இந்த வார ராசிப்பலன்

17.11.21 முதல் 15.12.21 வரை

எதையும் உற்சாகத்தோடு செய்யத் தொடங்கும் மிதுன ராசி நேயர்களே!

கார்த்திகை மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் புதன், லாபாதிபதி செவ்வாயோடு இணைந்திருக்கின்றார். எனவே, பொருளாதார நிலையில் முன்னேற்றம் அதிகரிக்கும். புதிய ஒப்பந்தங்கள் வந்து சேரும். உடல் நலத்தோடும், உற்சாகத்தோடும் செயல்படுவீர்கள்.

செவ்வாய்-சனி பார்வைக் காலம்

மாதத் தொடக்கத்தில் இருந்து கார்த்திகை 20-ந் தேதி வரை செவ்வாய்-சனியின் பார்வை இருக்கின்றது. மகரத்திலுள்ள சனி துலாத்தில் உள்ள செவ்வாயைப் பார்க்கின்றார். செவ்வாய் மகரத்திலுள்ள சனியைப் பார்க்கின்றார். அஷ்டமத்துச் சனியின் ஆதிக்கம் இருப்பதால் எதிலும் கொஞ்சம் விழிப்புணர்ச்சி தேவை. என்றாலும், குருவின் பார்வை இருப்பதால் பெரியளவில் பாதிப்புகள் ஏற்படாது. சகோதரர்களுக்குள் பூசல்கள் உருவாகும். `வாங்கிய இடத்தை விற்க நேரிடுகின்றதே' என்று கவலைப்படுவீர்கள்.

விருச்சிக புதனின் சஞ்சாரம்

கார்த்திகை முதல் நாளே விருச்சிக ராசிக்கு புதன் வருகின்றார். உங்கள் ராசிக்கு அதிபதியாகவும் 4-ம் இடத்திற்கு அதிபதியாகவும் விளங்கும் புதன், 6-ம் இடத்தில் சஞ்சரிப்பது யோகம்தான். மக்கள் செல்வங்கள் மகிழ்ச்சிக்குரிய விதம் நடந்து கொள்வர். தக்க தருணத்தில் நண்பர்கள் கைகொடுத்து உதவுவர். தனவரவு திருப்தியாக இருக்கும். இந்த நேரத்தில் கட்டிடம் கட்டும் முயற்சி, கல்யாண வாய்ப்புகள் கைகூடும்.

தனுசு புதனின் சஞ்சாரம்

கார்த்திகை 18-ந் தேதி தனுசு ராசிக்குப் புதன் செல்கின்றார். அங்குள்ள சுக்ரனோடு சேர்ந்து புத-சுக்ர யோகத்தை உருவாக்குகின்றார். அதுமட்டுமல்லாமல் உங்கள் ராசியையும் பார்க்கின்றார். ஆடை, ஆபரண சேர்க்கை உண்டு. வெளிநாட்டு முயற்சி கைகூடும். பொதுவாழ்விலும், உத்தியோகத்திலும் உயர் பதவிகள் கிடைத்து உங்களை மகிழ்ச்சிக் கடலில் ஆழ்த்தும்.

மகர சுக்ரனின் சஞ்சாரம்

கார்த்திகை 19-ந் தேதி மகர ராசிக்குச் சுக்ரன் செல்கின்றார். உங்கள் ராசிக்கு 5, 12 ஆகிய இடங்களுக்கு அதிபதியானவர் சுக்ரன். 12-க்கு அதிபதி அஷ்டமத்தில் சஞ்சரிக்கும் இந்த நேரத்தில் விபரீத ராஜயோக அடிப் படையில் சில நல்ல சம்பவங்கள் நடைபெறலாம். தொழில் வளம் சிறப்பாக இருக்கும். கிளைத் தொழில் தொடங்கும் யோகம் உண்டு. பிள்ளைகளின் எண்ணங்களைப் பூர்த்தி செய்வீர்கள். உத்தியோகத்தில் திடீர் முன்னேற்றங்கள் வரலாம்.

விருச்சிக செவ்வாயின் சஞ்சாரம்

கார்த்திகை 20-ந் தேதி விருச்சிக ராசிக்குச் செவ்வாய் செல்கின்றார். உங்கள் ராசிக்கு 6-ம் இடத்திற்கு செவ்வாய் செல்வதால் உடல்நலத்தில் கவனம் செலுத்த வேண்டிய நேரமிது. உற்சாகம் குறையாமல் பார்த்துக் கொள்ளுங்கள். எதையும் எளிதில் நம்பிச் செயல்படுவதால் துயரங்கள் கூடும். பல காரியங்கள் தாமதப்படலாம். ஆனந்த வாழ்வமைய அனுமனை வழிபடுவது நல்லது.

பணத்தேவையைப் பூர்த்தி செய்யும் நாட்கள்:-

நவம்பர்: 17, 18, 25, 26, 30, டிசம்பர்: 1, 10, 11, 14, 15

மகிழ்ச்சி தரும் வண்ணம்:- கிளிப்பச்சை.