மன அழுத்தம் மக்களை அச்சுறுத்திக்கொண்டிருக்கிறது. ஒருசில உடல் இயக்க செயல்பாடுகள் மூலம் மன அழுத்தத்திற்கான அறிகுறியை முன்கூட்டியே அறிந்து கொள்ளலாம்.
மன அழுத்தத்திற்கும், தலைவலிக்கும் நெருங்கிய தொடர்பு இருக்கிறது. தொடர்ந்து தலைவலி பிரச்சினையால் அவதிப்பட்டாலோ, நெற்றி பகுதியில் உள்ள தசையில் அழுத்தம் ஏற்பட்டாலோ மன அழுத்தம் ஏற்படக்கூடும்.
திடீரென்று முகப்பரு பிரச்சினை உண்டாவதும் மன அழுத்தத்திற்கான அறிகுறியாகும். சிலருக்கு கைகளில் திட்டு போன்ற சிறிய தடிப்புகளும் தோன்றும்.
தலையின் பின்பகுதியையொட்டிய கழுத்து பகுதியில் வலி ஏற்படுவதும் மன அழுத்த அறிகுறியாக இருக்கலாம். மன அழுத்தம் தசைகளுக்கு பாதிப்பை ஏற்படுத்தும். தசைகள் இறுக்கமாக தொடங்கி விடும். கழுத்துவலி ஏற்பட்டால் தலையை அங்கும், இங்கும் மெதுவாக அசைத்தும், தோள் பட்டைக்கு மசாஜ் செய்து வரலாம்.
ஆழ்ந்த சுவாச பயிற்சி மேற்கொள்வது மன அழுத்தத்தை கட்டுப்படுத்த உதவும்.
அதிகமாக நகம் கடிக்கும் பழக்கமும் மன அழுத்தத்தை பிரதிபலிக்கும். அடிக்கடி நகம் கடிக்கும் பழக்கம் கொண்டவர்கள் கசப்பு தன்மை கொண்ட நகப்பூச்சுகளை பயன்படுத்தினால் நகம் கடிப்பதை கட்டுப்படுத்தலாம்.
திடீர் வயிற்றுவலி, வயிற்று கலக்கம் போன்ற பிரச்சினைகளும் மன அழுத்தத்தின் அறிகுறியாக வெளிப்படும். அந்த சமயங்களில் சமையலில் இஞ்சி சேர்த்து சாப்பிட்டு வரலாம்.
திடீரென்று மன சோர்வு ஏற்படும். இரவில் வழக்கமான நேரத்திற்கு மாறாக உடனே தூங்க வேண்டும் என்ற எண்ணம் உருவாகும்.
மூளையின் செயல்பாடுகளை சீராக இயங்க வைப்பதன் மூலம் மன அழுத்தத்தை விரட்டி அடிக்கலாம். மன அழுத்தத்திற்கான அறிகுறிகள் தென்பட்டால் நடை பயிற்சி, ஓட்ட பயிற்சி மேற்கொள்ளலாம். நடனம் ஆடலாம். இத்தகைய பயிற்சிகள் தசைகளை இலகுவாக்கி மன அழுத்தத்தை கட்டுப்படுத்தும். மனதிற்கு பிடித்தமான பாடல்களையும் கேட்கலாம்.
