காஞ்சிபுரம்

காஞ்சீபுரம்:

காஞ்சீபுரம் திருக்காளிமேடு பிராமணர் பகுதியைச் சேர்ந்தவர் மணி. இவரது மனைவி புவனா (23). இவர் காஞ்சீபுரம் ராஜாஜி மார்க்கெட்டில் காய்கறி வியாபாரம் செய்து வருகிறார். புவனாவின் தந்தை பரமசிவமும் அதே மார்க்கெட்டில் காய்கறி வியாபாரம் செய்து வருகிறார்.

நேற்று இரவு 9 மணியளவில் புவனா கடையை மூடுவதற்கு ஏற்பாடுகள் செய்து கொண்டிருந்தார். அவரது தந்தை பரமசிவம் கடைக்கு வந்து மதுஅருந்த பணம் கேட்டார். ஆனால் புவனா பணம் தர அப்போது மறுத்துவிட்டார்.

இதனால் இருவருக்கும் இடையே வாய் தகராறு ஏற்பட்டது. கோபம் அடைந்த பரமசிவம் திடீரென மறைத்து வைத்திருந்த கத்தியால் புவனாவின் கழுத்தை அறுத்து விட்டு தப்பி ஓடிவிட்டார்.

ரத்தவெள்ளத்தில் அலறிய புவனாவை அங்கிருந்த வியாபாரிகள் மீட்டு காஞ்சீபுரம் அரசு மருத்துவமனையில் சேர்த்தனர். பின்னர் மேல் சிகிச்சைக்காக சென்னையில் உள்ள தனியார் மருத்துவமனையில் சேர்த்தனர். அவருக்கு தீவிர சிகிச்சை அளிக்கப்படுகிறது.

இது குறித்து சிவகாஞ்சி போலீஸ் இன்ஸ்பெக்டர் சரவணன் வழக்கு பதிவு செய்து பரமசிவத்தை கைது செய்தார். அவரிடம் விசாரணை நடந்து வருகிறது.

மதுகுடிக்க பணம்தர மறுத்த மகளை, தந்தையே கத்தியால் கழுத்தை அறுத்த சம்பவம் அப்பகுதியில் பரபரப்பை ஏற்படுத்தியுள்ளது.

காஞ்சீபுரம்:

சுங்குவார்சத்திரம் அருகே உள்ள மொளச்சூர், திருமங்கலம் கிராமத்தில் சுமார் 2 ஆயிரத்துக்கும் மேற்பட்டோர் வசித்து வருகிறார்கள்.

இவர்கள் தங்கள் பகுதியில் சாலைவசதி, கழீவுநீர் கால்வாய் உள்ளிட்ட அடிப்படை வசதிகள் செய்து தர வேண்டும் என்று நீண்ட நாட்கள் கோரிக்கை விடுத்து வருகிறார்கள்.

ஆனால் இதுவரை எந்த நடவடிக்கையும் எடுக்கப்பட வில்லை. இதுபற்றி பொது மக்கள் சம்பந்தப்பட்ட அதிகாரிகளுக்கு பலமுறை கோரிக்கை விடுத்து உள்ளனர்.

இந்த நிலையில் அடிப்படை வசதிகள் செய்து தரக்கோரி, மொளச்சூர், திருமங்கலம் பகுதியை சேர்ந்த பெண்கள் உள்பட சுமார் 75-க்கும் மேற்பட்டோர் கையில் பாய் மற்றும் பதாகைகளுடன் காஞ்சீபுரம் கலெக்டர் அலுவலகத்துக்கு வந்தனர்.அவர்கள் கலெக்டர் அலுவலக வளாகத்தில் பாயை விரித்து அமர்ந்து நூதன போராட்டத்தில் ஈடுபட்டனர்.

இதனால் கலெக்டர் அலுவலக வளாகத்தில் பரபரப்பு ஏற்பட்டது. அவர்களிடம் அதிகாரிகள் சமாதானம் பேசி கலைந்து போகச் செய்தனர்.

இதைத்தொடர்ந்து மக்கள் குறை தீர்க்கும் கூட்டத்தில் மாவட்ட வருவாய்த்துறை அதிகாரி நூர் முகமதுவிடம் அவர்கள் கோரிக்கை மனு அளித்தனர். #tamilnews

மதுராந்தகம்:

மதுராந்தகத்தை அடுத்த அபிராமிபுரத்தை சேர்ந்தவர் சின்ராஜ் (வயது 30). கோயம்பேடு மார்க்கெட்டில் தொழிலாளியாக வேலை பார்த்து வந்தார்.

இன்று அதிகாலை அவரை மதுராந்தகம் பஸ் நிலையத்தில் விடுவதற்காக அதே பகுதியை சேர்ந்த சரவணன் (22), மூர்த்தி (17) ஆகியோர் மோட்டார் சைக்கிளில் அழைத்து சென்றனர்.

