கும்பகோணம் சாரங்கபாணி கோவிலில் திருக்கல்யாண உற்சவம்

தஞ்சை மாவட்டம் கும்பகோணத்தில் உள்ள சாரங்கபாணி கோவில், 108 வைணவ தலங்களில் ஒன்றாகும். இங்கு சாரங்கபாணி பெருமாளுடன், கோமளவல்லி தாயார் அருள்பாலித்து வருகிறார். பிரசித்திப்பெற்ற இக்கோவிலில் பங்குனி திருவிழா கடந்த 1-ந் தேதி கொடியேற்றத்துடன் தொடங்கியது.

அதைத்தொடர்ந்து கண்ணாடி கமல வாகனம், வெள்ளி சேஷ வாகனம், வெள்ளி யானை வாகனம் உள்ளிட்ட அலங்கார வாகனங்களில் கோமளவல்லி தாயார் புறப்பாடு நடைபெற்றது. பின்னர் சக்கரபாணிசாமி, சாரங்கபாணி சாமியுடன் எழுந்தருளல் நிகழ்ச்சியும், பெருமாள்-தாயார் மாலை மாற்றுதல் நிகழ்ச்சியும் நடைபெற்றது.



விழாவில் நேற்றுமுன்தினம் இரவு சாரங்கபாணி பெருமாள்-கோமளவல்லி தாயார் திருக்கல்யாண உற்சவம் நடைபெற்றது. முன்னதாக கோமளவல்லி தாயார் தேசிகர் சன்னதி எதிரே எழுந்தருளினார். இதையடுத்து ஊஞ்சல் உற்சவம் நடைபெற்றது. அதைத்தொடர்ந்து சாரங்கபாணி-கோமளவல்லி தாயார் திருக்கல்யாணம் நடை பெற்றது.

இதில் திரளான பக்தர்கள் கலந்து கொண்டு சாமி தரிசனம் செய்தனர்.