காஷ்மீரில் துப்பாக்கி திருடர்கள் கைது: தீவிரவாத இயக்கத்தில் சேர திட்டமிட்டதாக தகவல்

காஷ்மீர்:

காஷ்மீர் மாநிலம் புல்வாமா மாவட்டம் அவந்திபோராவி பகுதியில் மொகம்மது ஆசிப் கான், அதில் அஹமது நஜர் மற்றும் சாகிப் நாசர் பட் ஆகிய மூன்று இளைஞர்களையும் காஷ்மீர் போலீஸ், ராஷ்டிரிய ரைபிள்ஸ் படையினர் இன்று கைது செய்து காவலில் வைத்து விசாரித்து வருகின்றனர்.

மூன்று இளைஞர்களும் போலீசாரிடமிருந்து துப்பாக்கி உள்ளிட்ட ஆயுதங்களைத் திருடி தடை செய்யப்பட்ட தீவிரவாத இயக்கமொன்றில் சேரத் திட்டமிட்டிருந்ததாக தங்களுக்கு தகவல் கிடைத்ததைத் தொடர்ந்து, இளைஞர்கள் மூவரையும் கைது செய்ததாக போலீஸ் உயரதிகாரி ஒருவர் தெரிவித்தார்.

இதனைத் தொடர்ந்து சட்ட விரோத செயல்களில் ஈடுபட்டதாக மூவர் மீதும் வழக்குப்பதிவு செய்யப்பட்டு விசாரணை நடத்தப்படுகிறது.

காஷ்மீர் பகுதியில் தொடர்ச்சியாக நடைபெற்று வரும் இதுபோன்ற சம்பவங்களால் காஷ்மீர் போலீசாரிடமிருந்து 67 துப்பாக்கிகள் திருடு போயிருப்பது குறிப்பிடத்தக்கது.