ராமேசுவரம் கோவில் ராமலிங்க பிரதிஷ்டை திருவிழாவில் ராவண சம்ஹாரம் நிகழ்ச்சி

ராமேசுவரம் கோவிலின் தல வரலாற்றை விளக்கும் வகையில் 3 நாட்கள் நடைபெறும் ராமலிங்க பிரதிஷ்டை திருவிழா நேற்று தொடங்கியது. விழாவின் முதல் நாளான நேற்று மாலை 5 மணியளவில் கோவிலில் இருந்து லெட்சுமணர்,ஆஞ்சநேயர் ஆகியோருடன் ராமபிரான் தங்க கேடயத்தில் திட்டக்குடி சந்திப்பு பகுதிக்கு எழுந்தருளினர். அங்கு ராவண சம்ஹாரம் நிகழ்ச்சி நடந்தது. அப்போது ராவணனை வதம் செய்த வேலுக்கு பால்,மஞ்சள், புனித நீராலும் அபிஷேகமும் நடைபெற்றது.


விழாவில் இன்று (செவ்வாய்க்கிழமை) 1 மணிக்கு தனுஷ்கோடி சாலையில் உள்ள கோதண்டராமர் கோவிலில் இலங்கை மன்னரான விபீஷ்ணருக்கு ராமபிரான் பட்டாபிஷேகம் செய்து வைக்கும் நிகழ்ச்சியும் நடைபெறுகிறது.

இதையொட்டி இன்று ராமேசுவரம் கோவில்நடை அதிகாலை 3 மணிக்கு திறக்கப்பட்டு 4 மணி வரை ஸ்படிக லிங்க தரிசனம் நடைபெற்று வழக்கமான பூஜைக்கு பிறகு காலை 7 மணிக்கு கோவில் நடை சாத்தப்படும். மீண்டும் மாலை 5 மணிக்கு கோவில் நடை திறக்கப்பட்டு வழக்கமான பூஜைகள் நடைபெறும். தீர்த்தமாடவும் பக்தர்கள் அனுமதிக்கப்படமாட்டார்கள் என்று திருக்கோவில் நிர்வாகம் தெரிவித்துள்ளது.