சேலம்:
சேலம் மாவட்டத்தில் 2000-க்கும் மேற்பட்ட அரசு மற்றும் அரசு உதவிப்பெறும் பள்ளிகள், தனியார் சுயநிதி பள்ளிகள் உள்ளன. இங்கு மாணவ- மாணவிகள் ஆங்கில வழியிலும், தமிழ் வழியிலும் கல்வி பயின்று வருகின்றனர். இந்த நிலையில் 1 முதல் 5-ம் வகுப்பு வரையிலான அரசு மற்றும் அரசு உதவிப்பெறும் தொடக்கப்பள்ளி மாணவ- மாணவிகளுக்கு அடுத்த மாதம் (செப்டம்பர்) 3-வது வாரத்தில் காலாண்டு தேர்வு தொடங்குகிறது.
1-ம் வகுப்பு குழந்தைகளுக்கு 4 தாள்கள் தேர்வு நடக்கிறது. 5-ம் வகுப்பு குழந்தைளுக்கு தமிழ், ஆங்கிலம், கணிதம், அறிவியல், சமூக அறிவியல் ஆகிய 5 பாட பரீட்சைகள் நடைபெறுகிறது. தேர்வு முடிவடைந்ததும், 4-வது வாரத்தில் இக்குழந்தைகளுக்கு காலாண்டு விடுமுறை விடப்படுகிறது. இந்த தேர்வு நடைபெறும் நாட் குறிப்புகள், விடுமுறை நாட்கள் குறித்த பட்டியல் ஒவ்வொரு தொடக்கப்பள்ளி தலைமை ஆசிரியர்களுக்கும் அனுப்பி வைக்கும் பணியில் சேலம் மாவட்ட தொடக்கக் கல்வி இயக்க அலுவலக அதிகாரிகள் ஈடுபட்டுள்ளனர்.
