உலக கோப்பை கால்பந்து தொடர் நான்கு ஆண்டுகளுக்கு ஒரு முறை நடத்தப்படும். கடந்த 2014ல் இத்தொடர் பிரேசிலில் நடந்தது. இதில் ஜெர்மனி அணி சாம்பியன் பட்டத்தை கைப்பற்றியது.
இந்த ஆண்டுக்கான தொடர் வரும் ஜூன் 14 முதல் ஜூலை 15 வரை ரஷியாவில் நடக்கிறது. சுமார் 32 அணிகள் பங்கேற்கும் 64 போட்டிகளை கொண்ட இத்தொடர் ரஷியாவின் 11 முக்கிய நகரங்களில் நடக்கிறது. இதன் இறுதிப்போட்டி மாஸ்கோவின் லுஸ்நிகி மைதானத்தில் ஜூலை 15-ம் தேதி நடக்கவுள்ளது.
இந்நிலையில், தற்போது வெளியிடப்பட்டுள்ள சர்வதேச கால்பந்து தரவரிசையில் நடப்பு சாம்பியனான ஜெர்மனி முதல் இடத்தை பிடித்துள்ளது. இதனால் ஜெர்மனி அணி நடப்பு சாம்பியன் என்ற பெருமை மட்டுமின்றி தரவரிசையில் முதலிடத்தில் இருக்கும் அணி என்ற பெயருடன் உலக கோப்பையில் களமிறங்க உள்ளது. இது அந்த அணிக்கு கூடுதல் பலம் அளிக்கும் என கூறப்படுகிறது.
இந்த தரவரிசையில் ஜெர்மனி, பிரேசில், பெல்ஜியம், போர்ட்டுகல், அர்ஜெண்டினா ஆகிய அணிகள் அடுத்தடுத்து முதல் ஐந்து இடங்களில் உள்ளன. 66வது இடத்தில் இருந்த ரஷியா அணி, நான்கு இடங்கள் பின்தங்கி 70-வது இடத்தில் உள்ளது. இதுவே சர்வதேச அளவில் ரஷியா அணியின் மோசமான தரமாகும். #FIFA2018 #Germany #FIFArankings
