3-வது முறையாக சர் ரிச்சர்ட் ஹாட்லீ விருதை பெற்று கேன் வில்லியம்சன் சாதனை

நியூசிலாந்து கிரிக்கெட் அணியின் கேப்டன் கேன் வில்லியம்சன். இந்த தலைமுறையின் தலைசிறந்த பேட்ஸ்மேன்களில் ஒருவராக  கருதப்படுகிறார். இவரது தலைமையில் நியூசிலாந்து வெஸ்ட் இண்டீஸ், இலங்கை, இங்கிலாந்து, பாகிஸ்தான் மற்றும் வங்காளதேச அணிகளுக்கு எதிரான டெஸ்ட் தொடரை கைப்பற்றியுள்ளது.

இந்த சீசனில் கேன் வில்லியம்சன் டெஸ்ட் போட்டிகளில் 925 ரன்களும், ஒருநாள் போட்டியில் 838 ரன்களும், டி20 கிரிக்கெட்டில் 332 ரன்களும் அடித்துள்ளார்.

ஆண்டுதோறும் சிறப்பாக விளையாடும் வீரர்களுக்கு நியூசிலாந்து கிரிக்கெட் வாரியம் விருதுகள் வழங்கி கவுரவிக்கிறது. மிக உயரிய விருதான சர் ரிச்சர்ட் ஹாட்லீ விருதை இந்த முறை கேன் வில்லியம்சன் வென்றுள்ளார்.

ஏற்கனவே இரண்டு முறை இந்த விருதை வென்றுள்ளார். இதன்மூலம் மூன்று முறை சர் ரிச்சர்ட் ஹாட்லீ விருதை பெற்ற முதல் வீரர் என்ற பெருமையை பெற்றுள்ளார். ராஸ் டெய்லர் இரண்டு முறை இந்த விருதை பெற்றுள்ளார்.