செய்திகள்
லல்லு கட்சி எம்.பி முகம்மது தஸ்லிமுத்தின் சென்னையில் மரணம்
உடல்நலக்குறைவு காரணமாக சென்னை அப்பல்லோ மருத்துவமனையில் அனுமதிக்கப்பட்டிருந்த ராஷ்ட்ரிய ஜனதா தளம் கட்சியின் எம்.பி முகம்மது தஸ்லிமுத்தின் (74) இன்று காலமானார்.
சென்னை:
பீகார் மாநிலம் அராரியாவில் 1943-ம் ஆண்டு பிறந்த முகம்மது தஸ்லிமுத்தின் 1969-ம் ஆண்டில் சட்டமன்ற உறுப்பினராக தேர்வாகி தனது அரசியல் வாழ்க்கையை தொடங்கினார். 1989-ம் ஆண்டு ராஷ்ட்ரிய ஜனதா தளம் கட்சியின் சார்பில் நாடாளுமன்ற தேர்தலில் போட்டியிட்டு எம்.பி.ஆக தேர்வானார்.
1996-ம் ஆண்டில் இருந்து தொடர்ச்சியாக நடைபெற்ற நாடாளுமன்ற தேர்தலில் அவர் வெற்றி பெற்றுள்ளார். தற்போது அராரியா தொகுதி எம்.பி.ஆக இருக்கும் தஸ்லிமுத்தின், உடல்நலக்குறைவு காரணமாக சென்னை அப்பல்லோ மருத்துவமனையில் சிகிச்சை பெற்று வந்தார்.
இந்நிலையில், இன்று அவர் சிகிச்சை பலனின்றி உயிரிழந்ததாக தெரிவிக்கப்பட்டுள்ளது.