வேலூர்

வேலூர்:

சென்னையில் ஏற்பட்டுள்ள குடிநீர் தட்டுப்பாட்டை போக்க வேலூர் மாவட்டம் ஜோலார்பேட்டையில் இருந்து ரெயில் மூலம் சென்னைக்கு குடிநீர் கொண்டு செல்லப்படுகிறது.

தினமும் 10 மில்லியன் லிட்டர் தண்ணீர் சென்னைக்கு கொண்டு செல்லப்படுகிறது. இதற்காக ரூ.65 கோடி நிதி ஒதுக்கப்பட்டு பணிகள் நடந்து வந்தது.

மேட்டு சக்கரகுப்பத்தில் உள்ள 5.05 லட்சம் லிட்டர் கொள்ளளவு கொண்ட காவிரி கூட்டு குடிநீர் தரைமட்ட நீர்த்தேக்க தொட்டியில் இருந்து 3½ கிலோ மீட்டர் தூரத்தில் உள்ள பார்சம்பேட்டை ரெயில்வே கேட் பகுதிக்கு குழாயில் தண்ணீர் கொண்டு செல்லப்படுகிறது. பின்னர் அங்கிருந்து ரெயில் வேகன்களில் தண்ணீர் நிரப்பப்படுகிறது.

இதற்காக குடிநீர் வாரியம், ரெயில்வே துறை, மின்சார வாரியம் சார்பில் இரவு பகலாக நடந்து வந்த வேலைகள் முடிவுக்கு வந்தது.

பார்சம்பேட்டையில் ரெயில் வேகன்களில் தண்ணீர் பிடிப்பதற்காக 50 குடிநீர் பைப்புகள் வைக்கப்பட்டுள்ளது. இந்த பணிகள் அனைத்தையும் குடிநீர் வடிகால் வாரிய மேலாண் இயக்குனர் மகேஸ்வரன், தலைமையிலான குழுவினர் ஆய்வு செய்தனர்.

சென்னைக்கு குடிநீர் கொண்டு செல்லும் பணிகள் அனைத்தும் சிறப்பாக முடிவடைந்துள்ளது. மேட்டு சக்கரகுப்பத்தில் இருந்து பார்சம்பேட்டை வரை 3½ கிலோ மீட்டர் தூரத்திற்கு தண்ணீர் கொண்டு செல்லப்பட்டு இன்று சோதனை செய்யப்பட்டது.

இதில் எங்கேயாவது தண்ணீர் கசிகிறதா? குழாய்கள் சரியாக பொருத்தப்பட்டுள்ளதா? என்று ஆய்வு செய்யப்பட்டது.

நாளை மறுதினம் புதன்கிழமை காலையில் சென்னைக்கு ரெயிலில் குடிநீர் கொண்டு செல்லும் பணி தொடங்குகிறது. இதற்கான வேலைகள் மும்முரமாக நடந்து வருகிறது.

தினமும் ரெயிலில் 4 முறை தண்ணீர் கொண்டு செல்லப்படுகிறது. ஒரு முறை 25 லட்சம் லிட்டர் குடிநீர் என்று மொத்தம் 10 மில்லியன் லிட்டர் தண்ணீர் கொண்டு செல்லப்படுகிறது.

சென்னை வில்லிவாக்கம் ரெயில் நிலையத்திற்கு தண்ணீர் கொண்டு செல்லப்பட்டு அங்கிருந்து சென்னை மாநகர பகுதிக்கு தண்ணீர் பிரித்து அனுப்பப்படுகிறது.

வேலூர்:

தி.மு.க. பொருளாளர் துரைமுருகன் வேலூரில் நிருபர்களுக்கு பேட்டியளித்தார்.

எங்களால் வேலூர் பாராளுமன்ற தொகுதி தேர்தல் நின்றுபோனது என்று கூறுவது சரியல்ல. எங்கள் மீது எந்த தவறும் இல்லை. எங்கள் வீட்டிலும், கல்லூரியிலும் சோதனையிட்டு எதுவும் பிடிபடவில்லை என்று வருமான வரித்துறையினர் எழுதி கொடுத்து சென்றனர். எங்களுக்கும், வருமான வரித்துறையினருக்கும் எவ்வித பிரச்சினையும் இல்லை. தமிழ்நாட்டில் தற்காலிகமான ஆட்சிதான் நடைபெற்றுக் கொண்டிருக்கிறது. விரைவில் ஆட்சி மாற்றம் ஏற்படும்.

