வேலூர்

வாலாஜா:

ராணிப்பேட்டை மாஹவீர் நகர் முதல் தெருவை சேர்ந்தவர் கலீல் (வயது 52) பிஸ்கெட் வியாபாரி. இவர் நேற்று இரவு வேலூரில் நடந்த உறவினர் வீட்டு சுப நிகழ்ச்சிக்கு குடும்பத்தோடு வந்திருந்தார்.

இதனை நோட்டமிட்ட மர்ம கும்பல் வீட்டின் பூட்டை உடைத்து உள்ளே சென்று பீரோவில் இருந்த 10 பவுன் நகை, ரூ.25 ஆயிரம் பணம் ஆகியவற்றை கொள்ளையடித்து விட்டு தப்பி சென்றுவிட்டனர்.

இன்று காலை வீட்டிற்கு திரும்பிய கலீல் வீட்டின் கதவு திறக்கப்பட்டு இருப்பதை கண்டு அதிர்ச்சியடைந்தார். உள்ளே சென்று பார்த்த போது பீரோவில் இருந்த நகை, பணம் கொள்ளை போயிருந்தது தெரியவந்தது.

இதுகுறித்து கலீல் ராணிப்பேட்டை போலீஸ் நிலையத்தில் புகார் அளித்தார். போலீசார் சம்பவ இடத்திற்கு வந்து விசாரணை நடத்தி வருகின்றனர்.

வேலூர்:

வேலூர் பாராளுமன்ற தொகுதியில் அ.தி.மு.க. கூட்டணியில் புதிய நீதிக் கட்சி தலைவர் ஏ.சி.சண்முகம் இரட்டை இலை சின்னத்தில் போட்டியிடுகிறார்.

அவருக்கு ஆதரவாக கூட்டணி கட்சி தலைவர்கள் வாக்கு சேகரித்து வருகின்றனர். தே.மு.தி.க. தலைவர் விஜயகாந்தின் மகன் விஜயபிரபாகரன் வேலூர் சைதாப்பேட்டை முருகன் கோவில் அருகே வேட்பாளர் ஏ.சி.சண்முகத்துக்கு ஆதரவாக நேற்று வாக்கு சேகரித்தார்.

வேலூர் எங்க அம்மாவோட சொந்த மாவட்டம் ஆகும். இந்த மாவட்டத்தின் ஒரே மருமகன் விஜயகாந்த் தான். தற்போது ‘டாக் ஆப் தி டவுன்’ என வேலூரை தான் அழைக்கிறார்கள். வேலூர் தொகுதி நட்சத்திர அந்தஸ்து கொண்ட தொகுதியாக மாறிவிட்டது. ஏனென்றால் ஆட்சியிலே இல்லாவிட்டாலும் பணம் மூட்டை மூட்டையாக கைப்பற்றப்பட்டுள்ளது. அது யாருடையது என்று உங்களுக்கே தெரியும்.

விஜயகாந்தை தொட்டால் பிரச்சினை என்றேன். தேவையில்லாமல் துரைமுருகன் சீண்டி பார்த்து விட்டார். அதன் விளைவை தெரிந்து கொண்டிருப்பார். ஸ்டாலின் சொல்கிறார் எங்களுக்கு மடியில் கனம் இல்லை அதனால் வழியில் பயம் இல்லை என்று. இதை விஜயகாந்த் சொன்னால் பொருந்தும். உங்கள் உடல் முழுவதும் கனம் இருக்கிறது. அதனால் தான் மாட்டிக் கொண்டீர்கள். ஏ.சி.சண்முகம் பல வாக்குறுதிகளை மக்களுக்கு கொடுத்துள்ளார். அதை அவர் நிறைவேற்றுவார்.

ஸ்டாலின் எதை எடுத்தாலும் எதிர்க்கிறார். என்னிடம் கூட சிலர் ஸ்டாலினை பற்றி கேட்டார்கள். நான் அவர் ஒரு உளறும் புகார் பெட்டி என்று கூறினேன். எதை எடுத்தாலும் அதை எதிர்த்தால் அவர்கள் முட்டாள் என்று அர்த்தம். எதை எதிர்க்கனுமோ அதை தான் எதிர்க்க வேண்டும். அப்படி இருந்தால் தான் நாடு வளரும். மத்தியிலும், மாநிலத்திலும் நம் ஆட்சி இருந்தால் தான் மக்களுக்கு நல்லது செய்ய முடியும். கூட்டணி வைத்தால் தான் நமக்கு அமோக வெற்றி கிடைக்கும் என்று விஜயகாந்த் கூறினார்.

