கமுதி அருகே கர்ப்பிணி மனைவியுடன் ஓட்டல் தொழிலாளி தற்கொலை

கமுதி:

ராமநாதபுரம் மாவட்டம், கமுதி அருகே உள்ள கிளாமரம் கிராமத்தை சேர்ந்தவர் நாகையா. இவரது மகன் நாகராஜ் (வயது 27). அதே பகுதியில் உள்ள ஓட்டலில் வேலை பார்த்து வந்தார்.

இவரும், அதே பகுதியை சேர்ந்த ராமகிருஷ்ணன் மகள் தனலட்சுமியும் காதலித்து வந்தனர். இவர்களது காதலுக்கு இருவீட்டாரும் எதிர்ப்பு தெரிவித்தனர்.

இதையடுத்து கடந்த 6 மாதங்களுக்கு முன்பு 2 பேரும் வீட்டை விட்டு வெளியேறி கோவிலில் திருமணம் செய்து கொண்டனர். பின்னர் 2 பேரும் அங்கேயே வாடைகைக்கு வீடு எடுத்து குடும்பம் நடத்தி வந்தனர்.

இந்த நிலையில் தனலட்சுமி கர்ப்பமானார். ஆனாலும் 2 பேரையும் குடும்பத்தினர் ஏற்றுக்கொள்ளவில்லை என கூறப்படுகிறது. மேலும் நாகராஜூக்கும் ஓட்டல் வேலை சரியாக கிடைக்கவில்லை. எனவே வருமானமின்றி குடும்பம் நடத்த நாகராஜ் சிரமப்பட்டதாக தெரிகிறது.

இதனால் வாழ்க்கையில் விரக்தியடைந்த காதல் தம்பதியினர் தற்கொலை செய்து கொள்ள முடிவு செய்தனர். அதன்படி நாகராஜ், 6 மாத கர்ப்பிணி தனலட்சுமி ஆகியோர் வீட்டில் தூக்குப்போட்டு தற்கொலை செய்து கொண்டனர். நேற்று வீட்டின் கதவு நீண்ட நேரமாகியும் திறக்கப்படவில்லை. இதனால் சந்தேகமடைந்த அக்கம்பக்கத்தினர் கமுதி போலீசாருக்கு தகவல் கொடுத்தனர். இன்ஸ்பெக்டர் அன்பு பிரகாஷ் தலைமையிலான போலீசார் விரைந்து வந்து கதவை உடைத்து பார்த்தபோது 2 பேரும் தூக்கில் தொங்கிய நிலையில் பிணமாக கிடந்தனர்.

2 பேரின் உடல்களை மீட்ட போலீசார் பிரேத பரிசோதனைக்காக கமுதி அரசு ஆஸ்பத்திரிக்கு அனுப்பி வைத்தனர். இந்த சம்பவம் தொடர்பாக கமுதி போலீசார் வழக்குப்பதிவு செய்து விசாரித்து வருகின்றனர்.

காதல் திருமணம் செய்து கொண்ட புதுமண தம்பதி 6 மாதத்தில் தற்கொலை செய்து கொண்ட சம்பவம் அந்த பகுதியில் சோகத்தை ஏற்படுத்தி உள்ளது.