புதுச்சேரி

புதுச்சேரி:

புதுவை சட்டமன்ற தேர்தலில் வரலாறு காணாத வகையில் காங்கிரஸ் தோல்வியை சந்தித்துள்ளது.

இந்நிலையில் புதுவையில் உள்ளாட்சி தேர்தலுக்கு காங்கிரஸ் தயாராகி வருகிறது. உள்ளாட்சி தேர்தலில் தி.மு.க.வுடன் கூட்டணி தொடர காங்கிரசார் எதிர்ப்பு தெரிவித்து வருகின்றனர். இதனால் தி.மு.க.வுடன் கூட்டணி தொடருமா? உள்ளாட்சி தேர்தலில் காங்கிரசின் வியூகம் என்ன? என புதுவை மாநில காங்கிரஸ் தலைவர் ஏ.வி.சுப்ரமணியனிடம் கருத்து கேட்டபோது அவர் கூறியதாவது:-

கேள்வி:- சட்ட மன்ற தேர்தலில் தோல்வியடைந்துள்ள நிலையில் உள்ளாட்சி தேர்தலை சந்திக்க காங்கிரஸ் தயாராக உள்ளதா?

பதில்:- புதுவை, காரைக்காலில் உள்ளாட்சி தேர்தலில் போட்டியிட காங்கிரஸ் சார்பில் விருப்ப மனு பெறப்பட்டு வருகிறது. நூற்றுக்கணக்கானவர்கள் போட்டியிட ஆர்வத்துடன் மனு வாங்கி செல்கின்றனர். இதுவரை சுமார் 500 பேர் விருப்ப மனு தாக்கல் செய்துள்ளனர். தேர்தலை சந்திக்க காங்கிரசும், காங்கிரசாரும் தயாராக உள்ளனர்.

கே:- தி.மு.க.வுடன் கூட்டணி வேண்டாம் என காங்கிரசார் கருத்து தெரிவித்துள்ளார்களே?

ப:- சட்டமன்ற தேர்தலில் தி.மு.க.வுக்கு விட்டுக்கொடுத்துவிட்டதாக காங்கிரசாரிடையே எண்ணம் நிலவுகிறது. தேர்தல் நெருங்கும் சமயத்தில் காங்கிரசிலிருந்து 9 வேட்பாளர்கள் திடீரென வெளியேறிவிட்டனர். ஒருவர் போட்டியிட முன்வரவில்லை. இதனால்தான் தேர்தலில் காங்கிரசுக்கு பின்னடைவு ஏற்பட்டது. மாற்று கட்சி மீது குறை கூறுவதில் எந்த பயனும் இல்லை. ஆளும்கட்சியாக காங்கிரஸ் இருந்தது. வழக்கமாகவே ஆளும்கட்சி மீது மக்களுக்கு அதிருப்தி ஏற்படும்.

தி.மு.க. ஆளும்கட்சியாக இல்லாததால் கெட்ட பெயர் இல்லை. பா.ஜனதாவினர் மூட்டை, மூட்டையாக பணத்தை கொண்டுவந்து தேர்தலை சந்தித்தனர். இதையும் காங்கிரசார் உணர்ந்துள்ளனர். இதுதொடர்பாக காங்கிரஸ் தொண்டர்களுக்கு விளக்கி வருகிறோம்.

கே:- சட்டமன்ற தேர்தலில் கூட்டணிக்கு யார் தலைமை என பிரச்சினை எழுந்தது? உள்ளாட்சி தேர்தல் கூட்டணிக்கு யார் தலைமை?

ப:- தலைமை என்பது முக்கியத்துவம் அல்ல. ஒருங்கிணைந்து காங்கிரஸ் கூட்டணி கட்சிகள் தேர்தலை சந்திக்க வேண்டும் என்பதுதான் எங்களின் எண்ணம். மதவாத சக்திகளை தடுக்க வேண்டியது காங்கிரஸ் கூட்டணி கட்சிகளின் கடமை. அதை உணர்ந்து செயல்படுவோம்.

