அய்யா வைகுண்டசாமி கோவிலில் பங்குனி திருவிழா இன்று தொடங்குகிறது

கன்னியாகுமரி அருகே உள்ள முட்டபதியில் அய்யா வைகுண்டசாமி கோவிலில் பங்குனி திருவிழா இன்று (வெள்ளிக்கிழமை) கொடியேற்றத்துடன் தொடங்குகிறது. விழா அடுத்த மாதம் (ஏப்ரல்) 2-ந் தேதி வரை 11 நாட்கள் நடக்கிறது. இன்று அதிகாலை கொடியேற்றம், பகல் 12 மணிக்கு தீர்த்தமாட செல்லும் நிகழ்ச்சி, இரவு 7 மணிக்கு வாகன பணிவிடை, அன்னதானம் போன்றவை நடக்கிறது.

தொடர்ந்து வருகிற திருவிழா நாட்களில் பணிவிடை, உகப்படிப்பு, உச்சிப்படிப்பு, அய்யாவின் வாகன பவனி, அன்னதானம் போன்றவை நடைபெறும். 30-ந் தேதி இரவு 8 மணிக்கு கலிவேட்டை நிகழ்ச்சி நடக்கிறது. அடுத்த மாதம் 2-ந் தேதி அதிகாலை 4.30 மணிக்கு பணிவிடை, உகப்படிப்பு, மாலை 5 மணிக்கு அய்யா சப்பர வாகனத்தில் எழுந்தருளி பதியை சுற்றி வலம் வரும் நிகழ்ச்சி நடக்கிறது. அதைத் தொடர்ந்து இரவில் திருஏடு வாசிப்பு நடைபெறும். பின்னர் திருக்கொடியிறக்கப்பட்டு திருவிழா நிறைவு பெறுகிறது. திருவிழாவிற்கான ஏற்பாடுகளை முட்டபதி அய்யா வைகுண்டசாமி பதி தர்மகர்த்தாக்கள் செய்துள்ளனர்.