சொந்த ஊரில் சாதித்த கேதர் ஜாதவ்

இங்கிலாந்துக்கு எதிரான புனேயில் நேற்று நடந்த ஒருநாள் போட்டியில் கேதர் ஜாதவின் ஆட்டம் அதிரடியாக இருந்தது. அவர் 76 பந்தில் 120 ரன்கள் குவித்து இந்தியாவின் வெற்றிக்கு காரணமாக திகழ்ந்தார். இதில் 12 பவுண்டரிகளும், 4 சிக்சர்களும் அடங்கும்.

26 வயதான அவர் 65 பந்தில் சதம் அடித்தார். இதன்மூலம் அதிவேகத்தில் சதம் அடித்த 5-வது இந்திய வீரர் என்ற பெருமையை கேதர்ஜாதவ் பெற்றார். விராட்கோலி, சேவாக், அசாருதீன், யுவராஜ்சிங் ஆகியோருக்கு அடுத்தப்படியாக அவர் உள்ளார். இதில் விராட்கோலி 2 முறை அதிவேகத்தில் செஞ்சூரியை தொட்டுள்ளார்.

கேதர் ஜாதவ் விராட்கோலியுடன் இணைந்து 5-வது விக்கெட்டுக்கு 200 ரன்களை சேர்த்தார். விராட் கோலி ஆட்டம் இழந்த பிறகு பொறுப்புடன் நின்று அணியின் வெற்றிக்கு காரணமாக இருந்தார். 60 ரன் தேவை இருந்தபோது தான் வெளியேறினார்.

2014-ம் ஆண்டு ஒருநாள் போட்டியில் அறிமுகமான கேதர் ஜாதவுக்கு இது 2-வது சதமாகும். இதற்கு முன்பு 2015-ம் ஆண்டு ஜிம்பாப்வேக்கு எதிரான ஹராரேயில் 105 ரன் எடுத்திருந்தார். தனது 13-வது போட்டியில் அவர் 2-வது சதத்தை பதிவு செய்து இருக்கிறார்.

இந்த அதிரடியான ஆட்டத்தை அவர் தனது சொந்த ஊரில் வெளிப்படுத்தி முத்திரை பதித்தார். கேதர் ஜாதவ் மராட்டிய மாநிலம் புனேயில் 1985-ம் ஆண்டு மார்ச் 26-ந்தேதி பிறந்தார். அவரது ஆட்டத்தை காண உறவினர்களும், ரசிகர்களும் திரண்டு வந்து இருந்தனர். அவர்களுக்கு விருந்து கிடைக்கும் வகையில் கேதர்ஜாதவ் தனது அதிரடியாக விளையாடினார்.

மிடில் ஆர்டர் வரிசையில் இந்திய அணிக்கு கிடைத்த புதிய நட்சத்திரமாக கேதர்ஜாதவ் ஜொலிக்கிறார்.