர்ச்சியடைந்த அவர்கள் கோவில்பட்டி மேற்கு காவல் நிலைய போலீசாருக்கு தகவல் தெரிவித்தனர்.
சம்பவ இடத்திற்கு இன்ஸ்பெக்டர் சபாபதி மற்றும் போலீசார் விரைந்து சென்று தாய், மகள்கள் உடல்களை கைப்பற்றி பிரேத பரிசோதனைக்கு கோவில்பட்டி மருத்துவமனைக்கு அனுப்பி வைத்தனர்.
இது தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். முத்துமாரிக்கும், அவரது உறவினர் ஒருவருக்கும் சொத்து தொடர்பாக முன்விரோதம் இருந்து வருவதாக கூறப்படுகிறது.
மேலும் அவர் முத்துமாரியிடம் இருந்து நகைகளையும் வாங்கி கொண்டு அதை திருப்பி கொடுக்காமல் உள்ளதாகவும் தெரிகிறது.
இது தொடர்பாக அவர் தற்கொலை செய்து கொண்டாரா? அல்லது வேறு ஏதேனும் காரணமா? என போலீசார் தீவிரமாக விசாரணை நடத்தி வருகிறார்கள்.
