அனுப்பர்பாளையம்:
திருப்பூர் அங்கேரிபாளையத்தை அடுத்த வெங்கமேடு பகுதியை சேர்ந்தவர் பாக்கிய அன்பரசன் (வயது 44). பனியன் நிறுவன தொழிலாளி. இவருக்கும் அதே பகுதியை சேர்ந்த இளம்பருதி (26) மற்றும் காலேஜ் ரோட்டில் வசித்து வரும் உசிலம்பட்டியை சேர்ந்த ஆனந்த் (30) ஆகியோருக்கும் இடையே முன்விரோதம் இருந்து வந்துள்ளது.
இந்த நிலையில் நேற்று முன்தினம் பாக்கிய அன்பரசன் வெங்கமேடு பகுதியில் நின்று கொண்டிருந்தார். அப்போது இளம்பருதி, ஆனந்த் இருவரும் அங்கு சென்றுள்ளனர். அங்கு ஏற்கனவே அவர்களுக்குள் இருந்த முன்விரோதம் காரணமாக மீண்டும் வாக்குவாதம் ஏற்பட்டுள்ளது. இதில் ஆத்திரமடைந்த இளம்பருதி, ஆனந்த் ஆகியோர் சேர்ந்து பாக்கிய அன்பரசனை கல்லால் தலை மற்றும் முகத்தில் தாக்கி கொல்ல முயற்சி செய்துள்ளனர்.
இதில் படுகாயமடைந்த அவரை அக்கம்பக்கத்தினர் மீட்டு சிகிச்சைக்காக கோவை அரசு மருத்துவக்கல்லூரி மருத்துவமனைக்கு அனுப்பி வைத்தனர். இதுகுறித்து பாக்கிய அன்பரசனின் மனைவி சாக்லன்மேரி அனுப்பர்பாளையம் போலீஸ் நிலையத்தில் புகார் கொடுத்தார். இதன் பேரில் போலீஸ் இன்ஸ்பெக்டர் முனியம்மாள் வழக்குப்பதிவு செய்து இளம்பருதி, ஆனந்த் இருவரையும் கைது செய்தனர். பின்னர் ஜே.எம்.3 நீதிமன்றத்தில் ஆஜர்படுத்தி சிறையில் அடைத்தனர். கைது செய்யப்பட்ட இருவர் மீதும் ஏற்கனவே பல வழக்குகள் இருப்பதும் தெரிய வந்தது.
