நாகப்பட்டினம்

சீர்காழி:

அந்தமான், இலங்கை, ஒரிசா கடல் பகுதியில் காணப்படும் 200 ஆண்டுகள் வரை உயிர் வாழக்கூடியது ஆலிவ் ரெட்லி ஆமைகள். இவை ஆண்டுதோறும் நவம்பர் மாதம் முதல் மார்ச் வரை முட்டையிட நாகை மாவட்டம் சீர்காழி அருகே திருமுல்லைவாசல், தொடுவாய், கூழையார் பகுதி கடற்கரைக்கு வந்து செல்லும்.

அங்கு நள்ளிரவு நேரங்களில் கரையேறி கடற்கரையில் குழி தாண்டி 200 முட்டைகள் வரையிட்டு பின்னர் மீண்டும் குழியை மூடிவிட்டு கடலுக்கு ஆலிவ்ரெட் ஆமைகள் சென்று விடும்.

இந்நிலையில் சீர்காழி அருகே திருமுல்லைவாசல் முதல் பழையார் மீனவர் கிராமம் வரை சுமார் 12 கி.மீட்டர் தூரம் கடற்கரையோரம் 200-க்கும் மேற்பட்ட ஆலிவ்ரெட்லி ஆமைகள் இறந்த நிலையில் கரை ஒதுங்கின. இதைப்பார்த்த அப்பகுதி மீனவர்கள் வனத்துறையினருக்கு தகவல் தெரிவித்தனர்.

இதையடுத்து வனத்துறையினர் வந்து இறந்து கிடந்த ஆமைகளை பார்வையிட்டனர். அப்போது மீனவர்கள் கூறுகையில்;

இந்த ஆமைகள் இறந்து 2 நாட்களுக்கு மேல் இருக்கும் என்றும், இதனால் இப்பகுதியில் துர்நாற்றம் வீசுவதாகவும், எனவே இறந்து கிடக்கும் ஏராளமான ஆமைகளை அகற்ற உடனடியாக நடவடிக்கை எடுக்க வேண்டும் என்று தெரிவித்தனர். மேலும் தொடுவாய் கடற்கரையோரம் உள்ள மீன் எண்ணை உற்பத்தி தொழிற்சாலைகளில் இருந்து வரும் கழிவுகள் நேரடியாக கடலில் கலப்பதால் ஆமைகள் இறந்து இருக்கலாம். எனவே ஆமைகள் இறந்தது குறித்து கடற்கரையோரம் உள்ள தனியார் தொழிற்சாலைகளில் மாசுகட்டுப்பாட்டு அதிகாரிகள் ஆய்வு செய்ய வேண்டும் என்றும் மீனவர்கள் கோரிக்கை விடுத்துள்ளனர். #tamilnews

மயிலாடுதுறை:

மயிலாடுதுறையில் போக்குவரத்து நெருக்கடி மிகுந்த பட்டமங்கலத் தெரு உள்ளது. இங்கு ஒரு தனியார் மருத்துவமனை மற்றும் ஏராளமான கடைகள் அருகருகே நெருக்கமாக அமைந்துள்ளது. இந்த தெருவில் மருத்துவமனையை ஒட்டி ‘பாம்ஸ் ரெசிடென்சி’ என்ற தங்கும் விடுதியுடன் கூடிய உணவு விடுதி செயல்பட்டு வருகிறது. இந்த உணவு விடுதியின் தரைத்தளத்தில் சமையல் கூடம் இயங்குகிறது.

இந்நிலையில் நேற்று மதியம் இந்த சமையல் கூடத்தில் ஊழியர்களின் கவனக்குறைவால் திடீர் என தீப்பற்றியது. உடனடியாக கடை ஊழியர்கள் தீயை அணைக்க முயன்றும் முடியவில்லையாம். தீயை அணைப்பதற்கான உபகரணங்கள் கடையில் இருந்ததாக தெரியவில்லை. இந்த தீ விபத்தால் கடும் புகை மூட்டம் சமையல் கூடத்தில் இருந்து வெளியேறி அருகில் உள்ள மருத்துவ மனைக்குள் புகுந்ததாக கூறப்படுகிறது. கடைத் தெருவிலும் புகைமூட்டம் சூழ்ந்தது.

