காஞ்சிபுரம்

செங்கல்பட்டு:

கூடுவாஞ்சேரியை அடுத்த காரணை புதுச்சேரி விநாயகபுரத்தை சேர்ந்தவர் சேகர். அதே பகுதியில் காய்கறி வியாபாரம் செய்து வருகிறார்.

இவர் கடந்த சில ஆண்டுகளுக்கு முன்பு ஊரப்பாக்கத்தை சேர்ந்த 2 பேரிடம் ரூ.6½ லட்சம் வரை வியாபாரத்திற்காக கடன் வாங்கி இருந்தார். இதனை அவர் திருப்பி செலுத்தி வந்தார்.

அவர் ரூ.12 லட்சம் வரை திருப்பி செலுத்தி இருந்ததாக கூறப்படுகிறது. எனினும் கூடுதலாக பணம் செலுத்த வேண்டும் என்று கடன் கொடுத்தவர்கள் சேகருக்கு நெருக்கடி கொடுத்து வந்தனர்.

இதுகுறித்து சேகர் கூடுவாஞ்சேரி போலீசில் புகார் கொடுத்தார். இதுபற்றி போலீசார் கடன் கொடுத்த 2 பேரையும் அழைத்து விசாரணை நடத்தினர்.

இதனால் சேகருக்கும் கடன் கொடுத்தவர்களுக்கும் இடையே தகராறு ஏற்பட்டது. இந்த நிலையில் நேற்று மாலை சேகர் வீட்டில் இருந்தார்.

அப்போது மோட்டார் சைக்கிளில் வந்த 2 மர்ம வாலிபர்கள் சேகர் வீட்டுக்குள் பெட்ரோல் குண்டை வீசி விட்டு தப்பி சென்று விட்டனர்.

பெட்ரோல் குண்டு வெடித்து சிதறியதில் அங்கிருந்த கட்டில் மற்றும் பொருட்கள் எரிந்தது. அருகில் இருந்த சேகர் லேசான காயத்துடன் உயிர் தப்பினார். அதிர்ஷ்ட வசமாக வீட்டில் இருந்த மற்றவர்களுக்கு காயம் ஏற்படவில்லை. தீயை அவர்கள் அணைத்தனர்.

இதுகுறித்து குறித்து கூடுவாஞ்சேரி போலீசுக்கு தகவல் தெரிவிக்கப்பட்டது. பணத்தகராறில் பெட்ரோல் குண்டு வீசப்பட்டு இருக்கலாம் என்று போலீசார் சந்தேகிக்கிறார்கள். இதுபற்றி விசாரணை நடந்து வருகிறது. #tamilnews

ஆலந்தூர்:

ஆதம்பாக்கம் தில்லை கங்காநகர், ஜீவன் நகர், பார்த்தசாரதி நகர், ராம கிருஷ்ணாபுரம், நியூ காலனி உள்ளிட்ட பகுதிகளில் நேற்று இரவு 9 மணி அளவில் மின்தடை ஏற்பட்டது.

இதுபற்றி அப்பகுதி மக்கள் தில்லை கங்கா நகரில் உள்ள மின்வாரிய அலுவலகத்துக்கு தொலைபேசியில் தொடர்பு கொண்டு தகவல் தெரிவித்தனர். ஆனால் அவர்கள் மின்தடையை சரிசெய்ய நடவடிக்கை எடுக்கவில்லை என்று தெரிகிறது.

நள்ளிரவு 12 மணி வரை மின் இணைப்பு கொடுக்கப்படாததால் பொது மக்கள் கடும் அவதி அடைந்தனர். அவர்கள் தில்லை கங்காநகர் பகுதியில் உள்ள சுரங்கப்பாதையில் மறியலில் ஈடுபட்டனர். இதனால் போக்குவரத்து பாதிக்கப்பட்டது.