கே:- உள்ளாட்சி தேர்தலில் காங்கிரசின் வெற்றி வாய்ப்பு எப்படி உள்ளது?

ப:- ஆட்சியாளர்கள் பண பலத்துடன் உள்ளனர். பணபலம் உள்ள 3 கட்சிகளும் ஒருங்கிணைந்துள்ளது. தமிழகத்தில் முதல்-அமைச்சர் மு.க.ஸ்டாலின் தலைமையில் தி.மு.க. ஆட்சி நடைபெறுவதால் தி.மு.க.வின் பலம் காங்கிரசுக்கு உள்ளது. பல மாநிலங்களில் பா.ஜனதா ஆட்சியில் இருந்தாலும், உள்ளாட்சி தேர்தலில் காங்கிரஸ் வெற்றி பெற்றுள்ளது. இது எங்களுக்கு நம்பிக்கையை ஏற்படுத்தியுள்ளது. புதுவை உள்ளாட்சி தேர்தலில் காங்கிரசுக்கு மக்கள் ஆதரவு அளிப்பார்கள்.

கே:- என்ஆர்.காங்கிரஸ், பா.ஜனதா கூட்டணி ஆட்சி அமைந்து முதியார் உதவித்தொகை, கொரோனா நிவாரணம் வழங்கியுள்ளனர். இது ஆளும்கட்சிக்கு சாதகமாக இருக்காதா?

ப:- முதியோர் உதவித் தொகையை காங்கிரஸ் ஆட்சியில் உயர்த்தவும், கொரோனா நிவாரணம் வழங்கவும் ஒப்புதல் கேட்டோம். அப்போதைய கவர்னர் எதற்கும் ஒப்புதல் தரவில்லை. காங்கிரஸ் திட்டங்களைத்தான் இப்போது என்.ஆர்.காங்கிரஸ், பா.ஜனதா கூட்டணி செயல்படுத்தியுள்ளது.

இப்போது தமிழ் பேசும் கவர்னரை நியமித்து ஆட்சிக்கு சாதகமான செயல்பாடுகளை செய்கின்றனர். புதுவையில் தற்போதும் கவர்னர் மூலம் மறைமுகமாக பா.ஜனதா ஆட்சி செய்வதாகவே கருத வேண்டியுள்ளது.

ஏனெனில் பா.ஜனதாவை பொறுத்தவரை மக்களை நேரடியாக சந்தித்து ஓட்டு கேட்டு வெற்றி பெற மாட்டார்கள். அதற்கு பதிலாக ஆள் பிடிக்கும் வேலை, கவர்னர் மூலமாக அதிகாரத்தை கைப்பற்றுவதையே செய்வார்கள்.

இந்த ஆட்சியிலும் இது தொடர்கிறது. கடந்த 5 ஆண்டுகால காங்கிரஸ் ஆட்சியில் நாங்கள் போராடினோம். இப்போதைய ஆட்சி கவர்னரிடம் சரணடைந்துள்ளது. ஓடு மீன் ஓட உறுமீன் வர காத்திருக்குமாம் கொக்கு என்பதுபோல என்ஆர்.காங்கிரசை கவிழ்த்து ஆட்சியை கவிழ்த்து பா.ஜனதா ஆட்சி அமைக்கும் தருணத்துக்கு காத்திருக்கிறது. இதை முதல்-அமைச்சர் ரங்கசாமி தான் புரிந்துகொள்ள வேண்டும்.

இவ்வாறு அவர் தெரிவித்தார்.

இதையும் படியுங்கள்... பொது இடங்களில் கட்டிப்பிடித்து முத்தம் கொடுக்க தடை இல்லை- இளைஞர்கள் கொண்டாட்டம்

பாகூர்:

பாகூர் மற்றும் அதன் சுற்றுவட்டார பகுதியில் நேற்று பகலில் சுட்டெரிக்கும் வெயில் கொளுத்தியது. பின்னர் இரவு 11.30 மணி அளவில் பலத்த இடி மின்னல் காற்றுடன் கூடிய மழை பெய்தது.