இதனையடுத்து ‘பாம்ஸ் ரெசி டென்சி’யின் மேல் தளங்களில் உள்ள விடுதி அறையில் தங்கியிருந்தவர்கள் மற்றும் அருகில் உள்ள தனியார் மருத்துவமனையில் உள் நோயாளிகளாக சிகிச்சை பெற்று வந்தவர்கள் இதைக்கண்டு பெரும் அச்சமடைந்தனர்.

பின்னர் வெளியில் வந்து பார்த்தபோது தனியார் விடுதியில் தீப்பற்றியதை கண்டு அச்சத்துடன் விடுதி அறையில் இருந்தும், மருத்துவமனையில் இருந்த நோயாளிகளும் அலறி அடித்துக் கொண்டு வெளியேறினர். இதனையடுத்து பட்டமங்கலத் தெருவில் பெரும் பதட்டமான சூழல் நிலவியது.

தீ விபத்து பற்றி உடனடியாக மயிலாடுதுறை தீயணைப்பு நிலையத்துக்கு தகவல் தெரிவிக்கப்பட்டது. அதன்பேரில் தீயணைப்பு வீரர்கள் சம்பவ இடத்துக்கு விரைந்து தீயை அணைத்து கட்டுக்குள் கொண்டு வந்ததால் அனைவரும் நிம்மதியடைந்தனர். இதன் காரணமாக பெரும் அசம்பாவிதம் தவிர்க்கப் பட்டது. தனியார் ஓட்டலில் ஏற்பட்ட தீவிபத்துக்கான காரணம் குறித்து மயிலாடுதுறை போலீசார் விசாரணை நடத்தி வருகின்றனர்.

மயிலாடுதுறை பகுதியில் ஏராளமான தனியார் ஓட்டல்கள் உள்ளன. ஆனால் இந்த கடைகளில் அரசு விதிமுறைகள் சரியாக பின்பற்றப்படுகின்றனவா? என்று தெரியவில்லை. இதுகுறித்து அதிகாரிகள் உடனடியாக ஆய்வு மேற்கொண்டு நடவடிக்கை எடுக்க வேண்டும். போக்குவரத்து நிறைந்த கடைத்தெருவில் தனியார் ஓட்டலில் கவனக்குறைவாக தீவிபத்து ஏற்பட்டதால் பெரும் பதட்டம் ஏற்பட்டது. இதுவே இரவு நேரத்தில் தீவிபத்து ஏற்பட்டிருந்தால் பெரும் சேதம் ஏற்பட்டிருக்கும் என்று கூறினர். #tamilnews

வேதாரண்யம்:

வேதாரண்யத்தை அடுத்த கருப்பம்புலம் மேலக்காடு பகுதியைச் சேர்ந்தவர் கண்ணையன் (வயது45). சுமைதூக்கும் தொழிலாளி. இவர் தனது மனைவி ராணி (40), மகன் காளிதாஸ் (18) ஆகியோருடன் மோட்டார் சைக்கிளில் சென்றபோது எதிரே வந்த மோட்டார் சைக்கிள் நேருக்கு நேர் மோதியது.

இதில் 2 மோட்டார் சைக்கிளிலும் வந்த 5 பேர் காயமடைந்தனர். அவர்கள் அனைவரும் வேதாரண்யம் அரசு ஆஸ்பத்திரிக்கு அழைத்து செல்லப்பட்டனர். அங்கு சிகிச்சை பலனின்றி கண்ணையன் பரிதாபமாக இறந்தார்.

மேலும் கண்ணையுடன் மோட்டார் சைக்கிளில் வந்த அவரது மனைவி ராணி, மகன் காளிதாஸ் மற்றும் மற்றொரு மோட்டார் சைக்கிளில் வந்த அன்புமுருகன், முகமது உமர்பாரூக் ஆகியோர் மேல் சிகிச்சைக்காக திருவாரூர் அரசு ஆஸ்பத்திரிக்கு அனுப்பி வைக்கப்பட்டனர். #tamilnews

இது குறித்த புகாரின் பேரில் வேதாரண்யம் இன்ஸ்பெக்டர் நடராஜன், சப்-இன்ஸ்பெக்டர் அன்புராஜன் ஆகியோர் வழக்குப்பதிவு செய்து பிரேத விசாரணை நடத்தினர்.