ஆதம்பாக்கம் போலீசார் விரைந்து வந்த பேச்சுவார்த்தை நடத்தினர். மின் இணைப்பு வழங்க நடவடிக்கை எடுப்பதாக உறுதி அளித்தனர். இதையடுத்து மறியலில் ஈடுபட்டவர்கள் கலைந்து சென்றனர்.

எனினும் மின் இணைப்பு இன்று அதிகாலை வரை வழங்கப்படவில்லை. காலை 6 மணிக்கு பின்னரே ஒவ்வொரு பகுதியாக மின் இணைப்பு சீரானது. இரவு முழுவதும் மின்சாரம் வழங்கப்படாததால் பொது மக்கள் கடும் அவதி அடைந்தனர்.

காஞ்சீபுரம்:

காஞ்சீபுரம் நெல்லுக்காரத் தெருவில் தமிழ்நாடு மருந்து வணிகர்கள் சங்கங்களின் அவசர ஆலோசனை கூட்டம் நடந்தது. இந்த கூட்டத்திற்கு காஞ்சீபுரம் செங்கல்பட்டு மாவட்ட மருத்துவ வணிக சங்க தலைவர் வெங்கடேசன் தலைமை தாங்கினார். இந்த கூட்டத்தில் தமிழ்நாடு மருந்து வணிகர்கள் சங்க மாநில தலைவர் ராமச்சந்திரன் கலந்துகொண்டு பேசினார்.

அப்போது அவர் கூறியதாவது:-

உச்ச நீதிமன்றம் அளித்த தீர்ப்பின்படி குறிப்பிட்ட கால கெடுவுக்குள் காவிரி மேலாண்மை வாரியம் அமைக்க தவறிய மத்திய அரசை தமிழக மருந்து வணிகர்கள் சங்கம் வன்மையாக கண்டிக்கிறது.

மத்திய அரசின் இந்த செயலை கண்டித்து வரும் ஏப்ரல் 2-ந் தேதி கடை அடைப்பு போராட்டம் நடை பெறுவதாக அறிவிக்கப்பட்டு இருந்தது. இந்த போராட்டம் வணிகர்கள் சங்கங்களின் கோரிக்கையை ஏற்று ஒத்தி வைக்கப்படுகிறது.

மேலும் அனைத்து கட்சிகள், விவசாய சங்கங்கள், வணிகர் சங்க பிரதிநிதிகளிடம் கலந்து பேசி கடையடைப்பு போராட்டம் நடத்தும் தேதி பின்னர் அறிவிக்கப்படும்.

இவ்வாறு அவர் தெரிவித்தார்.

இந்த கூட்டத்தில் சங்கத்தின் மாவட்ட செயலாளர் ராஜா, மண்டல செயலாளர் மூர்த்தி, நிர்வாக செயலாளர் சுந்தரமூர்த்தி,மொத்த வணிக பிரிவு செயலாளர் சத்தியமூர்த்தி கலந்துகொண்டனர்.

மதுராந்தகம்:

மதுராந்தகம் அருகே கரசங்கால் பகுதியில் எரி சாராயம் பதுக்கி வைக்கபட்டு உள்ளதாக மதுராந்தகம் டி.எஸ்.பி, ராஜேந்திரனுக்கு ரகசிய தகவல் கிடைத்தது. இதையடுத்து போலீசார் அப்பகுதியில் சோதனை செய்தனர்.

அப்போது கரசங்கால் ஏரியில் ஊராட்சிக்கு சொந்தமான பழுதான மின் மோட்டார் செட்டில் பதுக்கி வைக்கப்பட்டு இருந்த 55 கேன்களில் 2 ஆயிரம் லிட்டர் எரிசாராயம் மற்றும் கடத்தலுக்கு பயன்படுத்திய வாகனத்தையும் பறிமுதல் செய்தனர். இவற்றின் மதிப்பு ரூ. 10 லட்சம் ஆகும். விசாரணையில் எரிசாராயம் இதே பகுதியை சேர்ந்த விமல்ராஜ் என்பவருக்கு சொந்தமானது என்றும் இவர் இப்பகுதியில் பிரபல சாராய வியாபாரி என்றும் தெரிய வந்தது.