இவ்வாறு அவர் பேசினார்.

அப்போது முன்னாள் அமைச்சர் டாக்டர் வி.எஸ்.விஜய், தே.மு.தி.க. மத்திய மாவட்ட செயலாளர் ஸ்ரீதர் மற்றும் கூட்டணி கட்சியை சேர்ந்த நிர்வாகிகள் பலர் உடன் இருந்தனர். #vijayaprabhakaran #duraimurugan

அணைக்கட்டு:

பள்ளிகொண்டா அருகே உள்ள எஸ்.என்.பாளையம் கிராமத்தை சேர்ந்தவர் கணபதி. இவரது மனைவி ஜானகி அம்மாள் (வயது 83). இவருக்கு 4 மகன்கள், ஒரு மகள் உள்ளனர். அவர்கள் திருமணமாகி தனி தனியாக வசித்து வருகின்றனர்.

கணவர் இறந்து விட்டதால் ஜானகி அம்மாள் அகரம்கேரி ஏரிகரையோரம் உள்ள விவசாய நிலத்தில் உள்ள வீட்டில் வசித்து வந்தார். அவரது மகன் வஜ்ரவேல் நிலத்தில் மாடுகள் வளர்த்து வருகிறார்.

நேற்று இரவு மாடுகளுக்கு தண்ணீர் வைத்து விட்டு அவரது தாயாருக்கு சாப்பாடு கொடுத்து விட்டு வந்தார்.

தனியாக இருந்த ஜானகி அம்மாளை மர்ம நபர்கள் அருகே இருந்த பள்ளத்துக்குள் இழுத்து சென்று கல்லால் கொடூரமாக தாக்கி கொலை செய்துள்ளனர். பின்னர் வீட்டுக்குள் சென்று ஜானகி அம்மாளின் 5 பவுன் நகையை கொள்ளையடித்து சென்று விட்டனர்.

இன்று காலை வஜ்ரவேல் அவரது நண்பர் ஆறுமுகம் ஆகியோர் பால்கறக்க நிலத்துக்கு சென்றனர். வீட்டில் ஜானகி அம்மாள் இல்லை. மேலும் அங்கிருந்த பொருட்கள் சிதறிக்கிடந்தன. இதனைக் கண்டு திடுக்கிட்ட அவர்கள் தேடி பார்த்தனர். அப்போது ஜானகி அம்மாள் பிணமாக கிடந்ததை கண்டு அழுது துடித்தனர்.

இதுபற்றி பள்ளிகொண்டா போலீஸ் நிலையத்துக்கு தகவல் தெரிவிக்கப்பட்டது. இன்ஸ்பெக்டர் கோவிந்தராஜ் மற்றும் போலீசார் சம்பவ இடத்துக்கு சென்று மூதாட்டி உடலை மீட்டு பிரேத பரிசோதனைக்கு அனுப்பி வைத்தனர்.

போலீஸ் விசாரணையில் இரவு 11 மணிக்கு நிலத்தில் சத்தம் கேட்டதாக தெரிவித்துள்ளனர். மேலும் ஜானகி அம்மாள் வீட்டில் இருந்து 100 மீட்டர் தொலைவில் உள்ள வீட்டில் இருந்த வாலிபர் ஒருவர் மாயமாகி உள்ளார். அவர் மீது போலீசாருக்கு சந்தேகம் ஏற்பட்டுள்ளது. அவரை போலீசார் தேடி வருகின்றனர்.

இந்த சம்பவம் அப்பகுதியில் பரபரப்பை ஏற்படுத்தியது.

ஆம்பூர்:

மாதனூரை அடுத்த தோட்டாளம் மற்றும் பாலூர் இடையே வனப்பகுதியையொட்டி வனத்துறையினர் கால்வாய் ஒன்றை வெட்டி வைத்துள்ளனர். நேற்று முன்தினம் அந்த வழியாக ஆடு, மாடு மேய்க்க சென்றவர்கள் துர்நாற்றம் வீசுவதை கண்டு அருகில் சென்று பார்த்தனர். அப்போது அங்கு ஒரு பெண் உடல் புதைக்கப்பட்டு, அவரது சேலை மற்றும் காலின் ஒரு பகுதி வெளியே தெரிவதை கண்டு அதிர்ச்சி அடைந்தனர்.