திருமருகல்:

நாகை மாவட்டம் திருமருகல் ஒன்றியம் கட்டுமாவடி ஆற்றங்கரை தெருவில் வசிப்பவர் ராஜசேகரன் (வயது 28). மினி லாரி ஓட்டி வருகிறார். இவரது சொந்த ஊர் காரைக்கால் மாவட்டம் காசாகுடி வடபாதி ஆகும். இவரது மனைவி ஆனந்தி (22). இவர்களுக்கு திருமணமாகி 3 ஆண்டுகள் ஆகிறது. இவர்களுக்கு ராஜஸ்ரீ (2), ஆசாத் (6 மாதம்) என்ற குழந்தைகள் உள்ளனர்.

ராஜசேகர் அடிக்கடி குடித்து விட்டு மனைவியை வரதட்சணை வாங்கி வருமாறு அடித்து துன்புறுத்தி வந்ததாக கூறப்படுகிறது. அவரது அக்கா ராதிகா என்பவரும் சேர்ந்து கொடுமைப்படுத்தி வந்துள்ளனர். இதனால் ஆனந்தியின் உறவினர்கள் காரைக்காலில் வசித்து வந்த இருவரையும் கட்டுமாவடிக்கு அழைத்து வந்து தங்க வைத்தனர். அங்கு வாடகை வீட்டில் இருவரும் குழந்தைகளுடன் வசித்து வந்துள்ளனர்.

இந்நிலையில் வாரம் ஒருமுறை காரைக்காலில் இருந்து கட்டுமாவடிக்கு வரும் ராஜசேகர் வழக்கம் போல் குடித்து விட்டு வந்து வரதட்சணை வாங்கி வர சொல்லி தகராறு செய்வாராம். நேற்று வீட்டுக்கு வந்த அவர் மனைவியை அடித்து துன்புறுத்தியதாக கூறப்படுகிறது.

இதனால் மனமுடைந்த ஆனந்தி நள்ளிரவில் வீட்டில் தூக்குபோட்டு தற்கொலை செய்து கொண்டதாக கூறப்படுகிறது. இதைக்கண்ட அக்கம் பக்கத்தினர் இதுபற்றி திட்டச்சேரி போலீசாருக்கு தகவல் தெரிவித்தனர். போலீசார் சம்பவ இடத்துக்கு வந்து ஆனந்தி உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

பின்னர் வழக்குப்பதிவு செய்து ராஜசேகரை போலீஸ் நிலையத்துக்கு அழைத்து சென்று தீவிர விசாரணை நடத்தி வருகின்றனர். திருமணமாகி 3 ஆண்டுகளே ஆவதால் ஆர்.டி.ஓ. தனி விசாரணை நடத்தி வருகிறார்.

வரதட்சணை கொடுமையால் 2 கைக் குழந்தைகளின் தாய் தூக்குபோட்டு தற்கொலை செய்து கொண்ட சம்பவம் அப்பகுதியில் சோகத்தை ஏற்படுத்தி உள்ளது. #tamilnews 

தரங்கம்பாடி:

நாகை மாவட்டம், மயிலாடுதுறை சேந்தங்குடி கோகுலம் நகரை சேர்ந்தவர் தெய்வசிகாமணி. இவர் ரியல் எஸ்டேட் தொழில் செய்து வருகிறார். இவரது மகன் பூர்ணசந்திரன் (வயது 18). இவர், மயிலாடுதுறையில் உள்ள ஒரு தனியார் என்ஜினீயரிங் கல்லூரியில் முதலாம் ஆண்டு படித்து வந்தார்.

நேற்று பூர்ணசந்திரன், தனது நண்பர்களான தினேஷ்குமார், பிரசன்னகுமார் ஆகியோருடன் தரங்கம்பாடி கடற்கரைக்கு சென்றார்.

இதனை தொடர்ந்து அவர்கள், கடல் முகத்துவாரம் பகுதியில் குளித்து கொண்டிருந்தனர்.