தமிழ்நாட்டில் குடிநீர் பிரச்சினை, சட்டம்-ஒழுங்கு பிரச்சினை, லஞ்ச லாவண்யம், அதிகமாக உள்ளது. இவற்றை முன்னிறுத்தி தேர்தல் பிரசாரத்தில் ஈடுபடுவோம். தமிழகத்தில் எந்த தொழிலும் முன்னேற்றம் ஏற்படவில்லை. பெரிய தொழில் நிறுவனங்கள் ஆந்திராவுக்கு சென்று விட்டன.

மத்திய பட்ஜெட் குறித்து நன்கு படித்த அறிஞர்கள், பொருளாதார நிபுணர்கள் உள்பட அனைவரும் மத்திய பட்ஜெட்டால் எந்த பயனும் இல்லை என்று தெரிவித்துள்ளனர். கார்ப்ரேட் நிறுவனங்களுக்கு உதவுவது போன்றுதான் உள்ளது. பட்ஜெட்டை பொதுமக்கள், விவசாயிகள் எதிர்பார்த்து ஏமாற்றம் அடைந்துள்ளனர்.

சிறு வியாபாரிகளுக்கு ஓய்வூதியம் கொடுப்பதாக பட்ஜெட்டில் அறிவித்துள்ளனர். அவர்கள் சொல்வதை எல்லாம் செய்து விடுவார்களா? என்பதை பொறுத்திருந்துதான் பார்க்க வேண்டும். தி.மு.க. சார்பில் போட்டியிடும் எனது மகன் கதிர் ஆனந்த் வருகிற 12-ந் தேதி (வெள்ளிக்கிழமை) வேட்புமனு தாக்கல் செய்ய உள்ளார்.

இவ்வாறு அவர் கூறினார். 

வேலூர்:

திருவண்ணாமலை மாவட்டம் கலசபாக்கம் அடுத்த அருணகிரி மங்கலத்தை சேர்ந்தவர் ரமேஷ். இவர் இளம்பெண் கடத்தல், கற்பழிப்பு வழக்கில் கைது செய்யபட்டு 12 ஆண்டுகள் தண்டனை விதிக்கப்பட்டு கடந்த 2017-ம் ஆண்டு வேலூர் ஜெயிலில் அடைக்கப்பட்டார்.

கடந்த 2 நாட்களுக்கு முன்பு ஜெயிலுக்கு வெளியே உள்ள தோட்டத்தில் ரமேஷ் உள்பட நன்னடத்தை கைதிகள் சிலர் குழுக்களாக பிரிந்து வேலை செய்து கொண்டிருந்தனர். அவர்களை சிறை காவலர்கள் கண்காணித்து கொண்டிருந்தனர். தோட்டத்தில் வேலை செய்து கொண்டிருந்த போது ஜெயில் கைதிகளுக்கும், சிறை காவலர்களுக்கும் தெரியாமல் ரமேஷ் தப்பி ஓடிவிட்டார்.

இது தொடர்பாக பாகாயம் போலீசில் புகார் செய்யப்பட்டது. ஜெயில் கைதி தப்பி ஓடியபோது பணியில் இருந்த சிறைக்காவலர்களிடம் ஜெயில் அதிகாரிகள் விசாரணை நடத்தினர்.

முதன்மை சிறைக்காவலர் குமரவேல், தலைமை சிறைக்காவலர் திருமலை ஆகியோரின் கவன குறைவால் கைதி தப்பி ஒடியது தெரியவந்தது.

இதையடுத்து அவர்கள் 2 பேரையும் சஸ்பெண்டு செய்து சிறைதுறை டி.ஐ.ஜி. ஜெயபாரதி உத்தரவிட்டார்.

இதற்கிடையில், செங்கம் புதுப்பாளையத்தில் ரமேஷ் பதுங்கி இருப்பது தெரியவந்தது. இதையடுத்து, திருவண்ணாமலை கிளை சிறை வார்டர்கள் இமானுவேல் சந்திரசேகர், கார்த்திக் ஆகியோர் புதுப்பாளையம் பஸ் நிலையத்தில் கண்காணிப்பு பணியில் ஈடுபட்டனர்.

அப்போது, அங்கு பதுங்கி இருந்த ரமேஷை நேற்று பிற்பகல் கைது செய்தனர். பின்னர், அவரை வேலூர் மத்திய சிறையில் அடைத்தனர்.