இதுகுறித்து ஆம்பூர் தாலுகா போலீசாருக்கு தகவல் தெரிவிக்கப்பட்டது. அதன்பேரில் ஆம்பூர் துணை போலீஸ் சூப்பிரண்டு சச்சிதானந்தம், தாலுகா போலீஸ் இன்ஸ்பெக்டர் கோகுல்ராஜ் மற்றும் போலீசார் சம்பவ இடத்திற்கு சென்று விசாரணை நடத்தினர். மேலும் பெண் உடல் புதைக்கப்பட்ட இடத்தில் சாராய பாக்கெட்டுகள் மற்றும் ஒரு ஜோடி காலணி இருப்பதை கண்டனர். இரவு நேரம் ஆனதால் உடலை மீட்க இயலாத நிலை ஏற்பட்டது. அதைத் தொடர்ந்து உடனடியாக அந்த பகுதியில் மின்விளக்கு அமைக்கப்பட்டது. மேலும் உடலின் அருகே போலீசாரும், வனத்துறையினரும், வருவாய்த்துறையினரும் பாதுகாப்பு பணியில் ஈடுபட்டனர்.

இந்த நிலையில் நேற்று காலை கைரேகை நிபுணர் விஜய், அவரது குழுவினர் வந்து காலணி, சாராய பாக்கெட்டுகளை மீட்டனர். ஆனால் மதியம் வரை பெண்ணின் உடலை மீட்க நடவடிக்கை எடுக்கவில்லை. இதனால் ஆத்திரம் அடைந்த பொதுமக்கள் மாதனூர் - பாலூர் சாலையில் அமர்ந்து மறியல் போராட்டத்தில் ஈடுபட்டனர். அவர்களிடம் துணை போலீஸ் சூப்பிரண்டு சச்சிதானந்தம் பேச்சுவார்த்தை நடத்தினார்.

இதற்கிடையே அதே பகுதியை சேர்ந்த செங்கல் சூளையில் கூலி தொழிலாளியாக வேலை பார்த்து வரும் அண்ணாதுரை என்பவர் தனது மனைவி செல்வி (வயது 40) கடந்த சனிக்கிழமை மாதனூரில் நடந்த சந்தைக்கு சென்று வருவதாக கூறி, தன்னிடம் ரூ.650 வாங்கிக்கொண்டு சென்றவர் அதன்பிறகு வீடு திரும்பவில்லை. பல இடங்களில் தேடி பார்த்தும் கிடைக்கவில்லை என போலீசாரிடம் கூறினார்.

அதைத்தொடர்ந்து ஆம்பூர் தாசில்தார் சுஜாதா முன்னிலையில் அழுகிய நிலையில் இருந்த பெண்ணின் உடல் மீட்கப்பட்டது. மேலும் கை, கால்கள் வெட்டப்பட்ட நிலையில் முகம் சேலையால் இறுக்கப்பட்டும், தலை நசுங்கியும் இருந்தது.

இதனையடுத்து அழுகிய நிலையில் கிடந்த உடலை அண்ணாதுரை, அவரது மகன் ஆனந்தராஜ் ஆகியோர் பார்வையிட்டனர். அப்போது அது செல்வி என்பது தெரியவந்தது. அதைத் தொடர்ந்து அழுகிய நிலையில் இருந்த உடலை வேலூர் மருத்துவ கல்லூரி மருத்துவமனையை சேர்ந்த டாக்டர்கள் நாகேந்திரகுமார், பிரபு குழுவினர் பிரேத பரிசோதனை செய்தனர். பின்னர் செல்வியின் உடல் கணவரிடம் ஒப்படைக்கப்பட்டது.

இதுகுறித்து ஆம்பூர் தாலுகா போலீசார் வழக்குப்பதிவு செய்து விசாரணை நடத்தினர். விசாரணையில் செல்வி ஆம்பூர் அருகே உள்ள தனியார் ஷூ கம்பெனியில் வேலை பார்த்து வந்ததும், அதே கம்பெனியில் வேலை செய்து வந்த ஒருவருடன் கள்ளத்தொடர்பு இருந்ததும் தெரியவந்தது.

இதுதொடர்பாக மாதனூரை சேர்ந்த வாலிபரிடம் போலீசார் பிடித்து விசாரணை நடத்தி வருகின்றனர். மேலும் இந்த சம்பவத்தில் தொடர்புடையதாக கருதப்படும் மேலும் ஒருவரையும் போலீசார் தேடி வருகின்றனர்.