இந்த மழை சுமார் நள்ளிரவு 2.30 மணி வரை நீடித்தது இதன் காரணமாக பல இடங்களில் தண்ணீர் தேங்கி காணப்படுகிறது. தாழ்வான பகுதியில் உள்ள நிலங்களில் தண்ணீர் தேங்கி உள்ளது. வீடுகளிலும், வீட்டை சுற்றியுள்ள பகுதியிலும், தெருவிலும் தண்ணீர் தேங்கி பொதுமக்கள் அவதிக்கு உள்ளானார்கள்.

இந்த நிலையில் பாகூர் செல்லும் உயர்ரக மின்கம்பம் பழுது ஏற்பட்டதால் நேற்று மாலையில் சுமார் 3 மணி நேரம் மின்சாரம் இல்லாத நிலையில், நள்ளிரவு பெய்த மழையின் காரணமாக தொடர்ந்து 8 மணி நேரத்திற்கு மேலாக மின்சாரம் இல்லாமல் தவித்தனர்.

இதேபோன்று குருவி நத்தம், சோரியாங்குப்பம், பரிக்கல்பட்டு, ஆராய்ச்சி குப்பம், சேலியமேடு, குடியிருப்பு பாளையம் ஆகிய பகுதிகளிலும் சுமார் 10 மணி நேரத்திற்கும் மேலாக மின்சாரம் இல்லாமல் இரவு முழுக்க தூங்க முடியாமல் பொதுமக்கள் தவித்தனர்.

பொதுப்பணித்துறை கணக்கெடுப்பின்படி பாகூர் பகுதியில் நேற்று ஒரே இரவில் 110 மில்லி மீட்டர் மழை பதிவாகி உள்ளது. மேலும் பல இடங்களில் மரங்கள் விழுந்து காணப்படுவதாகும் தெரிவிக்கின்றனர்.

இந்த மழையின் காரணமாக தற்போது சித்தரை சம்பா சொர்ணவாரி பயிர் அறுவடை நிலையிலிருந்த நிலையில் சுமார் 500 ஏக்கருக்கு மேல் மழை நீர் புகுந்து சேதம் ஏற்பட்டுள்ளது.

பல இடங்களில் அறுவடை செய்து களத்தில் வைத்திருந்த நெல் பயிர்களும் சேதம் அடைந்துள்ளது. இதனால் விவசாயிகள் கவலை அடைந்து உள்ளனர்.

இப்குதியில் முறையான வாய்க்கால்கள் தூர் வாரப்படாமல் இருந்ததால் மழை நீரை வெளியேற்ற விவசாயிகள் கடுமையாகப் போராடி வருகின்றனர். சித்திரை சொர்ணவாரி பயிரில் ஐ.ஆர்.50, சின்னப்பொன்னி, எ.டி.டீ. 51, 45 ரக நெற்பயிர்கள் பெருத்த சேதம் ஏற்பட்டுள்ளதாக விவசாயிகள் கவலை தெரிவித்துள்ளனர். 

புதுச்சேரி:

அரியாங்குப்பம் டோல்கேட் அரவிந்த் நகரை சேர்ந்தவர் சந்திரன். இவரது மகன் மோகன்ராஜ் (வயது22). இவர் பி.ஏ.பி.எட். படித்து விட்டு வீட்டிலேயே மாணவர்களுக்கு டியூசன் நடத்தி வருகிறார்.