இதில் தினேஷ்குமார், பிரசன்னகுமார் ஆகியோர் கரைக்கு திரும்பினர். ஆனால் பூர்ணசந்திரன் மட்டும் குளித்து கொண்டிருந்தார். அப்போது அலையில் சிக்கி பூர்ணசந்திரன் கடலில் மூழ்கினார். இதனை கண்ட அவரது நண்பர்கள் கூச்சலிட்டனர். சிறிது நேரத்தில் பூர்ணசந்திரனின் உடல் கரை ஒதுங்கியது.

இதுகுறித்து தகவல் அறிந்த தரங்கம்பாடி கடலோர காவல் நிலைய போலீசார் பூர்ணசந்திரனின் உடலை கைப்பற்றி பிரேத பரிசோதனைக்காக பொறையாறு அரசு மருத்துவமனைக்கு அனுப்பி வைத்தனர்.

மேலும் இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். 

குத்தாலம்:

தஞ்சை மாவட்டம் கும்பகோணத்தில் இருந்து நாகை மாவட்டம் மங்கைநல்லூருக்கு செல்லும் அரசு பஸ்சில் கண்டக்டராக பணியாற்றி வருபவர் கார்த்திகேயன் (வயது 40).இவர் திருவிடைமருதூரை அடுத்த பிள்ளையார் பேட்டையை சேர்ந்தவர்.

இவர் நேற்று மாலை வழக்கம் போல் பஸ்சில் பணியில் இருந்தார். அந்த பஸ் குத்தாலத்தை அடுத்த கத்திரி மூலைப்பகுதியில் நிற்காமல் சென்றதால் அதில் பயணம் செய்த கத்திரி மூலையை சேர்ந்த கஜேந்திரன் (28), கனகசபை (32) ஆகிய இருவரும் கண்டக்டர் கார்த்திகேயனுடன் தகராறு செய்தனர்.

பின்னர் அவரை கீழே இழுத்து அடித்துள்ளனர். இதில் கார்த்திகேயனின் கழுத்தில் காயம் ஏற்பட்டது.

இது பற்றி அவர் பாலையூர் போலீசில் புகார் செய்தார். அதன் பேரில் சிறப்பு சப்-இன்ஸ்பெக்டர் வீரபாண்டியன் வழக்கு பதிவு செய்து கண்டக்டரை தாக்கிய 2 பேரையும் கைது செய்தார்.

இந்த சம்பவம் பஸ் பயணிகள் மற்றும் போக்குவரத்து ஊழியர்களிடையே பரபரப்பை ஏற்படுத்தி உள்ளது.

வேதாரண்யம்:

வேதாரண்யத்தை அடுத்த கரியாப்பட்டினம், அண்டகத்துறையை சேர்ந்தவர் தெய்வராசு (வயது 43). விவசாயி. இவரது மனைவி வேதநாயகி. தெய்வராசு தனது மனைவியை வேலைக்கு செல்லக் கூடாது என்று கூறியுள்ளார்.

ஆனால் அதை கேட்காமல் வேதநாயகி வேலைக்கு சென்றுள்ளார். இது தொடர்பாக தெய்வராசு மனைவியுடன் தகராறு செய்துள்ளார். கணவர் அடிக்க சென்றதால் வேதநாயகி அருகில் உள்ள உறவினர் அன்பழகன் என்பவரது வீட்டுக்கு சென்றுள்ளார்.

அங்கு சென்ற தெய்வராசு என் மனைவிக்கு உன் வீட்டில் எப்படி அடைக்கலம் கொடுக்கலாம் என்று தகராறு செய்து இரும்பு கம்பியால் அன்பழகனை அடித்துள்ளார்.

இதில் காயமடைந்த அன்பழகனை மீட்டு சிகிச்சைக்காக திருவாரூர் அரசு ஆஸ்பத்திரியில் அனுமதித்துள்ளனர். இது பற்றிய புகாரின் பேரில் கரியாப்பட்டினம் இன்ஸ்பெக்டர் ராஜசேகரன் வழக்கு பதிவு செய்து தெய்வராசுவை கைது செய்தார்.