ஆசிய சாம்பியன்ஷிப் பேட்மிண்டன்: பிவி சிந்து காலிறுதியில் போராடி தோல்வி

ஆசிய சாம்பியன்ஷிப் பேட்மிண்டன் தொடர் சீனாவில் நடைபெற்று வருகிறது. இந்தியாவின் முன்னணி வீராங்கனையான பி.வி. சிந்து காலிறுதிக்கு முன்னேறினார்.

இன்று நடைபெற்ற காலிறுதியில் பி.வி. சிந்து, சீனாவின் ஹி பிங்ஜியாவோ-ஐ எதிர்கொண்டார். சொந்த மண்ணில் தெம்புடன் விளையாடிய ஹி பிங்ஜியாவோ-ஐ சிந்து திறமையாக எதிர்கொண்டார். இதனால் முதல் செட்டை 21-15 என எளிதில் கைப்பற்றினார்.

ஆனால் ஹி பிங்ஜியாவோ 2-வது செட்டில் அபாரமான ஆட்டத்தை வெளிப்படுத்தினார். 11-7 என பின்தங்கிய சிந்து, இறுதியில் 14-21 என 2-வது செட்டை இழந்தார்.

இதனால் வெற்றியை நிர்ணயிக்கக்கூடிய 3-வது செட்டில் இருவரும் சிறப்பான ஆட்டத்தை வெளிப்படுத்தினார்கள். இருவரும் மாறிமாறி புள்ளிகள் எடுக்க ஆட்டத்தில் பரபரப்பு தொற்றிக் கொண்டது. 7-9 என பின்தங்கிய நிலையில் இருந்து சிந்து, பின்னர் 12-12 என சமநிலைப் பெற்றார். பின்னர் 20-20 என சமநிலையை எட்டியது.

21-21 என இருந்த நிலையில் ஹி பிங்ஜியாவோ 24-22 என சிந்துவை வீழ்த்தி வெற்றி பெற்றார். கடும் போராட்டத்திற்குப்பின் பிவி சிந்து தோல்வியடைந்து ஏமாற்றத்துடன் வெளியேறினார்.