சாராயம் பிடிபட்ட தகவல் அறிந்த அவர் தலைமறைவாகி விட்டார். இந்த சாராய வியாபாரத்தில் உடந்தையாக இருந்த பெண் மாலாவை கைது செய்து உள்ளனர். சாராயம் எங்கு இருந்து கொண்டு வரப்பட்டது என்பது பற்றி போலீசார் விசாரணை நடத்தி வருகின்றனர். #tamilnews

வேளச்சேரி:

வேளச்சேரி மெயின் ரோட்டில் புற்றுக்கோவில் பகுதியில் வர்த்தக வளாகம் உள்ளது. இங்கு 4 கடைகள் உள்ளன. கீழ்தளத்தில் ரமேஷ் என்பவர் கைகடிகாரங்கள் விற்பனை செய்யும் கடை நடத்தி வருகிறார்.

நேற்று இரவு மர்ம நபர்கள் சிலர் அந்த கடையின் பூட்டை உடைத்து உள்ளே புகுந்தனர். அங்கு இருந்த விலை உயர்ந்த கைகடிகாரங்கள் அனைத்தையும் கொள்ளையடித்து சென்று விட்டனர்.

அதன் மதிப்பு ரூ.40 லட்சம் என கணக்கிடப்பட்டுள்ளது. இந்த வர்த்தக வளாகத்தில் உள்ள கடைகளில் கண்காணிப்பு கேமிராக்கள் பொருத்தப்பட்டிருந்தன. அதன் மூலம் துப்புதுலக்காமல் தடுக்க அவற்றை கொள்ளையர்கள் அகற்றி விட்டனர்.

இது குறித்து வேளச்சேரி போலீசில் புகார் செய்யப்பட்டுள்ளது. போலீசார் வழக்குபதிவு செய்து விசாரணை நடத்தி வருகின்றனர்.

மதுராந்தக்:

கடலூரில் இருந்து சென்னை துறைமுகத்துக்கு சிமெண்ட் மூட்டைகள் ஏற்றிய லாரி கடந்த 26-ந் தேதி வந்தது. டிரைவர் செந்தில் கவாஸ்கர் லாரியை ஓட்டினார்.

மதுராந்தகம் அருகே சென்னை - திருச்சி நெடுஞ்சாலையில் இரவு வந்தபோது 8 பேர் கும்பல் லாரியை வழிமறித்தனர். அவர்கள் டிரைவர் செந்தில் கவாஸ்கரை தாக்கி ரூ. 5 ஆயிரத்தை பறித்து தப்பி சென்றுவிட்டனர்.

இது குறித்து மதுராந்தகம் போலீசார் வழக்குப்பதிவு செய்து விசாரணை நடத்தினர். டி.எஸ்.பி. ராஜேந்திரன் மேற்பார்வையில் இன்ஸ்பெக்டர் அந்தோணி ஸ்டாலின் தலைமையில் வழிப்பறி கொள்ளையர்களை பிடிக்க தனிப்படை அமைக்கப்பட்டது.

இந்த நிலையில் லாரி டிரைவரை தாக்கி வழிப்பறியில் ஈடுபட்ட செங்கல்பட்டை அடுத்த திம்மாவரத்தை சேர்ந்த பிரேம்குமார் என்கிற கருப்பன், உத்திரமேரூர் காவ் தண்டலம் கிராமத்தை சேர்ந்த தமிழ்வேந்தன் என்கிற மொச்சை ஆகிய 2 பேரை போலீசார் கைது செய்தனர்.

அவர்களிடம் இருந்து 2 மோட்டார் சைக்கிள்கள், கத்தி, இரும்பு கம்பி உள்பட ஆயுதங்கள் பறிமுதல் செய்யப்பட்டது. மேலும் வழிப்பறியில் தொடர்புடைய 6 பேரை தனிப்படை போலீசார் தேடி வருகின்றனர்.