அரியலூர்:
அரியலூர் மாண்ட்போர்ட் மெட்ரிக் மேல்நிலைப்பள்ளியில் மாண்ட்போர்ட் பள்ளியும் முன்னாள் மாணவர்கள் சங்கமும் இணைந்து நடத்திய 7ஆம் ஆண்டு மாநில அளவிலான ஹாக்கி போட்டி நடைபெற்றது.
இப்போட்டியில் மதுரை, திருச்சி, விழுப்புரம், திண்டுக்கல் மற்றும் அரியலூர் உட்பட பல்வேறு மாவட்டங்களிலிருந்து 7 அணிகள் கலந்து கொண்டனர்.
போட்டிகளை மாண்ட் போர்ட் பள்ளியின் முதல்வர் தோமினிக் சாவியோ மற்றும் முன்னாள் மாணவர்கள் தொடங்கி வைத்தனர். இறுதிப்போட்டியில் திண்டுக்கல் செயின்ட் மேரீஸ் பள்ளி அணியும், மதுரை திருநகர் இந்திராகாந்தி நினைவு பள்ளி அணியும் விளையாடியது.
இதில் திண்டுக்கல் செயின்ட் மேரீஸ் அணி 2க்கு 1 கோல் கணக்கில் வெற்றிப் பெற்று முதல் இடத்தை பிடித்தது.
இரண்டாவது இடத்தை மதுரை திருநகர் இந்திரா காந்தி நினைவு பள்ளி அணி பெற்றது. மூன்றாம் நான்காம் இடத்திற்கான போட்டியில் பாண்டியராஜபுரம் அரசு மதுரா சுகர்ஸ் பள்ளி அணி மற்றும் அரியலூர் மாண்ட்போர்ட் மெட்ரிக் மேல்நிலைப்பள்ளி அணி விளையாடியது. இதில் 3ஆம் இடத்தை பாண்டியராஜபுரம், அரசு மதுரா சுகர்ஸ் பள்ளி அணியும் 4ஆம் இடத்தை அரியலூர் மாண்ட்போர்ட் மெட்ரிக் மேல்நிலைப் பள்ளி அணியும் பெற்றது.
போட்டியில் நடுவர்களாக மாநில அளவிலான நடுவர்கள் திருமாறன், செந்தில்குமார், பாபு, ஜார்ஜ் ஜான் பணியாற்றினர். பின்னர் பரிசளிப்பு விழா நடை பெற்றது. பரிசளிப்பு விழாவிற்கு மாண்ட்போர்ட் மெட்ரிக் மேல்நிலைப் பள்ளியின் முதல்வர் தோமினிக் சாவியோ தலைமை தாங்கினார்.
ஆர்.டி.சி. குழுமத்தின் நிர்வாக இயக்குநர் அக்பர் ஷெரீப் வெற்றி பெற்ற அணிகளுக்கு கோப்பை, சான்றிதழ்கள் மற்றும் பதக்கங்கள் வழங்கி சிறப்புரை ஆற்றினார். பள்ளி மாணவ - மாணவிகளின் கலை நிகழ்ச்சிகள் நடைபெற்றது. #tamilnews