சம்பவத்தன்று இரவு இவர் சொந்த வேலையாக மோட்டார் சைக்கிளில் தவளக்குப்பத்துக்கு சென்றார். நோணாங்குப்பம் படகு குழாம் அருகே சென்ற போது எதிரே வந்த கார் எதிர்பாராத விதமாக மோகன்ராஜ் ஓட்டி சென்ற மோட்டார் சைக்கிள் மீது மோதியது. இதில் தூக்கி வீசப்பட்ட மோகன்ராஜ் படுகாயமடைந்தார். உடனடியாக அங்கிருந்தவர்கள் 108 ஆம்புலன்சை வரவழைத்து மோகன்ராசை சிகிச்சைக்காக புதுவை அரசு ஆஸ்பத்திரிக்கு அனுப்பிவைத்தனர். அங்கு மோகன்ராஜ் சிகிச்சை பெற்று வருகிறார்.

இதுகுறித்து அவரது தந்தை சந்திரன் கொடுத்த புகாரின் பேரில் கிருமாம்பாக்கம் போக்குவரத்து போலீசார் வழக்கு பதிவு செய்து விசாரணை நடத்தி வருகிறார்கள்.

புதுச்சேரி:

மத்திய அரசின் வேளாண் சட்டங்களை திரும்பப்பெற வலியுறுத்தி டெல்லியில் கடந்த ஒரு வருடமாக விவசாயிகள்போராட்டம் நடத்தி வருகின்றனர்.

விவசாயிகளின் போராட்டத்துக்கு ஆதரவாக நாடு முழுவதும் நாளை மறுநாள் (திங்கட்கிழமை) பந்த் போராட்டம் நடக்கிறது. புதுவையில் காங்கிரஸ் கூட்டணி கட்சிகள் சார்பில் பந்த் போராட்டத்துக்கு அழைப்பு விடுக்கப்பட்டுள்ளது. காங்கிரஸ் கூட்டணியின் தொழிற்சங்கத்தினரும், பல்வேறு அமைப்புகளும் பந்த் போராட்டத்துக்கு ஆதரவு தெரிவித்துள்ளன.

இந்நிலையில் மத்திய அரசுக்கு எதிர்ப்பு தெரிவிக்கும் வகையில் வீடுகளில் கருப்புக்கொடி ஏற்றும் போராட்டம் நடத்தப்படும் என காங்கிரஸ் அறிவித்திருந்தது.

இதன்படி காங்கிரஸ் கட்சி தலைமை அலுவலகம், மாவட்ட, வட்டார அலுவலகங்கள், நிர்வாகிகளின் வீடுகளில் கருப்புக்கொடி ஏற்றியிருந்தனர். கூட்டணி கட்சிகளான இந்தியகம்யூனிஸ்டு, மார்க்சிஸ்டு, கம்யூனிஸ்டு (எம்.எல்), விடுதலை சிறுத்தைகள் கட்சி அலுவலகங்களிலும், நிர்வாகிகளின் வீடுகளிலும் கருப்புக்கொடி ஏற்றியிருந்தனர்.

முன்னாள் முதல்- அமைச்சர் நாராயணசாமி, வைத்திலிங்கம் எம்.பி. ஆகியோரின் வீடுகளிலும் கருப்புக்கொடி ஏற்றப்பட்டிருந்தது.

இன்று மாலை அண்ணாசிலை அருகே கருப்புக்கொடி போராட்டம் நடத்தப்படும் என அறிவித்திருந்தனர். ஆனால் உள்ளாட்சி தேர்தல் அறிவிக்கப்பட்டதால் போராட்டம் கைவிடப்பட்டது.

கருப்புக்கொடி போராட்டத்தில் தி.மு.க. பங்கேற்கவில்லை. தி.மு.க. கட்சி அலுவலகங்கள், நிர்வாகிகள் வீடுகளில் கருப்புக் கொடி ஏற்றப்பட வில்லை. ஏற்கனவே பந்த் போராட்டம் தொடர்பாக காங்கிரஸ் கூட்டணி கட்சிகள் ஆலோசனைக்கூட்டம் காங்கிரஸ் கட்சி அலுவலகத்தில் நடந்தது. இந்த கூட்டத்திலும் தி.மு.க.வினர் பங்கேற்கவில்லை என்பது குறிப்பிடத்தக்கது.