விழுப்புரம் அருகே தென்பெண்ணை ஆற்றில் பல்லவர் கால மூத்ததேவி சிற்பம் கண்டெடுப்பு

விழுப்புரம்:

விழுப்புரம் அருகே திருச்சி தேசிய நெடுஞ்சாலையில் தென்பெண்ணை ஆற்றங்கரையில் அமைந்துள்ளது பிடாகம் கிராமம். இங்கு தென்பெண்ணை ஆற்றில் சிற்பம் ஒன்று இருப்பதாக அப்பகுதியை சேர்ந்த பொதுமக்கள் தகவல் அளித்தனர்.

இதனை தொடர்ந்து விழுப்புரத்தை சேர்ந்த வரலாற்று ஆய்வாளர் செங்குட்டுவன் நேற்று பிடாகம் பகுதியில் ஆய்வு மேற்கொண்டார். அப்போது மண்ணில் கண்டறியப்பட்டுள்ள மூத்ததேவி சிற்பம் என்பதும், இது பல்லவர் காலத்தை சேர்ந்தது என்பதும் தெரியவந்தது. இதுகுறித்து அவர் மேலும் கூறியதாவது:-

மூத்ததேவி வழிபாடு தமிழ்நாட்டில் மிகவும் தொன்மையானது. தமிழ்நாட்டின் பல இடங்களில் குறிப்பாக விழுப்புரம் மாவட்டத்தின் பல்வேறு பகுதிகளில் மூத்ததேவி சிற்பங்கள் காணப்படுகின்றன. தற்போது பிடாகம் பகுதியில் இந்த சிற்பம் கிடைத்துள்ளது. ஆற்று மணலில் புதைந்திருந்த இந்த சிற்பம் அண்மையில் பெய்த மழை வெள்ளம் காரணமாக தற்போது வெளிப்பட்டு இருக்கிறது.

இவ்வாறு அவர் கூறினார்.