மதுராந்தகம் அருகே பைபாஸ் சாலையை கடந்த போது சென்னையில் இருந்து திண்டிவனம் நோக்கி சென்ற அடையாளம் தெரியாத வாகனம் திடீரென மோட்டார் சைக்கிள் மீது மோதி நிற்காமல் சென்று விட்டது.

இதில் மோட்டார் சைக்கிளின் முன்பகுதி முழுவதும் நொறுங்கியது. அதிலிருந்த சின்ராஜ், சரவணன், மூர்த்தி ஆகியோர் பலத்த காயம் அடைந்து சம்பவ இடத்திலேயே பரிதாபமாக இறந்தனர். இதில் பலியான மூர்த்தி பிளஸ்-1 மாணவர் ஆவார்.

இது குறித்து மதுராந்தகம் போலீசுக்கு தகவல் தெரிவிக்கப்பட்டது. போலீசார் விரைந்து வந்து 3 பேரின் உடலை மீட்டு பிரேத பரி சோதனைக்காக மதுராந்தகம் அரசு ஆஸ்பத்திரிக்கு அனுப்பி வைத்தனர்.

மதுராந்தகம் போலீசார் வழக்குப்பதிவு செய்து விபத்து ஏற்படுத்திய வாகனம் குறித்து விசாரணை நடத்தி வருகிறார்கள். #tamilnews

ஆலந்தூர்:

ஐ.என்.எஸ். மீடியா நிறுவனம் தொடர்பான வழக்கில் சி.பி.ஐ. அதிகாரிகளால் கைது செய்யப்பட்ட கார்த்தி சிதம்பரத்துக்கு டெல்லி ஐகோர்ட்டு பல்வேறு நிபந்தனைகளுடன் முன்ஜாமீன் வழங்கியது.

அதை தொடர்ந்து நேற்று இரவு 10.40 மணியளவில் விமானம் மூலம் கார்த்தி சிதம்பரம் சென்னை திரும்பினார். அவருக்கு தென் சென்னை மாவட்ட காங்கிரஸ் சார்பில் வரவேற்பு கொடுக்கப்பட்டது.

பின்னர் அவர் நிருபர்களிடம் கூறியதாவது:-

“என் மீது அரசியல் ரீதியில் பொய்யான குற்றச்சாட்டுகளுடன் வழக்குகள் தொடரப்பட்டுள்ளன. அதற்கு டெல்லி ஐகோர்ட்டின் தீர்ப்பு பதிலாக அமைந்துள்ளது. தீர்ப்பின் 50-வது பக்கத்தில் அது தெளிவாக கூறப்பட்டுள்ளது.

என் மீது போடப்பட்டுள்ள வழக்குகளை சட்டரீதியான முறையில் சந்தித்து உறுதியாக வெற்றி பெறுவேன். என் மீதான நடவடிக்கை அரசியல் ரீதியிலானது என நடுநிலையாக இருக்கும் அனைவருக்கும் தெரியும்.”

இவ்வாறு அவர் கூறினார். #Kartichidambaram #tamilnews

சோழிங்கநல்லூர்:

பழைய மகாபலிபுரம் சாலையில் (ஓ.எம்.ஆர்.) பெருங்குடி சுங்கச்சாவடி சிக்னல் அருகே சாலையின் நடுவில் இன்று காலை “திடீர்” பள்ளம் ஏற்பட்டது. இதை பார்த்த வாகன ஓட்டிகள் அதிர்ச்சி அடைந்தனர்.

இதுபற்றி தகவல் அறிந்த துரைப்பாக்கம் போக்குவரத்து போலீசார் சம்பவ இடத்திற்கு விரைந்து வந்து போக்குவரத்து நெரிசலை சரி செய்யும் பணியில் ஈடுபட்டனர்.

இரு சக்கர வாகனங்கள் பள்ளத்தில் விழுந்து விபத்துக்குள்ளாகாமல் பள்ளம் விழுந்த இடத்தில் தடுப்பு பலகை வைக்கப்பட்டுள்ளது.

இதுபற்றி மாநகராட்சி அதிகாரிகள் சம்பவ இடத்திற்கு விரைந்து வந்து பார்த்தபோது சாலையின் நடுவில் அமைக்கப்பட்டுள்ள சென்னை மெட்ரோ குடிநீர் பைப் உடைந்துள்ளது தெரிய வந்தது.

பின்னர் பள்ளத்தை மணல் நிரப்பி மூடினார்கள். பள்ளம் மணல் கொட்டி மூடப்பட்டாலும் அப்பகுதியில் சாலையின் நடுவில் பேரிகாட் அமைக்கப்பட்டிருப்பதால் ஓ.எம்.ஆர். சாலையில் மிதமான வேகத்தில் போக்குவரத்து பாதிப்புடன் வாகனங்கள் சென்று வருகின்றன.