திருக்காமீஸ்வரர் கோவில் பிரம்மோற்சவ விழா நாளை தொடங்குகிறது

வில்லியனூரில் பழமை வாய்ந்த கோகிலாம்பிகை சமேத திருக்காமீஸ்வரர் கோவில் உள்ளது. இங்கு ஆண்டுதோறும் பிரம்மோற்சவ தேர் திருவிழா சிறப்பாக கொண்டாடப்படும். இந்த ஆண்டுக்கான திருவிழா நாளை தொடங்கி, 17-ந் தேதி வரை 13 நாட்கள் நடக்கிறது. இதையொட்டி நாளை இரவு 7 மணிக்கு கொடியேற்ற நிகழ்ச்சி நடக்கிறது.

விழாவில் தினமும் சாமிக்கு சிறப்பு அபிஷேக ஆராதனைகள் மற்றும் இரவு பஞ்சமூர்த்திகள் வீதிஉலா நடக்கிறது. முக்கிய நிகழ்ச்சிகளாக வருகிற 8-ந் தேதி பரிவேட்டை, 12-ந் தேதி மாலை 6.30 மணியளவில் திருக்கல்யாண உற்சவம், 13-ந் தேதி காலை 8.30 மணியளவில் தேரோட்டம் நடக்கிறது. தேரோட்டத்தை புதுவை கவர்னர் கிரண்பெடி தொடங்கி வைக்கிறார். விழாவில் முதல்-அமைச்சர், அமைச்சர்கள், எம்.எல்.ஏ.க்கள் கலந்துகொள்கின்றனர்.

14-ந் தேதி இரவு தெப்ப உற்சவம், 15-ந் தேதி இரவு 7 மணிக்கு மின்விளக்கு அலங்காரத்தில் முத்துப்பல்லக்கு வீதிஉலா, 16-ந் தேதி விடையாற்றி உற்சவம், 17-ந் தேதி சண்டிகேஸ்வரர் உற்சவம் நடக்கிறது. விழாவுக்கான ஏற்பாடுகளை கோவில் சிறப்பு அலுவலர் திருவரசன் மற்றும் விழாக்குழுவினர் செய்து வருகின்றனர்.