சினிமா
நடிகர் சங்க தேர்தல் - விஷாலை எதிர்க்க ரஜினியிடம் ஆதரவு கேட்ட ரித்திஷ்
நடிகர் சங்க தேர்தலில் நடிகர் விஷாலை எதிர்த்து நிற்க இருக்கும் ரித்திஷ், அதற்காக நடிகர் ரஜினியை நேரில் சந்தித்து ஆதரவு கேட்டிருக்கிறார். #Rithish #Rajini
நடிகரும் முன்னாள் எம்.பி.யுமான ரித்திஷ் இன்று ரஜினிகாந்தை அவரது வீட்டில் சந்தித்து பேசினார். பின்னர் அவர் கூறியதாவது:-
‘நடிகர் சங்க தேர்தல் நடந்து மூன்று ஆண்டுகள் ஆகிறது. உடனடியாக தேர்தல் நடத்தப்பட வேண்டும். விஷாலோ கட்டடம் கட்டிய பிறகு தான் தேர்தல் என்கிறார். நடிகர் சங்கத்தில் இருந்து நாடக நடிகர்கள் உள்பட 128 பேர் நீக்கப்பட்டுள்ளனர். அதற்காக வழக்கு போட்டுள்ளோம்.
விஷால், தயாரிப்பாளர் சங்கத்திலும் எதுவும் செய்யவில்லை. முறை கேடுகள் செய்ததற்கான ஆதாரங்கள் இருக்கின்றன. நல்லது செய்வார் என்று தான் கடந்த தேர்தலில் ஆதரித்தேன். ஆனால் அவர் இப்படி செய்வார் என்று நினைக்கவில்லை. இவை எல்லாவற்றையும் பற்றி ரஜினியிடம் பேசினேன்.
மேலும் வரும் நடிகர் சங்க தேர்தலில் விஷால் எந்த பதவிக்கு போட்டியிடுகிறாரோ அந்த பதவிக்கு அவரை எதிர்த்து போட்டியிட இருக்கிறேன். அதற்கும் ரஜினியிடம் ஆதரவு கேட்டு இருக்கிறேன்’.
இவ்வாறு அவர் கூறினார்.
10 நாட்களுக்கு முன்பு ரஜினியை பொது வெளியில் விமர்சித்தீர்களே? என்று கேட்டதற்கு ‘அது அரசியல். இது சினிமா. அ.தி.மு.க. தலைமையை விமர்சிக்கும்போது அதற்கு பதில் கூற வேண்டியது என் கடமை’ என்றார்.
இந்த சந்திப்பின் போது தமிழ் திரைப்பட இயக்குனர் சங்க தலைவர் கார்த்திக் உடன் இருந்தார்.